ଇସ୍ଲାମାବାଦ, ୧୦/୦୭ : ପାକିସ୍ତାନ ରାଜନୀତିରେ ଏବେ ଜୋରଦାର ହଲ୍ଚଲ୍ ଚାଲିଛି। ଦେଶରେ ସେନା ପୁଣି ସରକାର ବଦଳାଇ ଗାଦି ଦଖଲ ଲାଗି ଯୋଜନା କରୁଛି । ‘ମୁଶରଫ୍ ମଡେଲ୍’ ଆପଣାଇବାକୁ ବ୍ୟଗ୍ର ସେନା ମୁଖ୍ୟ ତଥା ଫିଲ୍ଡ ମାର୍ଶଲ ଅସିମ ମୁନିର । କୁହାଯାଉଛି ଯେ ରାଷ୍ଟ୍ରପତି ଆସିଫ ଅଲ୍ଲୀ ଜର୍ଦ୍ଦାରୀ ଶୀଘ୍ର ଇସ୍ତଫା ଦେବେ । ତାଙ୍କ ସ୍ଥାନରେ ମୁନିର ନୂଆ ରାଷ୍ଟ୍ରପତି ଭାବେ ଦାୟିତ୍ୱ ଗ୍ରହଣ କରିବେ । ସେହିଭଳି ପାକିସ୍ତାନ ପିପୁଲ୍ସ ପାର୍ଟି (ପିପିପି)ର ନେତା ବିଲାୱଲ ଭୁଟ୍ଟୋ ପ୍ରଧାନମନ୍ତ୍ରୀ ପଦରେ ଅଧିଷ୍ଠିତ ହେବେ । ଏଥିସହ ଦେଶରେ ସଂସଦୀୟ ପ୍ରଣାଳୀ ବଦଳିଯିବ । ରାଷ୍ଟ୍ରପତି ପ୍ରଣାଳୀ ଲାଗୁ କରାଯିବ । ଏଥିପାଇଁ ଜୋରଦାର ପ୍ରସ୍ତୁତି ଚାଲିଛି ।
ସରକାର ପରିବର୍ତ୍ତନ ପ୍ରକ୍ରିୟା ପାକ୍ ସେନାର ସମର୍ଥନରେ ହିଁ ଜାରି ରହିଛି । ମୁନିର ବର୍ତ୍ତମାନ ସେନା ଏବଂ କ୍ଷମତା ଢାଞ୍ଚାରେ ସବୁଠୁ ଶକ୍ତିଶାଳୀ ପଦରେ ଆସୀନ ଅଛନ୍ତି । ତାଙ୍କ ଇସାରାରେ ସେନା ଓ ସରକାର ଚାଲୁଛି । ନିକଟରେ ମୁନିରଙ୍କୁ ହ୍ୱାଇଟ୍ହାଉସ୍ ତରଫରୁ ହୋଇଥିବା ନିମନ୍ତ୍ରଣ ଏହାର ଏକ ନଜିର । ଏହାର ଅର୍ଥ ଆମେରିକା ବି ତାଙ୍କୁ ପାକିସ୍ତାନର ସବୁଠୁ ପ୍ରଭାବଶାଳୀ ନେତା ଭାବୁଛି । ସମ୍ଭବତଃ ପାକ୍ରେ ସେନା ଖୁବଶୀଘ୍ର ଗାଦି ଦଖଲ କରିବା ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କୁ ଜଣା ଥିଲା ବୋଲି କୁହାଯାଉଛି । ମୁନିର ଏବେ ଆଉ ପାଦେ ଆଗକୁ ଯାଇ ସମ୍ପୂର୍ଣ୍ଣ ସରକାରରେ ହକ୍ ଜମାଇବାକୁ ଚାହୁଁଛନ୍ତି । ନିକଟରେ ତାଙ୍କୁ ଫିଲ୍ଡ ମାର୍ଶଲ ପଦକୁ ପଦୋନ୍ନତି ମିଳିଥିଲା । ଏହି ପଦ ସହ ମୁନିରଙ୍କୁ ଆଜୀବନ ସୈନ୍ୟ ବିଶେଷାଧିକାର, ଆଇନ ପ୍ରତିରକ୍ଷା ଏବଂ ଅସାମ୍ବିଧାନିକ ହସ୍ତକ୍ଷେପଗୁଡ଼ିକରୁ ସୁରକ୍ଷା ମିଳିବ । ପୂର୍ବରୁ ପରଭେଜ ମୁଶରଫଙ୍କ ସମେତ ୩ ଜଣ ସେନାଧିକାରୀ ଶାସନ କଳ ହାତକୁ ନେଇ ରାଷ୍ଟ୍ରପତି ବନିଥିଲେ । ସେନା ମୁଖ୍ୟ ମୁନିର ଓ ରାଷ୍ଟ୍ରପତି ଜର୍ଦ୍ଦାରୀଙ୍କ ମଧ୍ୟରେ ବଢ଼ୁଥିବା ସମୀକରଣକୁ ନେଇ ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ଦଳ ପାକିସ୍ତାନ ମୁସଲିମ ଲିଗ୍-ନୱାଜ (ପିଏମ୍ଏଲ୍ଏନ୍) ବିରୋଧ ଆରମ୍ଭ କରିଦେଇଛି ।
ବର୍ତ୍ତମାନର ପ୍ରଧାନମନ୍ତ୍ରୀ ଶାହବାଜ ସରିଫ ଓ ପିଏମ୍ଏଲ୍ଏନ୍ ସମ୍ଭାବ୍ୟ ପରିବର୍ତ୍ତନକୁ ନେଇ ହତାଶ ହୋଇପଡ଼ିଛନ୍ତି । ଶାହବାଜ ଆଶଙ୍କା କରୁଛନ୍ତି ଯେ ଦେଶରେ ରାଷ୍ଟ୍ରପତି ପ୍ରଣାଳୀ ଲାଗୁ ହେଲେ କେବଳ ତାଙ୍କ ପଦ ଚାଲିଯିବ ନାହିଁ, ବରଂ ଜାତୀୟ ରାଜନୀତିରେ ପିଏମ୍ଏଲ୍ଏନ୍ ଓ ସରିଫ ପରିବାରର ପ୍ରାସଙ୍ଗିକତା ମଧ୍ୟ ଶେଷ ହୋଇଯିବ । ଏହାକୁ ନେଇ ପିଏମ୍ଏଲ୍ଏନ୍ ବର୍ତ୍ତମାନ ପାକ୍ ସେନାର ବିଭିନ୍ନ ଗୋଷ୍ଠୀ ସହ ଯୋଗାଯୋଗରେ ରହିଛି । ବିଲାୱଲ ଭୁଟ୍ଟୋଙ୍କୁ ଯେମିତି ଆଗକୁ ବଢ଼ିବାକୁ ଦିଆ ନ ଯାଏ, ସେଥିଲାଗି ଉଦ୍ୟମ କରାଯାଉଛି । ବିଲାୱଲଙ୍କ ପିତା ଜର୍ଦ୍ଦାରୀଙ୍କ ସ୍ୱାସ୍ଥ୍ୟାବସ୍ଥା ଖରାପ ଥିବାରୁ ସେ ରାଷ୍ଟ୍ରପତି ପଦରୁ ଇସ୍ତଫା ଦେବେ । ଏହାପରେ ମୁନିର ରାଷ୍ଟ୍ରପତି ଆସନରେ ବସି ଶାସନ କରିବେ । କୁହାଯାଉଛି ଯେ ମୁନିରଙ୍କୁ ଅଧିକ ଗୁରୁତ୍ୱ ଦେବା ହିଁ ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ମହଙ୍ଗା ପଡ଼ିଛି । ରିପୋର୍ଟ ମୁତାବକ, ଜର୍ଦ୍ଦାରୀ ସର୍ତ୍ତ ରଖିଛନ୍ତି ଯେ ବିଲାୱଲଙ୍କୁ ସମ୍ଭାବ୍ୟ ନୂଆ ସରକାରରେ ବଡ଼ ପଦ ମିଳିବା ଉଚିତ । ଯାହାଦ୍ୱାରା ସେ ଜଣେ ପରିପକ୍ୱ ନେତା ହୋଇପାରିବେ ଓ ତାଙ୍କ ରାଜନୈତିକ କ୍ୟାରିୟର ଆହୁରି ମଜଭୁତ ହେବ । ପିପିପି ବିଲାୱଲଙ୍କ ପାଇଁ ପ୍ରଧାନମନ୍ତ୍ରୀ ପଦ ମାଗିଛି । ତେବେ ବିଲାୱଲଙ୍କ ଭୂମିକାକୁ ନେଇ ପିପିପିରେ ମଧ୍ୟ ମତଭେଦ ରହିଥିବା କୁହାଯାଉଛି ।
ନୱାଜଙ୍କୁ ହଟାଇଥିଲେ ମୁଶରଫ୍
୧୯୯୯ରେ ପାକିସ୍ତାନ ସେନା ମୁଖ୍ୟ ପରଭେଜ ମୁଶରଫ୍ ବିଦ୍ରୋହ କରି ଦେଶର ସର୍ବେସର୍ବା ହୋଇଥିଲେ । ଏହି ଘଟଣା ଥିଲା ବେଶ୍ ନାଟକୀୟ । ୧୯୯୯ ଅକ୍ଟୋବର ୧୨ରେ ତତ୍କାଳୀନ ପ୍ରଧାନମନ୍ତ୍ରୀ ନୱାଜ ସରିଫ୍ ଘୋଷଣା କରିଥିଲେ ଯେ ସେନାଧ୍ୟକ୍ଷ ଜେନେରାଲ ପରଭେଜ ମୁଶରଫ୍ ଅବସର ନେବେ । କିନ୍ତୁ ସେହିଦିନ ସନ୍ଧ୍ୟାରେ ହିଁ ନିଜେ ଶାସନରୁ ବେଦଖଲ ହୋଇଥିଲେ । ବିନା ରକ୍ତପାତରେ ମୁଶରଫ ନୱାଜଙ୍କୁ ହଟାଇ ନିଜ ହାତକୁ ଶାସନ ନେଇଥିଲେ । ୨୦୦୧ରେ ମୁଶରଫ୍ ନିଜକୁ ରାଷ୍ଟ୍ରପତି ଘୋଷଣା କରିଥିଲେ । ୨୦୦୨ରେ ଏକ ବିବାଦୀୟ ଜନମତ ସଂଗ୍ରହ କରି ଶାସନକୁ ଆସିଥିଲେ । ଆତଙ୍କବାଦ ବିରୋଧୀ ଲଢ଼େଇରେ ତାଙ୍କୁ ଆମେରିକାର ତତ୍କାଳୀନ ରାଷ୍ଟ୍ରପତି ଜର୍ଜ ବୁଶ୍ଙ୍କ ଭରପୂର ସମର୍ଥନ ମିଳିଥିଲା । ୨୦୦୭ରେ ମୁଶରଫ୍ ପୁଣି ରାଷ୍ଟ୍ରପତି ନିର୍ବାଚନ ଜିତିଥିଲେ । କିନ୍ତୁ ଏଥର ତାଙ୍କୁ ସୁପ୍ରିମକୋର୍ଟ ଆଦେଶର ଅପେକ୍ଷା କରିବାକୁ ପଡ଼ିଥିଲା । ୨୦୦୭ ନଭେମ୍ବର ୨ରେ ସୁପ୍ରିମକୋର୍ଟରେ ଚର୍ଚ୍ଚା ହେବା ପରେ ନଭେମ୍ବର ୩ରେ ସେ ଦେଶରେ ଏମର୍ଜେନ୍ସି ଲାଗୁ କରିଦେଇଥିଲେ । ୨୦୦୮ ଅଗଷ୍ଟରେ ପାକିସ୍ତାନର ନୂଆ ମେଣ୍ଟ ସରକାର ମୁଶରଫ୍ଙ୍କ ବିରୋଧରେ ମହାଭିଯୋଗ ପ୍ରସ୍ତାବ ଆଣିଥିଲେ । ଚାପ ବଢ଼ିବା ପରେ ମୁଶରଫ୍ ସେହି ମାସ ୧୮ ତାରିଖରେ ଇସ୍ତଫା ଘୋଷଣା କରିବା ସହ ପାକିସ୍ତାନ ଛାଡ଼ି ବ୍ରିଟେନ ପଳାଇଥିଲେ । ମୁଶରଫ୍ ୧୯୬୫ ଏବଂ ୧୯୭୧ରେ ଭାରତ ସହ ଦୁଇ ଥର ଯୁଦ୍ଧ କରିଥିଲେ । କିନ୍ତୁ ଦୁଇ ଥର ଯାକ ପାକିସ୍ତାନ୍ ଚିତ୍ପଟାଙ୍ଗ ମାରିଥିଲା । ମୁଶରଫ୍ଙ୍କ ପୂର୍ବରୁ ୧୯୫୮ରେ ଆୟୁବ ଖାନ୍, ୧୯୭୭ରେ ଜିୟା ଉଲ୍ ହକ୍ ସେନା ବିଦ୍ରୋହ କରି ପାକିସ୍ତାନର ଶାସନ ହାତକୁ ନେଇଥିଲେ । ପାକିସ୍ତାନରେ ଆଜିଯାଏ କୌଣସି ପ୍ରଧାନମନ୍ତ୍ରୀ ୫ ବର୍ଷ କାର୍ଯ୍ୟକାଳ ପୂରଣ କରିପାରିନାହାନ୍ତି ।
