ନୂଆଦିଲ୍ଲୀ, ୧୮।୩: ପୁରୁଣା ହେଲା ଔଷଧ ଖାଇବା ପ୍ରଣାଳୀ । ଏବେ ରୋଗୀଙ୍କୁ ବଟିକା ଚୋବେଇ ଖାଇବା କିମ୍ୱା ଗିଳିବା ଭଳି ସମସ୍ୟା ସାମନା କରିବାକୁ ପଡ଼ିବନି । ଆସିଗଲା ଭିଟାମିନ୍ ପ୍ୟାଚ୍ । ପାରମ୍ପରିକ ଭିଟାମିନ୍ ସପ୍ଲିମେଣ୍ଟ ତୁଳନାରେ ଆଜିକାଲି ଭିଟାମିନ୍ ପ୍ୟାଚ୍ର ଚାହିଦା ବେଶି । ଏହାର ବ୍ୟବହାର ସହଜ ହୋଇଥିବା ବେଳେ ଔଷଧ ଗିଳିବା ସମସ୍ୟା ରୋଗୀଙ୍କୁ ସାମନା କରିବାକୁ ପଡ଼ିନଥାଏ । ଏହି ଭିଟାମିନ୍ ଦେଖିବାକୁ ଷ୍ଟିକର ଭଳି । ଏହାକୁ ବାହୁ, ଜଙ୍ଘରେ ଲଗାଇପାରିବେ । ସେହିପରି ଏହି ଷ୍ଟିକରରେ ସାମଗ୍ରୀ ଜେଲି ଭଳି ରହିଥାଏ । ଯାହାକୁ ତ୍ୱଚାରେ ଲଗାଇବା ଦ୍ୱାରା ଏହା ତାହାକୁ ଅବଶୋଷିତ କରିଥାଏ । ଏହି ପ୍ୟାଚ୍କୁ ତ୍ୱଚାରେ ବ୍ୟବହାର କରିବା ଦ୍ୱାରା ବଟିକା ଖାଇବାର ଆବଶ୍ୟକତା ନାହିଁ ।
ବିଶେଷ କରି ବଟିକା ଗିଳିବାରେ ସମସ୍ୟା ସାମନା କରୁଥିବା ରୋଗୀଙ୍କ ପାଇଁ ଭିଟାମିନ୍ ପ୍ୟାଚ୍ ବ୍ୟବହାର ଖୁବ୍ ସହଜ ଓ ସୁବିଧା । ସେହିପରି ହଜମ ସମସ୍ୟା ଥିବା ରୋଗୀଙ୍କ ପାଇଁ ଏହା ଲାଭକାରୀ । ବିଶେଷ କରି ଗ୍ୟାଷ୍ଟ୍ରିକ୍ ରୋଗୀଙ୍କ ପାଇଁ ଏହା ଭିଟାମିନର ଏକ ଉତ୍ତମ ବିକଳ୍ପ । ଏହି ଭିଟାମିନ ପ୍ୟାଚ୍ ପାଚନ ପ୍ରଣାଳୀକୁ ଠିକ୍ କରେ ଓ ରକ୍ତପ୍ରବାହରେ ସିଧାସଳଖ ଭିଟାମିନ୍ ଏବଂ ଖଣିଜ ପଦାର୍ଥ ତ୍ୱଚା ମାଧ୍ୟମରେ ପହଞ୍ଚାଉଥିବା ଦାବି କରାଯାଉଛି । ଭିଟାମିନ୍ ତ୍ୱଟାର ବାହ୍ୟ ପରସ୍ତ ଦେଇ ପାସ୍ କରୁଥିବା ବେଳେ କୋଷିକା ମାଧ୍ୟମରେ ରକ୍ତରେ ଏହା ବ୍ୟାପିଥାଏ । ଏହା କିଛି ଘଣ୍ଟା ପର୍ଯ୍ୟନ୍ତ ପୋଷକ ତତ୍ତ୍ୱକୁ ନିୟନ୍ତ୍ରିତ କରିଥାଏ ।
ଅନ୍ୟପକ୍ଷରେ ଔଷଧ ତଥା ଅନ୍ୟ ସପ୍ଲିମେଣ୍ଟ ତୁଳନାରେ ଭିଟାମିନ୍ ଭଲଭାବେ କାମ କରୁଥିବା ଗବେଷଣାରୁ ଜଣାପଡ଼ିଛି । ଅନ୍ୟପଟେ ଏହାର ଭଲ ଦିଗ ରହିଥିବା ବେଳେ ଖରାପ ଦିଗ ବି ଅଛି । ଭଟାମିନ୍ ପ୍ୟାଚ୍ ମହଙ୍ଗା ହୋଇଥିବା ବେଳେ ତ୍ୱଚା ଜନିତ ସମସ୍ୟା ବି ସୃଷ୍ଟି ହୋଇପାରେ । ଏଥିରେ ତ୍ୱଚା ନାଲି ପଡ଼ିବା ତଥା ପୋଡ଼ାଜଳା ହେବା ଆଜି ସମସ୍ୟା ଦେଖାଦେଇପାରେ । ଏଣୁ ଏହାକୁ ବ୍ୟବହାର କରିବା ପୂର୍ବରୁ ସ୍ୱାସ୍ଥ୍ୟ ବିଶେଷଜ୍ଞଙ୍କ ପରାମର୍ଶ ନେବା ଜରୁରୀ ।
