ଭୁବନେଶ୍ୱର,୦୭/୧୦: ବ୍ରହ୍ମପୁରର ବରିଷ୍ଠ ଆଇନଜୀବୀ ପୀତବାସ ପଣ୍ଡାଙ୍କୁ ହତ୍ୟାକୁ ନେଇ ରାଜ୍ୟ ବାର୍ କାଉନ୍ସିଲ ଉଦ୍ବେଗ ପ୍ରକାଶ କରିଛି । ସାରା ରାଜ୍ୟରେ ଆଇନଜୀବୀମାନେ ଆସନ୍ତା ୮ ତାରିଖକୁ ପ୍ରତିବାଦ ଦିବସ ଭାବେ ପାଳିବେ । ସେହିଦିନ ସାରା ରାଜ୍ୟରେ ଆଇନ୍ଜୀବୀମାନେ କାର୍ଯ୍ୟବନ୍ଦ ଆନ୍ଦୋଳନ କରିବେ ।
ପରିଷଦର ଅଧ୍ୟକ୍ଷ ଜ୍ଞାନ ରଞ୍ଜନ ମହାନ୍ତି କହିଛନ୍ତି, ଏହା କେବଳ ବ୍ୟକ୍ତିଗତ ସୁରକ୍ଷାର ବିଷୟ ନୁହେଁ । ଏହା ନ୍ୟାୟ, ଗଣତନ୍ତ୍ର ଏବଂ ରାଜ୍ୟର ପ୍ରତ୍ୟେକ ଆଇନଗତ ବୃତ୍ତିଗତଙ୍କ ସୁରକ୍ଷାର ପ୍ରଶ୍ନ । ଏହି ଘୃଣ୍ୟ କାର୍ଯ୍ୟ କେବଳ ଜଣେ ବ୍ୟକ୍ତିଙ୍କ ହତ୍ୟା ନୁହେଁ । ବରଂ ନ୍ୟାୟ ବ୍ୟବସ୍ଥା ଏବଂ ଆଇନର ଶାସନ ଉପରେ ସିଧାସଳଖ ଆକ୍ରମଣ । ଏପରି ବର୍ବର ହିଂସା ଏହି ଅଞ୍ଚଳର ଆଇନ ଶୃଙ୍ଖଳା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
ଶ୍ରୀ ମହାନ୍ତି କହିଛନ୍ତି, ଆମେ ଚୁପ୍ ରହିବୁ ନାହିଁ । ଓଡ଼ିଶାର ସମସ୍ତ ଓକିଲ ଏବଂ ଆଇନଗତ ସଦସ୍ୟମାନଙ୍କୁ ଆସନ୍ତା ୮ ତାରିଖ(ବୁଧବାର) ଦିନ କୋର୍ଟ କାର୍ଯ୍ୟରୁ ବିରତ ରହିବାକୁ ନିବେଦନ କରିଛୁ । ହତ୍ୟାକାଣ୍ଡରେ ସମ୍ପୃକ୍ତ ସମସ୍ତ ଦୋଷୀଙ୍କୁ ତୁରନ୍ତ ଗିରଫ କରାଯାଉ । ଆଇନଜୀବୀଙ୍କ ପାଇଁ ତୁରନ୍ତ ନ୍ୟାୟ ଏବଂ ସୁରକ୍ଷା ଦିଅ । ମୁଖ୍ୟମନ୍ତ୍ରୀ, ଗୃହ ସଚିବ, ଡିଜିପି ଓଡ଼ିଶା, ଡିଆଇଜି ଦକ୍ଷିଣ ରେଞ୍ଜ ଏବଂ ଏସପି ଗଞ୍ଜାମଙ୍କୁ ଶ୍ରୀ ମହାନ୍ତି ଅନୁରୋଧ କରିଛନ୍ତି । ନିଖିଳ ଓଡି଼ଶା ଆଇନଜୀବୀ ସଂଘ ରାଜ୍ୟ ସଭାପତି ବିଭୁପ୍ରସାଦ ତ୍ରିପାଠୀ ଏଭଳି ହତ୍ୟାକୁ ନେଇ ତୀବ୍ର ନିନ୍ଦା କରିଛନ୍ତି । ତୁରନ୍ତ ହତ୍ୟାକାରୀଙ୍କୁ ଗିରଫ କରି ଦଣ୍ଡ ଦେବାକୁ ସେ ଦାବି କରିଛନ୍ତି । ଆଜି ଶ୍ରୀ ମହାନ୍ତିଙ୍କ ନେତୃତ୍ୱରେ ଗୋଟିଏ ପ୍ରତିନିଧି ଦଳ ବ୍ରହ୍ମପୁର ଗସ୍ତ କରିବ ବୋଲି ଶ୍ରୀ ତ୍ରିପାଠୀ ସୂଚନା ଦେଇଛନ୍ତି ।
ସୂଚନାଯୋଗ୍ୟ, ସ୍ୱର୍ଗତ ପୀତବାସ ରାଜ୍ୟ ବାର୍ କାଉନ୍ସିଲର ନିର୍ବାଚିତ ସଭ୍ୟ ଥିଲେ ।
