ନବରଙ୍ଗପୁର,୨୬/୬ : ପାପାଡ଼ାହାଣ୍ଡି ବ୍ଲକ ଜଟାବାଲ ନିକଟ ନିର୍ମାଣଧିନ ପୋଲର ଡାଇଭର୍ସନ ପୋଲ ଲଗାଣ ବର୍ଷା ଯୋଗୁଁ ଧୋଇଗଲା। ଡାଇଭର୍ସନ ପୋଲ ଧୋଇଗଲା ପରେ ପାପଡ଼ାହାଣ୍ଡି- ଉମରକୋଟ ୩୯ ନଂ ରାଜ୍ୟ ରାଜପଥ ଦେଇ ଯାତାୟତ ଠପ୍ ହୋଇଯାଇଛି । ଏଥିପାଇଁ ଦୀର୍ଘ ଘଣ୍ଟା ଧରି ଶତାଧିକ ଯାନ ବାହାନ ଦୁଇ ପାର୍ଶ୍ଵରେ ଅଟକି ରହିଥିଲା । ଶେଷକୁ ଜଳସ୍ତର କମିଲା ବେଳକୁ ଡାଇଭର୍ସନ ପୋଲ ଗୋଟିଏ ପଟେ ଧୋଇଯାଇଥିଲା ।
ଅନ୍ୟ ଦୁଇଟି ରାସ୍ତା ଦେଇ ଜନସାଧାରଣ ଓ ଯାନ ବାହାନ ଯାତାୟତ କରିଥିଲା। ଅନ୍ୟପକ୍ଷରେ ଜିଲ୍ଲା ସ୍ତରୀୟ ଦିଶା ବୈଠକରେ ଡାଇଭର୍ସନ ପୋଲ ଉପରେ ପାଣିକୁ ନେଇ ଲୋକ ପ୍ରତିନିଧ ଉଦବେଗ ପ୍ରକାଶ କରିଥିଲେ । ଡାଇଭର୍ସନ ପୋଲଟି ଉଚ୍ଚତା ବଢାଇବାକୁ ନବରଙ୍ଗପୁର ସାଂସଦ ବଳଭଦ୍ର ମାଝୀ ନିର୍ଦ୍ଦେଶ ଦେଇଛନ୍ତି । ପୋଲ ଉପରେ ପାଣି ଚାଲିଥିବା ଯୋଗୁଁ ଅନ୍ୟ ରାସ୍ତା ଦେଇ ଖୋଦ୍ ବୈଠକକୁ ଆସିଥିବା କହିଛନ୍ତି। ତେଣୁ ଏହି ପୋଲର ଡାଇଭର୍ସନ ରାସ୍ତାର ଉଚ୍ଚତା ବୃଦ୍ଧି କରିବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି।
ସେହିଭଳି ଡାଇଭର୍ସନ ପୋଲ ଧୋଇଯିବା ଯୋଗୁଁ ଶତାଧିକ ଯାନବାହାନ ଅଟକି ରହିଥିଲା । ପରେ ଉମରକୋଟ ଅଭିମୁଖେ ଯାଉଥିବା ଯାନବାହାନକୁ ପାପଡ଼ାହାଣ୍ଡିଠାରୁ ମୈଦଲପୁର ଡାବୁଗାଁ ଦେଇ ଉମରକୋଟ ୩୯ ନଂ ରାଜ୍ୟ ରାଜପଥ ଦେଇ ଉମରକୋଟ ଯିବାକୁ ପଡ଼ିଥିଲା । ସେହିଭଳି ଅନ୍ୟ ଏକ ରାସ୍ତା ପାପଡ଼ାହାଣ୍ଡିଠାରୁ ମକିଆ ଦେଇ ବାରିଗୁଡ଼ା ଛକ ଦେଇ ଜଟାବାଲକୁ ବାହାରି ଉମରକୋଟ ୩୯ନଂ ରାଜ୍ୟ ରାଜପଥ ଦେଇ ଉମରକୋଟ ଯାତାୟାତ କରିବାକୁ ପଡ଼ିଥିଲା। ସେହିଭଳି ଜରୁରୀକାଳନ ବିଭାଗର ଅଧିକାରୀମାନେ ପହଞ୍ଚି ନିର୍ମାଣଧିନ ପୋଲ ନିକଟରେ ରାସ୍ତା ବନ୍ଦ ଥିବା ନେଇ ସତର୍କ ସୂଚନା ଲଗାଇଥିଲେ। ଅନ୍ୟ ଦୁଇଟି ଡାଇଭର୍ସନ ରାସ୍ତା ଥିବା ନେଇ ଜନସାଧାରଣଙ୍କୁ ଅବଗତ କରିଛନ୍ତି।
