ପାରାଦୀପ,୧୦/୦୭: ଓଡିଶା ଡ୍ରାଇଭର ମହାସଂଘ ଷ୍ଟିଅରିଂ ଛାଡ ଆନ୍ଦୋଳନର ୩ୟ ଦିନ । ତେଲ ପାଇଁ ହାହାକାର ପଡ଼ିଯାଇଛି। ଡ୍ରାଇଭର ମହାସଂଘ ଆନ୍ଦୋଳନ ଶାନ୍ତିପୂର୍ଣ୍ଣ ଚାଲିଥିବା ବେଳେ ଗୁରୁବାର ପୁଲିସ ସୁରକ୍ଷା ବଳୟରେ ପାରାଦୀପର ବିଭିନ୍ନ ତେଲ ଡିପୋରୁ ଯାଉଛି ତେଲ।
ପାରାଦୀପରେ ଭାରତ ପେଟ୍ରୋଲିୟମ, ଇଣ୍ଡିଆନ ଅଏଲ, ହିନ୍ଦୁସ୍ତାନ ପେଟ୍ରୋଲିୟମର ଡିପୋ ରହିଛି । ଏହି ପେଟ୍ରୋଲିୟମ ଡିପୋରୁ ପୁଲିସ ସୁରକ୍ଷା ବଳୟରେ ଆଦର୍ଶ ଥାନା ପୁଲିସ ସହାୟତାରେ ଲକ୍ ଥାନା ପର୍ଯ୍ୟନ୍ତ, ଲକ୍ ଥାନା ପୁଲିସ ଭୂତୁମୁଣ୍ଡାଇରେ ମାର୍ଶାଘାଇ ଓ କୁଜଙ୍ଗ ପର୍ଯ୍ୟନ୍ତ ସୁରକ୍ଷା ଯୋଗାଇ ଦେଉଥିବା ଦେଖିବାକୁ ମିଳିଛି । ଦଶ ଚକିଆ ତେଲ ଟ୍ୟାଙ୍କରରେ ୨୦ ହଜାର ଲିଟର, ୬ ଚକିଆରେ ୧୨ ହଜାର ଲିଟର, ୬ ଚକିଆ ନୂଆ ମଡେଲରେ ୧୪ ହଜାର ଲିଟର, ୧୨ ଚକିଆ ଟେଲ ଟ୍ୟାଙ୍କରରେ ୨୯ ହଜାର ଲିଟର ତେଲ ଯାଉଛି । ଓଡିଶାର କଟକ, ଭୁବନେଶ୍ୱର, ନବରଙ୍ଗପୁର, ଅନୁଗୁଳ, କୋରାପୁଟ, ଫୁଲବାଣୀ ଯାଇଥିବା ସୂଚନା ମିଳିଛି। ଅପରାହ୍ଣ ୧ ଟା ମଧ୍ୟରେ ଭାରତ ପେଟ୍ରୋଲିୟମ ତେଲ ଡିପୋରୁ ୪୦ ଟି ତେଲ ଟ୍ୟାଙ୍କର ସମେତ ମୋଟ ତିନୋଟି ତେଲ ଡିପୋରୁ ୧୦୦ଟି ଟ୍ୟାଙ୍କର ପୁଲିସ ସୁରକ୍ଷା ବଳୟରେ ଯାଇଥିବା ଆଦର୍ଶ ଥାନା ଅଧିକାରି କାବୁଲି ବାରିକ ପ୍ରକାଶ କରିଛନ୍ତି।
