ମୁମ୍ବାଇ,୧୨/୦୬: ବଜାର ନିୟାମକ ସେବି ନିବେଶକଙ୍କ ନିମନ୍ତେ ପେମେଣ୍ଟ୍ର ଏକ ନୂଆ ଏବଂ ସୁରକ୍ଷିତ ଉପାୟ ଆଣିବାକୁ ଯାଉଛି । ଏଥିରେ ସେବିରେ ପଞ୍ଜୀକୃତ ବ୍ରୋକରଙ୍କୁ ନିବେଶକଙ୍କଠାରୁ ପେମେଣ୍ଟ ନେବା ପାଇଁ ଏକ ସ୍ୱତନ୍ତ୍ର ୟୁପିଆଇ ଆଇଡି ଜାରି କରାଯିବ । ନୂଆ ସିଷ୍ଟମ୍ ସାହାଯ୍ୟରେ ନିବେଶକ ଭରସାଯୋଗ୍ୟ ସଂସ୍ଥାନକୁ ଚିହ୍ନଟ କରିପାରିବେ । ନୂଆ ୟୁପିଆଇ ପେମେଣ୍ଟ ସିଷ୍ଟମ୍ ୨୦୨୫ ଅକ୍ଟୋବର ପହିଲାରୁ ଲାଗୁ ହେବ ।
ସେବି ପଞ୍ଜୀକୃତ ସଂସ୍ଥାନଗୁଡ଼ିକୁ ଏକ ସ୍ୱତନ୍ତ୍ର ୟୁପିଆଇ ଆଇଡି ମିଳିବ । ଫଳରେ ନିବେଶକ ଜାଣିପାରିବେ ଯେ, ସେମାନେ ପ୍ରକୃତ ତଥା ପଞ୍ଜୀକୃତ କମ୍ପାନିକୁ ଟଙ୍କା ପଠାଉଛନ୍ତି । ଫଳରେ ଠକାମୀ କମିବ । ଏବେ ୟୁପିଆଇ ମାଧ୍ୟମରେ ସେୟାର ବଜାରରେ ଦିନକରେ ୨ ଲକ୍ଷ ଟଙ୍କା ପର୍ଯ୍ୟନ୍ତ ପେମେଣ୍ଟ ହୋଇପାରୁଛି । ବର୍ତ୍ତମାନ ସେବି ଏହାକୁ ବଢ଼ାଇ ୫ ଲକ୍ଷ ଟଙ୍କା କରିବାକୁ ଚାହୁଁଛି ।
ନୂଆ ନିୟମ ଅନ୍ତର୍ଗତ ଯେତେବେଳେ ଜଣେ ଏକ ପଞ୍ଜୀକୃତ କମ୍ପାନିକୁ ୟୁପିଆଇ ମାଧ୍ୟମରେ ଟଙ୍କା ପଠାଇବେ, ସେତେବେଳେ ଏକ ସବୁଜ ରଙ୍ଗର ‘ଥମ୍ପ୍ସ ଅପ୍’ ଚିହ୍ନ ଦେଖିବାକୁ ମିଳିବ । ଯଦି ଏହି ଚିହ୍ନ ନ ଥାଏ ତା’ହେଲେ କମ୍ପାନି ଠିକ୍ ନୁହେଁ । ସେବିର ଏହି ଯୋଜନାର ନାଁ ରହିଛି ‘ପେ-ରାଇଟ୍’ । ଏହାର ଉଦ୍ଦେଶ୍ୟ ହେଉଛି ନିବେଶକଙ୍କ ଭରସା ବଢ଼ାଇବା, ଯାହାଦ୍ୱାରା ସେମାନେ ବିନା ଭୟରେ ଟଙ୍କା ପଠାଇପାରିବେ।
