ମୁମ୍ବାଇ ୨୨/୧୧: ହିନ୍ଦୀ ସିନେଶିଳ୍ପରେ ଏଭଳି ଅନେକ କଳାକାର ଅଛନ୍ତି, ଯେଉଁମାନଙ୍କର ଅଭିନୟ କ୍ୟାରିୟର ଆରମ୍ଭ ହୋଇଥିଲା ଫ୍ଲପ୍ ଫିଲ୍ମରୁ । ଯଦିଓ ପରବର୍ତ୍ତୀ ସମୟରେ ଏହି କଳାକାରମାନେ ଦର୍ଶକଙ୍କ ଭଲପାଇବା ସାଉଁଟିଛନ୍ତି, ହିଟ୍ ଫିଲ୍ମ ଭେଟି ଦେଇଛନ୍ତି । ଅଭିନେତା ଆଦିତ୍ୟ ରୟ କପୁର ଏଭଳି କଳାକାରଙ୍କ ଭିତରୁ ଜଣେ । ଆଦିତ୍ୟ ୧୩ ବର୍ଷର କ୍ୟାରିୟରରେ ୧୧ ଫିଲ୍ମରେ କାମ କରିଛନ୍ତି । କିନ୍ତୁ ଏଗୁଡ଼ିକ ଭିତରୁ କେବଳ ଦୁଇଟି ହିଁ ବକ୍ସ ଅଫିସ୍ରେ ସଫଳ ହୋଇପାରିଛି ।
ଫିଲ୍ମକୁ ଆସିବା ପୂର୍ବରୁ ଆଦିତ୍ୟ ଥିଲେ ଜଣେ ଭିଡିଓ ଜକି । ଅଜୟ ଦେବଗନ, ସଲମାନ ଖାନ ଓ ଆସିନ ଷ୍ଟାରର୍ ଫିଲ୍ମ ‘ଲଣ୍ଡନ ଡ୍ରିମ୍ସ’ରୁ ଆଦିତ୍ୟ ହିନ୍ଦୀ ସିନେମାରେ ଅଭିନୟ ଆରମ୍ଭ କଲେ । ଏ ଫିଲ୍ମ ଫ୍ଲପ୍ ସାବ୍ୟସ୍ତ ହେଲା । ପରେ ପରେ ସେ ‘ଆକ୍ସନ ରିପ୍ଲେ’ ଓ ‘ଗୁଜାରିଶ୍’ରେ ଦେଖିବାକୁ ମିଳିଲେ । ଏ ଦୁଇଟି ଫିଲ୍ମ ମଧ୍ୟ ବକ୍ସ ଅଫିସ୍ରେ ଭଲ ବ୍ୟବସାୟ କଲା ନାହିଁ । ୨୦୧୩ରେ ମୁକ୍ତିପ୍ରାପ୍ତ ‘ଆଶିକୀ ୨’ ଚଳଚ୍ଚିତ୍ରରୁ ଆଦିତ୍ୟଙ୍କୁ ସବୁଠୁ ଅଧିକ ପ୍ରସିଦ୍ଧି ମିଳିଲା । ରାତାରାତି ଷ୍ଟାର୍ ପାଲଟିଗଲେ ସେ । ସେହି ବର୍ଷ ରିଲିଜ୍ ହୋଇଥିବା ରଣବୀର କପୁର ଓ ଦୀପିକା ପାଦୁକୋନ ଅଭିନୀତ ‘ୟେ ଜୱାନୀ ହେ ଦିୱାନୀ’ରେ ନଜର ଆସିଲେ ଆଦିତ୍ୟ । ଏହା ଥିଲା ଆଦିତ୍ୟଙ୍କ ଅଭିନୟ କ୍ୟାରିୟରର ଦ୍ୱିତୀୟ ହିଟ୍ ଫିଲ୍ମ ।
ଏହାପରେ ଆଦିତ୍ୟ ‘ଫିତୁର’, ‘ଦାୱତ-ଏ ଇସ୍କ’, ‘ଓକେ ଜାନୁ’, ‘କଲଙ୍କ’, ‘ମଲଙ୍ଗ’, ‘ସଡ଼କ ୨’, ‘ଗୁମରାହ’ ଭଳି କିଛି ଫିଲ୍ମରେ ଦେଖିବାକୁ ମିଳିଲେ କିନ୍ତୁ ଏ ସମସ୍ତ ସିନେମା ଫ୍ଲପ୍ ଥିଲା । ଗତ ଏଗାର ବର୍ଷ ଭିତରେ ଆଦିତ୍ୟ ଗୋଟିଏ ବି ହିଟ୍ ଫିଲ୍ମ ଦେଇନାହାନ୍ତି । ତଥାପି ଆଦିତ୍ୟଙ୍କ ଚାହିଦା କିମ୍ବା ପାରିଶ୍ରମିକ କମ୍ ନୁହେଁ । ଗୋଟିଏ ଫିଲ୍ମରେ ଅଭିନୟ ପାଇଁ ଆଦିତ୍ୟ ନେଉଛନ୍ତି ସାତ କୋଟି ଟଙ୍କା । ଆଦିତ୍ୟଙ୍କର ରହିଛି ଆଲିଶାନ ଘର ଓ ଏକାଧିକ ଦାମୀ କାର୍ । ତାଙ୍କର ନେଟୱର୍ଥ ୮୯ କୋଟି ବୋଲି ଶୁଣିବାକୁ ମିଳୁଛି ।
