ବେଙ୍ଗାଲୁରୁ: ଏମ. ଚିନାସ୍ବାମୀ ଷ୍ଟାଡିୟମରେ ହାଇଭୋଲଟେଜ୍ ମ୍ୟାଚ୍ । କର ବା ମର ମ୍ୟାଚ୍ରେ ଆରସିବି ବଡ଼ ସ୍କୋର କରିଛି । ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ଆରସିବି ୨୧୮ ରନ୍ କରିଛି । ଆଜିର ମ୍ୟାଚ୍ର ବିରାଟ କୋହଲି ଫାଫ ଡୁ ପ୍ଲେସିସ୍ ଭଲ ଆରମ୍ଭ ଦେଇଥିଲେ ମଧ୍ୟ ଦଳର ସ୍କୋର ଧିମା ପଡ଼ିଥିଲା । ଏହା ପରେ ଆରସିବି ବଡ଼ ସ୍କୋର ଆଡ଼କୁ ଅଗ୍ରସର ହୋଇଥିଲେ । ଶେଷ ୨୦ ଓଭର ଶେଷ ସୁଦ୍ଧା ୫ ଓ୍ବିକେଟ ହରାଇ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ୨୧୮ ରନ୍ କରିଛି । ଏହା ସହ ଚେନ୍ନାଇକୁ ୨୧୯ ରନର୍ ବିଜୟ ଲକ୍ଷ୍ୟ ଦେଇଛି ଆରସିବି ।
ମ୍ୟାଚ୍ ଜିତି ପ୍ଲେ ଅଫ୍ରେ ପ୍ରବେଶ ପାଇଁ ଚେନ୍ନାଇ ସାମ୍ନାରେ ୨୧୯ ରନର ବିଜୟ ଲକ୍ଷ୍ୟ ରହିଛି । ମ୍ୟାଚ୍ ହାରିଲେ ମଧ୍ୟ ଚେନ୍ନାଇ ୨୦୧ ରନ କଲେ ଟପ୍-୪ରେ ପହଞ୍ଚିଯିବ । ଅନ୍ୟପଟେ ବେଙ୍ଗାଲୁରୁକୁ ପ୍ଲେ ଅଫକୁ ଯିବାକୁ ହେଲେ ମ୍ୟାଚକୁ ୧୮ ରନରେ ଜିତିବାକୁ ପଡ଼ିବ ।
ଇଣ୍ଡିଆନ୍ ପ୍ରିମିୟର ଲିଗ୍ ୨୦୨୪ର ୬୮ ତମ ମ୍ୟାଚ୍ରେ ଉଭୟ ଚେନ୍ନାଇ ଏବଂ ବେଙ୍ଗାଲୁରୁ ପାଇଁ କର ବା ମର ପରିସ୍ଥିତି । ଆଜିର ମ୍ୟାଚ୍ ଯିଏ ଜିତିବ ସେହି ଟିମ୍ ପ୍ଲେଅଫ୍କୁ ଯିବ । ଆଜି ଟସ୍ ଜିତି ଚେନ୍ନାଇ ବୋଲିଂ ନିଷ୍ପତ୍ତି ନେଇଥିଲା । ସେପଟେ ପ୍ରଥମେ ବ୍ୟାଟିଂ କରିବାକୁ ଆସିଥିବା ବେଙ୍ଗାଲୁରୁ ଦୁଇ ଓପନର ବିରାଟ କୋହଲି ଏବଂ ଫାଫ ଡୁପ୍ଲେସି ଭଲ ସ୍କୋର କରିଥିଲେ । ବିରାଟ କୋହଲି ୨୯ ବଲ୍ରେ ୪୭ ରନ୍ କରି ଡାରିଲ ମିଚେଲଙ୍କ ହାତରେ କ୍ୟାଚ ଆଉଟ୍ ହୋଇ ପ୍ୟାଭିଲିୟନ ଫେରିଥିଲେ। ଡୁପ୍ଲେସସି୍ ସାମାନ୍ୟ ଧିମା ଖେଳିଥିଲେ ହେଁ ୫୪ ରନ କରିଥିଲେ । ସେହିଭଳି ରଜତ ପାଟିଦାର (୪୧), କ୍ୟାକେରନ୍ ଗ୍ରୀନ୍ (୩୮), ଦିନେଶ କାର୍ତ୍ତିକ (୧୪), ଗ୍ଲେନ୍ ମ୍ୟାକ୍ସଓ୍ବେଲ (୧୬)ଙ୍କ ବଳରେ ଟିମ୍ ୨୧୮ ରନ୍ ବଡ଼ ସ୍କୋର କରିଛି ।
ଅନ୍ୟପଟେ ଚେନ୍ନାଇର ଶାର୍ଦ୍ଦୁଳ ଠାକୁର ସର୍ବାଧିକ ୨ଟି ଓ୍ବିକେଟ ନେଇଥିଲେ । ତୁଷାର ଦେଶପାଣ୍ଡେ ଏବଂ ମିଚେଲ ସାଣ୍ଟନର ଗୋଟିଏ ଲେଖାଏଁ ଓ୍ବିକେଟ ନେଇଥିଲେ । ତେବେ ଆଜି ବେଙ୍ଗାଲୁରୁ ୧୮ ରନ୍ ବ୍ୟବଧାନରେ ମ୍ୟାଚ୍ ଜିତିବାକୁ ଚେଷ୍ଟା କରିବ । ଆଉ ଚେନ୍ନାଇ ୨୦୧ ରନ୍ କଲେ ପ୍ଲେଅଫକୁ ଯିବ ।
