ନୂଆଦିଲ୍ଲୀ, ୦୭/୦୮: ଜଷ୍ଟିସ୍ ଯଶୱନ୍ତ ବର୍ମାଙ୍କୁ ‘ସୁପ୍ରିମ୍’ ଶକ୍ତ ଝଟକା। ଜଷ୍ଟିସ୍ ବର୍ମାଙ୍କ ଆବେଦନକୁ ଖାରଜ କଲେ ସୁପ୍ରିମକୋର୍ଟ । ଯାଞ୍ଚ କମିଟି ରିପୋର୍ଟ ଏବଂ ପ୍ରଧାନ ବିଚାରପତିଙ୍କ ଦ୍ବାରା ତତ୍କାଳ ମହାଭିଯୋଗ ସୁପାରିସକୁ ସର୍ବୋଚ୍ଚ ଅଦାଲତରେ ଚ୍ୟାଲେଞ୍ଜ କରିଥିଲେ ଜଷ୍ଟିସ୍ ବର୍ମା । ହେଲେ ସୁପ୍ରିମକୋର୍ଟ ଏହି ଚ୍ୟାଲେଞ୍ଜ ଆବେଦନକୁ ଖାରଜ୍ କରିଛନ୍ତି । ଜଷ୍ଟିସ୍ ଦୀପଙ୍କର ଦତ୍ତ ଏବଂ ଜଷ୍ଟିସ୍ ଏଜି ମସିହଙ୍କ ଦୁଇ ଜଣିଆ ଖଣ୍ଡପୀଠ ଜଷ୍ଟିସ୍ ବର୍ମାଙ୍କ ଆଚରଣ ବିଶ୍ବାସ ଯୋଗ୍ୟ ନୁହେଁ କହି ଅଦାଲତ ବିଚାର କରିବାକୁ ମନା କରି ଦେଇଛନ୍ତି ।
ସୂଚନାଥାଉକି, ମାର୍ଚ୍ଚ ୧୪ ତାରିଖ ହୋଲି ଦିନ ରାତି ପ୍ରାୟ ୧୧.୩୫ ସମୟରେ ଜଷ୍ଟିସ୍ ବର୍ମାଙ୍କ ସରକାରୀ ବାସଭବନରେ ନିଆଁ ଲାଗିଯାଇଥିଲା। ଏହି ସମୟରେ ସେ ଦିଲ୍ଲୀ ବାହାରେ ଥିଲେ। ପରିବାର ସଦସ୍ୟମାନେ ନିଆଁ ଲିଭାଇବାକୁ ଅଗ୍ନିଶମ ବାହିନୀକୁ ସୂଚନା ଦେଇଥିଲେ । ଅଗ୍ନିଶମ ବାହିନୀ ନିଆଁ ଆୟତ୍ତ କରିଥିଲା । ଏତିକି ବେଳେ ତାଙ୍କ ଘରୁ ବହୁ ପରିମାଣ ବିଡ଼ା ବିଡ଼ା ନୋଟ୍ ମିଳିଥିବାର ଅଭିଯୋଗ ଆସିଥିଲା । କୁହାଯାଉଛି, ଜଷ୍ଟିସ୍ ବର୍ମାଙ୍କ ଏକ କଠୋରୀରେ ନୋଟ୍ ଭର୍ତ୍ତି ହୋଇଥିଲା । ଏହା ପରେ ମାର୍ଚ୍ଚ ୨୦ ତାରିଖରେ ପ୍ରଧାନ ବିଚାରପତି ଜଷ୍ଟିସ୍ ସଞ୍ଜୀବ ଖାନ୍ନା କଲେଜିୟମ ଡାକିଥିଲେ । ଏହି ବୈଠକରେ ଜଷ୍ଟିସ୍ ବର୍ମାଙ୍କୁ ଆହ୍ଲାବାଦ ହାଇକୋର୍ଟଙ୍କୁ ବଦଳି ପାଇଁ ପ୍ରସ୍ତାବ ଅନୁମୋଦନ ହୋଇଥିଲା । ଏହାସହିତ ଦିଲ୍ଲୀ ହାଇକୋର୍ଟଙ୍କୁ ମାମଲାର ଯାଞ୍ଚ ଭାର ଦିଆଯାଇଥିଲା । ତେବେ ଏହି ଯାଞ୍ଚ ରିପୋର୍ଟ ଆଧାରରେ ଜଷ୍ଟିସ୍ ବର୍ମାଙ୍କ ବିରୋଧରେ ତତ୍କାଳ ନିଷ୍ପତ୍ତି ନିଆଯିବ । ହେଲେ ଏହି ମାମଲାରେ ଏକ ନୂଆ ଟୁଇଷ୍ଟ ସାମ୍ନାକୁ ଆସିଛି । ଦିଲ୍ଲୀ ଅଗ୍ନିଶମ ବିଭାଗର ମୁଖ୍ୟ ଅତୁଲ ଗର୍ଗ ଦାବି କରିଛନ୍ତି ଯେ ଜଷ୍ଟିସ୍ ଯଶଓ୍ବାନ୍ତ ବର୍ମାଙ୍କ ବାସଭବନରୁ ଅଗ୍ନିଶମ କର୍ମଚାରୀଙ୍କୁ କୌଣସି ନଗଦ ଟଙ୍କା ମିଳିନାହିଁ ।..
