ନୂଆଦିଲ୍ଲୀ: ପ୍ରାୟ ୯ ମାସ ପରେ ମହାକାଶଚାରୀ ସୁନିତା ୱିଲିୟମ୍ସ ଏବଂ ବୁଚ୍ ୱିଲମୋର ମହାକାଶରୁ ପୃଥିବୀକୁ ଫେରି ଆସୁଛନ୍ତି। ଶେଷରେ, ସେମାନେ ମାର୍ଚ୍ଚ ୧୯ ତାରିଖରେ ସ୍ପେସଏକ୍ସର ଡ୍ରାଗନ ମହାକାଶଯାନ ମାଧ୍ୟମରେ ପୃଥିବୀକୁ ଫେରିବାକୁ ଯାଉଛନ୍ତି।ମହାକାଶରେ ୯ ମାସ ବିତାଇବା ପରେ ଏବେ ସବୁଠାରୁ ବଡ଼ ପ୍ରଶ୍ନ ଉଠୁଛି ଯେ, ଏହି ଲମ୍ବା ମିଶନ ପାଇଁ NASA ସେମାନଙ୍କୁ କିଛି ଅତିରିକ୍ତ ଦେୟ ଦେବ କି ? ଏବେ ଆସନ୍ତୁ ଜାଣିବା ଏ ବାବଦରେ….

ସୁନିତା ୱିଲିୟମ୍ସ ଏବେ ମହାକାଶରୁ ଫେରି ଆସୁଛନ୍ତି। ଆଠ ଦିନ ପାଇଁ ମହାକାଶକୁ ଯାଇଥିବା ସୁନିତା ୱିଲିୟମ୍ସ ଏବଂ ବୁଚ୍ ୱିଲମୋର ୯ ମାସ ଧରି ସେଠାରେ ଫସି ରହିଛନ୍ତି । ଯାନ୍ତ୍ରିକ ତୃଟି ଯୋଗୁଁ ତାଙ୍କର ପ୍ରତ୍ୟାବର୍ତ୍ତନ କ୍ରମାଗତ ଭାବରେ ସ୍ଥଗିତ ରଖାଯାଇଥିଲା, କିନ୍ତୁ ବର୍ତ୍ତମାନ ତାଙ୍କ ପ୍ରତ୍ୟାବର୍ତ୍ତନ ପାଇଁ ପ୍ରସ୍ତୁତି ସମାପ୍ତ ହୋଇଛି। ସେ ଶେଷରେ ମଙ୍ଗଳବାର ସନ୍ଧ୍ୟା ପ୍ରାୟ ୫:୫୭ ରେ (ଭାରତରେ ବୁଧବାର, ମାର୍ଚ୍ଚ ୧୯ ସକାଳ ଭୋର୍ ୩:୨୭) ସ୍ପେସଏକ୍ସ ଡ୍ରାଗନ ମହାକାଶଯାନରେ ପୃଥିବୀକୁ ଫେରିବାକୁ ଯାଉଛନ୍ତି। ଆଉ ଏହି ସମୟରେ ଅନେକ ଲୋକଙ୍କ ମନରେ ଏହି ପ୍ରଶ୍ନ ଉଠୁଛି ଯେ ୯ ମାସ ପାଇଁ ମହାକାଶରେ କାମ କରିବା ପାଇଁ ନାସା ସେମାନଙ୍କୁ କେତେ ଦରମା ଦେବ ?

ନାସା ମହାକାଶଚାରୀଙ୍କ ଦରମା GS-15 ଅଧୀନରେ ଆସେ, ଯାହା ଆମେରିକାର ବରିଷ୍ଠ ସରକାରୀ ଅଧିକାରୀ ମାନଙ୍କୁ ଦିଆଯାଏ। ଏହି ଅନୁସାରେ, ସୁନିତା ୱିଲିୟମ୍ସ ତାଙ୍କର ୯ ମାସର ଦୀର୍ଘ ମିଶନ ପାଇଁ ପ୍ରାୟ ୮୧ ଲକ୍ଷ ଟଙ୍କାରୁ ୧.୦୫ କୋଟି ଟଙ୍କା ପର୍ଯ୍ୟନ୍ତ ଦରମା ପାଇବେ। ଏହା ବ୍ୟତୀତ, ନାସା ମହାକାଶଚାରୀ ମାନଙ୍କୁ ଆନୁଷଙ୍ଗିକ ଭତ୍ତା ଭାବରେ କେବଳ ୪ ଡଲାର ଅର୍ଥାତ୍ ପ୍ରତିଦିନ ୩୪୭ ଟଙ୍କା ଦିଏ। ଏହିପରି ଭାବରେ, ସେ ୨୮୭ ଦିନ ପାଇଁ ପ୍ରାୟ ୧ ଲକ୍ଷ ଟଙ୍କାର ଅତିରିକ୍ତ ଦେୟ ପାଇବେ। ଏହି ପରିମାଣ ଯେକୌଣସି ବ୍ୟକ୍ତିଙ୍କ ପାଇଁ ଆଶ୍ଚର୍ଯ୍ୟଜନକ ହୋଇପାରେ। ତେବେ ୯ ମାସ ଧରି ମହାକାଶରେ ରହିବା ଏବଂ ବିପଦକୁ ମୁଣ୍ଡାଇବା ପରେ ବି ସେ ଜଣେ ସାଧାରଣ ଲୋକ ଭଳି ଭତ୍ତା ପାଇବେ, ଯାହାକି ଜଣେ ଜଣେ ସାଧାରଣ ବ୍ୟକ୍ତି ତାଙ୍କ ମଧ୍ୟାହ୍ନ ଭୋଜନରେ ଖର୍ଚ୍ଚ କରୁଥିବା ଟଙ୍କା ସହ ସମାନ। ଏହା ମଧ୍ୟ କୁହାଯାଉଛି ଯେ, ଏହି ଟଙ୍କାରେ ସେ ପୃଥିବୀରେ କୌଣସି ରେଷ୍ଟୁରାଣ୍ଟରେ ଏକ ବିଳାସୁପୂର୍ଣ୍ଣ ଖାଦ୍ୟ ଥାଳି ଖାଇବାକୁ ମଧ୍ୟ ସମ୍ଭବ ହେବେ ନାହିଁ ।