ନୂଆଦିଲ୍ଲୀ, ୧୦/୦୧ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି କ୍ରମେ ସୁପ୍ରିମକୋର୍ଟ ୨୫ ବର୍ଷ ହେଲା ଉତ୍ତରାଖଣ୍ଡ ଜେଲରେ ବନ୍ଦୀ ଥିବା ଜଣେ କଏଦୀକୁ ମୁକ୍ତ କରିଛନ୍ତି । ୩ ଲୋକଙ୍କ ହତ୍ୟା ମାମଲାରେ ସେ ସଜା କାଟୁଥିଲା । ସର୍ବୋଚ୍ଚ ଅଦାଲତ ନିଜର ତଥା ରାଷ୍ଟ୍ରପତିଙ୍କ ନିଷ୍ପତ୍ତି ବଦଳାଇ ତାକୁ ମୁକ୍ତ କରିବା ଲାଗି ଆଦେଶ ଦେଇଛନ୍ତି ।
ଅଦାଲତ ନିଜ ରାୟରେ କହିଛନ୍ତି, ତଥ୍ୟ ଓ ପ୍ରମାଣରୁ ଜଣାପଡ଼ିଛି ଯେ ଜେଲରେ ବନ୍ଦ ଥିବା ଓମ୍ ପ୍ରକାଶ ୧୯୯୪ରେ ଅପରାଧ ଘଟାଇବା ସମୟରେ ନାବାଳକ ଥିଲା । ତା’ର ବୟସ ୧୪ ବର୍ଷ ଥିଲା । ବିଚାରପତି ଏମ୍ ଏମ୍ ସୁନ୍ଦରେଶ ଓ ଅରବିନ୍ଦ କୁମାରଙ୍କ ଖଣ୍ଡପୀଠ ନିଜ ରାୟରେ କହିଛନ୍ତି, ପ୍ରତ୍ୟେକ ସ୍ତରରେ ଓମ୍ ପ୍ରକାଶ ସହ ଅଦାଲତଗୁଡ଼ିକ ଦ୍ୱାରା ଅନ୍ୟାୟ କରାଯାଇଛି । ହୁଏତ ଦସ୍ତାବିଜଗୁଡ଼ିକୁ ଅଣଦେଖା କରାଯାଇ ଏହା ହୋଇଥାଇପାରେ । ଆବେଦନକାରୀ ନିରକ୍ଷର ହୋଇଥିଲେ ସୁଦ୍ଧା ନ୍ୟାୟ ପାଇବା ପାଇଁ ବାରମ୍ବାର ଅଦାଲତଙ୍କ ଦ୍ୱାରସ୍ଥ ହୋଇଛନ୍ତି । ସେ ୨୫ ବର୍ଷ ଧରି ଜେଲରେ ବନ୍ଦୀ ଜୀବନ ବିତାଇ ସାରିଥିବାରୁ ତାକୁ ତୁରନ୍ତ ମୁକ୍ତ କରାଯିବା ଆବଶ୍ୟକ । ଏହାବ୍ୟତୀତ ସୁପ୍ରିମକୋର୍ଟ ଉତ୍ତରାଖଣ୍ଡ ରାଜ୍ୟ ନ୍ୟାୟିକ ସେବା ପ୍ରାଧିକରଣକୁ ଓମ୍ ପ୍ରକାଶର ଥଇଥାନ ଲାଗି କେନ୍ଦ୍ର କିମ୍ବା ରାଜ୍ୟ ସରକାରଙ୍କ କୌଣସି କଲ୍ୟାଣକାରୀ ଯୋଜନାର ଲାଭ ଉଠାଇବାକୁ କହିଛନ୍ତି ।
ଜେଲରୁ ମୁକୁଳିବା ପରେ ସେ କିଭଳି ସମାଜରେ ସୁଚାରୁ ରୂପେ ପୁଣି ସମାନ ସୁବିଧାସୁଯୋଗ ପାଇବ, ତାହା ସୁନିଶ୍ଚିତ ଲାଗି କୁହାଯାଇଛି। ସମ୍ବିଧାନର ଧାରା ୨୧ ଅନୁସାରେ ନିଶ୍ଚିତ ନିଯୁକ୍ତି, ଆଶ୍ରୟ ଓ ଭରଣପୋଷଣ ଲାଗି ତା’ର ଅଧିକାର ଉପରେ ବିଶେଷ ଗୁରୁତ୍ୱ ଦେବାରେ ସକ୍ରିୟ ଭୂମିକା ନେବାକୁ ପ୍ରାଧିକରଣକୁ ନିର୍ଦ୍ଦେଶ ଦିଆଯାଇଛି ।
ଉଲ୍ଲେଖ ଯୋଗ୍ୟ , ୧୯୯୪ରେ ଡେରାଡୁନରେ ଜଣେ ପୂର୍ବତନ ସେନା ଅଧିକାରୀ ଓ ତାଙ୍କ ପରିବାରର ଅନ୍ୟ ଦୁଇଜଣଙ୍କୁ ହତ୍ୟା ମାମଲାରେ ଓମ୍ ପ୍ରକାଶକୁ ଦୋଷୀ ସାବ୍ୟସ୍ତ କରାଯାଇଥିଲା । ତାକୁ ଫାଶୀ ଦଣ୍ଡାଦେଶ ହୋଇଥିଲା । ଏହାପରେ ସେ ହାଇକୋର୍ଟ ଓ ପରେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇ ନାବାଳକ ହୋଇଥିବାରୁ ଦଣ୍ଡ କୋହଳ ପାଇଁ ଅନୁରୋଧ କରିଥିଲା । କିନ୍ତୁ ତାହା ଖାରଜ ହୋଇଯାଇଥିଲା । ଏହାପରେ ରିଟ୍ ପିଟିସନ ବି ଖାରଜ ହୋଇଥିଲା । ଶେଷରେ ରାଷ୍ଟ୍ରପତିଙ୍କ ନିକଟରେ ସେ ଗୁହାରି କରିଥିଲା । ୨୦୧୨ରେ ରାଷ୍ଟ୍ରପତି ତା’ର ମୃତ୍ୟୁ ଦଣ୍ଡକୁ ଆଜୀବନ କାରାଦଣ୍ଡରେ ପରିଣତ କରିଥିଲେ । ସର୍ତ୍ତ ଲଗାଇଥିଲେ ଯେ ୬୦ ବର୍ଷ ପୂରଣ ନ ହେବା ପର୍ଯ୍ୟନ୍ତ ସେ ଜେଲରୁ ବାହାରି ପାରିବ ନାହିଁ । ସୁପ୍ରିମକୋର୍ଟ ନିଜର ତଥା ରାଷ୍ଟ୍ରପତିଙ୍କ ଆଦେଶକୁ ବଦଳାଇ ଓମ୍ ପ୍ରକାଶକୁ ମୁକ୍ତ କରିଛନ୍ତି ।
