ଦାରିଙ୍ଗବାଡି,୦୯/୧୧: ଲୋକଙ୍କ ନିରାପଦ ପାନୀୟ ଜଳ ଯୋଗାଣ ନାଁରେ ଦିଆ ଯାଉଛି ବିଷାକ୍ତ ଜଳ । ହେଲେ ଗ୍ରାମ୍ୟ ଯୋଗାଣ ବିଭାଗ ନିରାପଦ ପାନୀୟ ଜଳ କହି ଲୋକଙ୍କୁ ଜଳ ବଦଳରେ ଜହର ଯୋଗାଇ ଦେଉଥିଲା । ମାଣ୍ଡିପଙ୍କାରେ ଆମ୍ବ ଟାକୁଆ ଖାଇ ୨ଜଣ ମୃତ୍ୟୁ ବରଣ ପରେ ଏହି ଘଟଣା ସାମ୍ନାକୁ ଆସିଛି । ଏହି ଘଟଣା ପରେ ନଭେମ୍ୱର ୧ ତାରିଖରେ ଜିଲ୍ଲା ଜନ ସ୍ବାସ୍ଥ୍ୟ ଅଧିକାରୀ ଡକ୍ଟର କଲ୍ୟାଣୀ ମିଶ୍ରଙ୍କ ସହ ଦାରିଙ୍ଗବାଡି ମେଡ଼ିକାଲ ଇନଚାର୍ଜ ଡ଼କ୍ଟର ଜାକେଶ ସାମନ୍ତରାୟ ମାଣ୍ଡିପଙ୍କା ଗ୍ରାମରେ ପହଞ୍ଚି ଥିଲେ । ସେଠାରେ ପହଞ୍ଚି ବୁଡ଼ାଗୁଡ଼ି ସୋଲାର ଜଳ ପ୍ରକଳ୍ପ ଓ ମାଲାମାହାରେ ହୋଇଥିବା ବସୁଧା ଜଳ ଯୋଗାଣ ପ୍ରକଳ୍ପରୁ ଜଳର ନମୁନା ସଂଗ୍ରହ କରି ନେଇ ଥିଲେ।
ଉକ୍ତ ଜଳକୁ ଜିଲ୍ଲା ଜନ ସ୍ବାସ୍ଥ୍ୟ ଅଧିକାରୀଙ୍କ କାର୍ଯ୍ୟାଳୟରେ ରହିଥିବା ପରୀକ୍ଷା ଗାରରେ ପରୀକ୍ଷା ହୋଇଥିବା ବେଳେ ମାଲାମାହା ଜଳ ଯୋଗାଣ ପ୍ରକଳ୍ପ ଜଳରୁ ହାଇଡ୍ରୋଜେନ ସଲଫାଏଡ(ଏଚ୨ଏସ) ବାହାରି ଥିଲା । ଯାହା କି ଜହର ସହ ସମାନ । ହେଲେ ବର୍ଷ ବର୍ଷ ଧରି ମାଣ୍ଡିପଙ୍କା ଲୋକଙ୍କୁ ଉକ୍ତ ବିଷାକ୍ତ ଜଳ ଯୋଗାଇ ଦେଉଥିଲା ଗ୍ରାମ୍ୟ ଜଳ ଯୋଗାଣ ବିଭାଗ । ଏଭଳି ବିଷାକ୍ତ ପାଣି ଯୋଗାଣ କରି ଲୋକଙ୍କ ଜୀବନ ସହ ଖେଳୁଛି ଜଳ ଯୋଗାଣ ବିଭାଗ ।
ହେଲେ ଅନ୍ୟ ପଟେ ଗ୍ରାମ୍ୟ ଜଳ ଯୋଗାଣ ବିଭାଗ ଲୋକଙ୍କୁ ଜଳ ବଦଳରେ ଜହର ଯୋଗାଣ କରି ନିରାପଦ ପାନୀୟ ଜଳ ଯୋଗାଣ କରାଯାଉଥିବା ନେଇ ଜିଲ୍ଲାପାଳଙ୍କୁ ଚିଠି କରୁଛନ୍ତି । ଯାହା କି ଗ୍ରାମ୍ୟ ଜଳ ଯୋଗାଣ ବିଭାଗର ମିଥ୍ୟା ତଥ୍ୟ ପ୍ରଦାନ ସାମ୍ନାକୁ ଆସିଛି । ଦାରିଙ୍ଗବାଡି ଗ୍ରାମ୍ୟ ଜଳ ଯୋଗାଣ ବିଭାଗର ସହକାରୀ ଯନ୍ତ୍ରୀ କ୍ଷୀରୋଦ ରାଉତଙ୍କ ରିପୋର୍ଟକୁ ଆଧାର କରି ଦାରିଙ୍ଗବାଡି ବିଡ଼ିଓ ସେପ୍ଟେମ୍ୱର ୧୨ ତାରିଖରେ ଜିଲ୍ଲାପାଳଙ୍କୁ ଜଳ ଯୋଗାଣ ସମ୍ପର୍କିତ ଏକ ଚିଠି (୪୨୦୮/୧୨.୦୯.୨୦୨୪) କରିଥିଲେ । ଦାରିଙ୍ଗବାଡି ବ୍ଲକ ଅଞ୍ଚଳବାସୀଙ୍କୁ ନିରାପଦ ପାନୀୟ ଜଳ ଯୋଗାଣ କରାଯାଉଥିବା ଚିଠିରେ ଉଲ୍ଲେଖ ରହିଥିଲା ।
ହେଲେ ଏବେ ବି ଅନେକ ପଞ୍ଚାୟତର ଲୋକେ ଜଳ ଯୋଗାଣ ପ୍ରକଳ୍ପ ଜରିଆରେ ଏବେ ବି ଗୋଳିଆ ପାଣି ପିଉଥିବା ବେଳେ ଗ୍ରାମ୍ୟ ଜଳ ଯୋଗାଣ ଚିଠି କହୁଛି ନିରାପଦ ପାନୀୟ ଜଳ । ମାଣ୍ଡିପଙ୍କାରେ ପରୀକ୍ଷା ହୋଇଥିବା ବେଳେ ଜଳରୁ ହାଇଡ୍ରୋଜେନ୍ ସଲଫାଏଡ଼ ବାହାରୁଛି । ଯାହାକି ଏକ ପ୍ରକାର ବିଷାକ୍ତ ପଦାର୍ଥ । ଏଣୁ ଭୁଲ୍ ତଥ୍ୟ ପ୍ରଦାନ କରିଥିବା ସହକାରୀ ଯନ୍ତ୍ରୀ କ୍ଷୀରୋଦ ରାଉତଙ୍କ ଉପରେ କଡା କାର୍ଯ୍ୟାନୁଷ୍ଠାନ ନେବାକୁ ଅଞ୍ଚଳବାସୀ ଦାବି କରିଥିବା ବେଳେ ଯଦି କାର୍ଯ୍ୟାନୁଷ୍ଠାନ ନହୁଏ, ତାହାଲେ ସହକାରୀ ଯନ୍ତ୍ରୀଙ୍କ ବିରୋଧରେ ଅନ୍ଦୋଳନ କରାଯିବ ବୋଲି ଅଞ୍ଚଳବାସୀ କହିଛନ୍ତି । ସ୍ବାସ୍ଥ୍ୟ ବିଭାଗ ପକ୍ଷରୁ ଦାରିଙ୍ଗବାଡି ବ୍ଲକର ସମସ୍ତ ଜଳ ଯୋଗାଣ ପ୍ରକଳ୍ପର ପାଣି ପରୀକ୍ଷା କରିବା ପାଇଁ ମଧ୍ୟ ଦାବି କରିଛନ୍ତି ଅଞ୍ଚଳବାସୀ ।
