ଖଲ୍ଲିକୋଟ,୮/୩ : ବିବାହ ଶୋଭାଯାତ୍ରାରେ ପୂର୍ବ ଶତ୍ରୁତାକୁ ନେଇ ଛୁରାମାଡ଼ । ଏଭଳି ଏକ ଅଭାବନୀୟ ଘଟଣା ଘଟିଛି ଖଲ୍ଲିକୋଟ ଥାନା ଅଞ୍ଚଳରେ । ବରଯାତ୍ରୀମାନେ ଡିଜେ ଗୀତର ତାଳେ ତାଳେ ନାଚି ନାଚି ଯାଉଥିଲେ। ଏହି ସମୟରେ ସେମାନଙ୍କ ଭିତରେ ଆରମ୍ଭ ହୋଇଗଲା ମାରପିଟ। ଏପରିକି ଜଣେ ଯୁବକକୁ ଛୁରାମାଡ଼ ମଧ୍ୟ ହୋଇଥିଲା। ଗୁରୁତର ଯୁବକଙ୍କୁ ଚିକିତ୍ସା ପାଇଁ ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା।
ପ୍ରକାଶ ଯେ, , ଖଲ୍ଲିକୋଟ ଥାନା ଅନ୍ତର୍ଗତ ଚଣ୍ଡୀପୀଠ ଗ୍ରାମର ରାଜ ସାସମଲଙ୍କ ବିବାହ ବିକ୍ରମପୁରର ଗୋଟିଏ ଝିଅ ସହ ହେଉଥିଲା। ବିକ୍ରମପୁର ଗ୍ରାମର ପାଟଣା ସାହି ଏବଂ ଓଡ଼ିଆ ସାହିର କିଛି ଯୁବକ କନ୍ୟାକୁ ନେଇ ଚଣ୍ଡୀପୀଠ ଗ୍ରାମକୁ ଯାଇଥିଲେ। ବରପକ୍ଷର ନିମନ୍ତ୍ରଣ କ୍ରମେ ସମସ୍ତେ ଶୋଭାଯାତ୍ରାରେ ସାମିଲ ହୋଇଥିଲେ। ଡିଜେ ଗୀତର ତାଳେ ତାଳେ ନାଚି ନାଚି ଯାଉଥିବାବେଳେ ହଠାତ ପରସ୍ପର ଉପରେ ଆକ୍ରମଣ କରିବା ଆରମ୍ଭ କରିଦେଲେ। ଅନିଲ ପରିଡ଼ା ନାମକ ଜଣେ ଯୁବକକୁ ଛୁରାମାଡ଼ ହୋଇଥିଲା। ଅନିଲଙ୍କ ପିଠିରେ ଛୁରାମାଡ଼ ହୋଇଛି।
ଧସ୍ତାଧସ୍ତି ମଧ୍ୟରେ ପ୍ରାୟ ୪ଜଣ ଆହତ ହୋଇଥିବା ଜଣାପଡ଼ିଛି। ଏହି ଘଟଣା ପରେ ଡିଜେ ବନ୍ଦ କରି ଚାଲି ଯାଇଥିବା ବେଳେ ବର ବିବାହ କରିବାକୁ ବେଦୀକୁ ଯାଇଥିଲା। ଏପଟେ ଆହତମାନଙ୍କୁ ଶୁକ୍ରବାର ବିଳମ୍ବିତ ରାତିରେ ଚିକିତ୍ସା ପାଇଁ ଖଲ୍ଲିକୋଟ ମେଡିକାଲରେ ଭର୍ତ୍ତି କରାଯାଇଥିଲା।ଖବରପାଇ ଖଲ୍ଲିକୋଟ ଆଇଆଇସି ରମେଶ ପ୍ରଧାନଙ୍କ ନେତୃତ୍ୱରେ ପୋଲିସ ଟିମ୍ ଚଣ୍ଡୀପୀଠ ଗ୍ରାମରେ ପହଂଚି ତଦନ୍ତ କରିଛି । ତେବେ ପାଟଣା ସାହି ଏବଂ ଓଡ଼ିଆ ସାହି ମଧ୍ୟରେ ପୂର୍ବରୁ ଶତ୍ରୁତା ଲାଗି ରହିଥିବାବେଳେ ସମ୍ଭବତଃ ଏଥିପାଇଁ ଏଭଳି ଘଟଣା ଘଟିଥାଇ ପାରେ ବୋଲି ସନ୍ଦେହ କରୁଛି ପୋଲିସ।
