ନୂଆଦିଲ୍ଲୀ: ଆମେରିକାର ନବନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କଚ ଶୁଭେଚ୍ଛା ଜଣାଇ ଅଡ଼ୁଆରେ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସିରିଫ । ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ସରିଫ ନିକଟରେ ଡୋନାଲ୍ଡ ଟ୍ରମ୍ପଙ୍କୁ ସୋସିଆଲ ମିଡିଆ ଏକ୍ସରେ ଅଭିନନ୍ଦନ ଜଣାଇଥିଲେ । ଏହା ପରେ ପାକିସ୍ତାନରେ ବିବାଦ ଆରମ୍ଭ ହୋଇଯାଇଛି । ଏହାର କାରଣ ହେଉଛି ପାକିସ୍ତାନରେ ଏକ୍ସ ବ୍ୟାନ୍ ଥିବା ବେଳେ ଶେହବାଜ ସରିଫ ନିୟମ ଭଙ୍ଗ କରିଛନ୍ତି । ପ୍ରଧାନମନ୍ତ୍ରୀ ବ୍ୟାନ ହୋଇଥିବା ସୋସିଆଲ ମିଡିଆ ପ୍ଲାଟଫର୍ମକୁ କିଭଳି ବ୍ୟବହାର କରୁଛନ୍ତି ସେନେଇ ସାଧାରଣରେ ପ୍ରଶ୍ନ ଉଠିଛି ।
“ରାଷ୍ଟ୍ରପତି ନିର୍ବାଚନରେ ଡୋନାଲ୍ଚ ଟ୍ରମ୍ପଙ୍କ ଐତିହାସିକ ବିଜୟ ପାଇଁ ତାଙ୍କୁ ଚାରି ଆଡୁ ଅଭିନନ୍ଦନ । ପାକିସ୍ତାନ-ଆମେରିକାର ସହଭାଗିତାକୁ ଆହୁରି ମଜବୁତ ଓ ବ୍ୟାପକ କରିବା ନିମନ୍ତେ ମୁଁ ନୂତନ ପ୍ରଶାସନ ସହ କାର୍ଯ୍ୟ କରିବା ପାଇଁ ଇଚ୍ଛୁକ ଅଛି” ବୋଲି ଏକ୍ସରେ ପୋଷ୍ଟ କରିଛନ୍ତି ଶେହବାଜ ସରିଫ । ଶେହବାଜ ସରିଫ ପୋଷ୍ଟ ତଳେ ଏକ କମ୍ୟୁନିଟି ନୋଟ ମଧ୍ୟ ଆସିଛି । ଯେଉଁଥିରେ ଲେଖାଅଛି ଯେ, ପାକିସ୍ତାନର ପ୍ରଧାନମନ୍ତ୍ରୀ ଭିପିଏନ୍ (ଭର୍ଚୁଆଲ ପ୍ରାଇଭେଟ୍ ନେଟଓ୍ବର୍କ) ସାହାଯ୍ୟରେ ଏହି ପ୍ଲାଟଫର୍ମର ବ୍ୟବହାର କରୁଛନ୍ତି । ଏଭଳି କରି ପାକିସ୍ତାନରେ ଥିବା ନିୟମର ଉଲ୍ଳଂଘନ କରିଛନ୍ତି ପ୍ରଧାନମନ୍ତ୍ରୀ ।
ଚଳିତ ବର୍ଷ ଜାତୀୟ ସୁରକ୍ଷା କାରଣ ଦର୍ଶାଇ ଶେହବାଜ ସରିଫଙ୍କ ସରକାର ପାକିସ୍ତାନରେ ଏକ୍ସ ଉପରେ ବ୍ୟାନ ଲଗାଇଥିଲେ । କିନ୍ତୁ ଭିପିଏନ୍ ବ୍ୟବହାର କରି ଲୋକମାନେ ଏହି ପ୍ଲାଟଫର୍ମର ବ୍ୟବହାର କରୁଛନ୍ତି । ପାକିସ୍ତାନର ପ୍ରଧାନମନ୍ତ୍ରୀ ମଧ୍ୟ ଭିପିଏନ୍ ବ୍ୟବହାର କରୁଛନ୍ତି ବୋଲି ଚର୍ଚ୍ଚା ଆରମ୍ଭ ହୋଇଯାଇଛି । କିନ୍ତୁ ପାକିସ୍ତାନରେ ଭିପିଏନର ବ୍ୟବହାର କରିବା ବେଆଇନ ଏବଂ ନିୟମର ଉଲ୍ଲଂଘନ କଲେ ଦଣ୍ଡର ବ୍ୟବସ୍ଥା ମଧ୍ୟ ରହିଛି । ଏବେ ପ୍ରଶ୍ନ ଯେ, ଖୋଦ ପ୍ରଧାନମନ୍ତ୍ରୀ ନିୟମର ଉଲ୍ଲଂଘନ କରିଥିବା ବେଳେ ତାଙ୍କୁ ଦଣ୍ଡ ମିଳିବ କି ନାହିଁ ?
ସୋସିଆଲ ମିଡିଆ ଏକ୍ସର ମାଲିକ ହେଉଛନ୍ତି ଆମେରିକୀୟ ଉଦ୍ୟୋଗପତି ଏଲନ ମସ୍କ । ରାଷ୍ଟ୍ରପତି ନିର୍ବାଚନରେ ଟ୍ରମ୍ପଙ୍କୁ ମସ୍କ ସମର୍ଥନ କରିବା ସହ ତାଙ୍କ ନିମନ୍ତେ ଖୋଲାଖୋଲି ଭାବେ ପ୍ରଚାର କରିଥିଲେ । ଟ୍ରମ୍ପ ନିର୍ବାଚନରେ ବିଜୟୀ ହୋଇଥିବାରୁ ବର୍ତ୍ତମାନ ସମୟରେ ଆମେରିକାର ପ୍ରଭାବଶାଳୀ ଲୋକଙ୍କ ମଧ୍ୟରେ ମସ୍କ ଆଗରେ ରହିଛନ୍ତି । ଟ୍ରମ୍ପଙ୍କ ସହ ସେ ମଧ୍ୟ ଅନେକ ରାଷ୍ଟ୍ରାଧ୍ୟକ୍ଷଙ୍କ ସହ ଫୋନ ଯୋଗେ କଥାବାର୍ତ୍ତା ହୋଇଛନ୍ତି ।
