ଭୁବନେଶ୍ଵର, ୨୬/୦୫ : କିନ୍ନର ପାଳିଲେ ସାବିତ୍ରୀ ବ୍ରତ। ପ୍ରତିବର୍ଷ ଭଳି ଚଳିତ ବର୍ଷ ବିଭିନ୍ନ କିନ୍ନର ଆଖଡ଼ା ପକ୍ଷରୁ ସାବିତ୍ରୀ ବ୍ରତ ପୂଜା କରାଯାଇଛି। ମଥାରେ ସିନ୍ଦୂର ନାଇ ବରଗଛକୁ ଶାଢୀ ପିନ୍ଧାଇ, ସମସ୍ତଙ୍କ ଶୁଭ ମନାସି କିନ୍ନରମାନେ ବ୍ରତ ପାଳିଛନ୍ତି । ନିଜ ନିଜ ଗୁରୁଙ୍କୁ ପୂଜା କରି ବ୍ରତ ଭାଙ୍ଗିଛନ୍ତି।
ଭୁବନେଶ୍ଵର ଡ଼ମଣା ଠାରେ ଏକ ବରଗଛ ମୂଳରେ କିନ୍ନର ସୁଇଟି ଓ ତାଙ୍କ ସାଥିମାନେ ସାବିତ୍ରୀ ପୂଜା କରିଛନ୍ତି। ସୁଇଟି ତାଙ୍କ ଗୁରୁଙ୍କୁ ପୂଜା କରିଥିବା ବେଳେ ତାଙ୍କ ଶିଷ୍ୟମାନେ ତାଙ୍କୁ ପୂଜା କରିଛନ୍ତି । ସେହିପରି ନୟାପଲ୍ଲୀରେ ମେନକା କିନ୍ନର ସାବିତ୍ରୀ ବ୍ରତ ପାଳିଛନ୍ତି । କିନ୍ନର ଆଖଡ଼ା ପକ୍ଷରୁ ପଳାଶପଲ୍ଲୀ ଠାରେ ସାବିତ୍ରୀ ପୂଜା ହୋଇଛି। ମହାମଣ୍ଡଳେଶ୍ୱର କିନ୍ନର ଆଖଡ଼ା ମୁଖ୍ୟ ମୀରା ପରିଡ଼ାଙ୍କୁ ତାଙ୍କ ଶିଷ୍ୟମାନେ ଗୁରୁ ଭାବେ ପୂଜା କରିଛନ୍ତି । ତାଙ୍କ ପାଇଁ ଉପବାସ କରିଛନ୍ତି। ବିଭିନ୍ନ ଫଳମୂଳ ଭୋଗ ଲଗାଇଛନ୍ତି। ଘର ଛାଡି କିନ୍ନର ସଂଘରେ ଯୋଗଦେବା ପରେ ଏବେ ଗୁରୁ ହିଁ ସବୁକିଛି ବୋଲି କହିଛନ୍ତି ଅନ୍ୟ ବ୍ରତ ରଖିଥିବା କିନ୍ନରମାନେ।
ଅନ୍ୟପଟେ କିଛି ବିବାହିତ କିନ୍ନର ବି ସ୍ବାମୀଙ୍କ ପାଇଁ ସାବିତ୍ରୀ ପୂଜା କରିବା ସହିତ ମୀରା ପରିଡାଙ୍କୁ ନିଜ ଗୁରୁ ଭାବେ ଶ୍ରଦ୍ଧାର ସହ ପୂଜା କରିଛନ୍ତି। ବର ଗଛକୁ ସୂତା ବାନ୍ଧି, ଲୁଗା ପିନ୍ଧାଇଛନ୍ତି। ପୂଜା ସରିବା ପରେ ତାଙ୍କ ପାଦ ଧୁଆ ପାଣି ପିଇ ବ୍ରତ ଭାଙ୍ଗିଛନ୍ତି।
