ମାଲକାନଗିରି/କୋରକୁଣ୍ଡା,୧୬।୩ (ଆପ୍ର ): ମାଲକାନଗିରି ଜିଲ୍ଲା କୋରୁକୋଣ୍ଡା ବ୍ଲକ ନିଳାକାମ୍ବେରୁ ପଞ୍ଚାୟତ ସୋର୍ଲୁକୋଣ୍ଡା ଗ୍ରାମର ଏକ ଜମିରୁ ଜଣେ ନାବାଳକ ମୃତଦେହ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଛି। ମୃତ ନାବାଳକ ଜଣକ ସେହି ଗ୍ରାମର ପ୍ରଶାନ୍ତ ମାଡକାମି।
ନିଳାକାମ୍ବେରୁ ପଞ୍ଚାୟତ ସୋର୍ଲୁକୋଣ୍ଡା ଗ୍ରାମର ଏକ ଜମିରୁ ପ୍ରଶାନ୍ତ ମାଡକାମିଙ୍କ ମୃତ ଦେହ ଆମ୍ବ ଗଛରେ ଝୁଲୁଥିବା ଗ୍ରାମବାସୀ ଦେଖିଥିଲେ। ଏ ନେଇ ଗ୍ରାମବାସୀ ସଙ୍ଗେ ସଙ୍ଗେ ଓରକେଲ ଥାନା ପୋଲିସକୁ ଜଣାଇଥିଲେ। ଓର୍କେଲ ପୋଲିସ ଘଟଣା ସ୍ଥଳରେ ପହଞ୍ଚି ନାବାଳକର ମୃତ ଦେହ ଜବତ କରିଛି। ତେବେ ସାଇଣ୍ଟିଫିକ ଟିମ ଆସି ଘଟଣାର ସମ୍ପୂର୍ଣ ତଦନ୍ତ କରିବା ସହ ଶବ ବ୍ୟବଚ୍ଛେଦ ପରେ ପରିବାରବର୍ଗ କୁ ହସ୍ତାନ୍ତର କରାଯାଇଥିବା ଥାନାଧିକାରୀ ଧୀରେନ ପଟ୍ଟନାୟକ ସୂଚନା ଦେଇଛନ୍ତି। ଅପର ପକ୍ଷରେ ମୃତ ଛାତ୍ରଙ୍କ ପରିବାର ଲୋକେ ଏହାକୁ ଏକ ହତ୍ୟାକାଣ୍ଡ ବୋଲି ଅଭିଯୋଗ କରିବା ସହ ଘଟଣାର ଉଚ୍ଚସ୍ତରୀୟ ତଦନ୍ତ ପାଇଁ ଦାବି କରିଛନ୍ତି। ତେବେ ଏହି ନାବାଳକ ଗତ କିଛି ଦିନ ତଳେ ଦଶମ ପରୀକ୍ଷା ଦେଇଛି।
