ଆନନ୍ଦପୁର,୦୬/୦୧: ଆନନ୍ଦପୁର ଦେଇ ଯାଇଥିବା ୨୦ ନମ୍ୱର ଜାତୀୟ ରାଜପଥର ଆନନ୍ଦପୁର ଅଞ୍ଚଳ ଅଧିନ ରାସ୍ତା ପାଲଟିଛି ମରଣ ଜନ୍ତା । ଅସମ୍ପୂର୍ଣ୍ଣ ରାସ୍ତା ଯୋଗୁଁ ନିୟମିତ ଭାବେ ଦୁର୍ଘଟଣା ଘଟି ମୁଣ୍ଡ ଗଡୁଛି । ଏହାର ପ୍ରତିବାଦ କରି ଅସମ୍ପୂର୍ଣ୍ଣ ଜାତୀୟ ରାଜପଥକୁ ତୁରନ୍ତ ସମ୍ପୂର୍ଣ୍ଣ କରିବା ଦାବିରେ ଧାରଣା ଦେଇଛି ଧନେଇ ସେବା ସଂଘ ।
ସୂଚନା ମୁତାବକ, ରାସ୍ତା କାମ ସରିଯାଇଥିବା ଦର୍ଶାଇ ଜାତୀୟ ରାଜପଥ କର୍ତ୍ତୃପକ୍ଷ ଦୀର୍ଘ ୧୦ ବର୍ଷ ହେବ ଏହି ରାସ୍ତାରୁ ଟୋଲ୍ ଆଦାୟ କରୁଛନ୍ତି । ହେଲେ ଆଜି ଯାଏଁ ସରିଲାନି ରାସ୍ତା କାମ । ଟେଣ୍ଡର ମାଧ୍ୟମରେ ବଡ଼ ଠିକା ସଂସ୍ଥା କାମ ନେଉଛନ୍ତି । ଏହାପରେ କାମକୁ ଭାଗ ଭାଗ କରି ଛୋଟ ଛୋଟ ଠିକାଦାରଙ୍କୁ ଦେଇ ପୁରା ହେଉଛି । ଯାହା ଫଳରେ ଏଭଳି ପରିସ୍ଥିତି ଉପୁଜୁଥିବାର ଅଭିଯୋଗ ହୋଇଛି । ଜାତୀୟ ରାଜପଥ କର୍ତ୍ତୃପକ୍ଷଙ୍କ ଏହି କାମକୁ ବିରୋଧ କରିଛନ୍ତି ସ୍ଥାନୀୟ ଲୋକେ । ଅସମ୍ପୂର୍ଣ୍ଣ ରାସ୍ତାକୁ ତୁରନ୍ତ ସମ୍ପୂର୍ଣ୍ଣ କରିବା ଦାବି ନେଇ ଧନେଇ ସେବା ସଂଘ ତରଫରୁ ଶାଳପଡ଼ା ଓଭର ବ୍ରିଜ୍ ତଳେ ଗଣଧାରଣା ହୋଇଛି । ଆଗାମୀ ୭ ଦିନ ମଧ୍ୟରେ ଯଦି ଏହାର ସମାଧାନ ନହୁଏ, ତେବେ ଜାତୀୟ ରାଜପଥକୁ ପୁରା ବନ୍ଦ କରିବାକୁ ସଂଘ ଚେତାବନୀ ଦିଆଯାଇଛି ।
