ବ୍ରହ୍ମପୁର,୨୨/୦୬: ବ୍ରହ୍ମପୁର ଉପକଣ୍ଠ ଖଜୁରିଆ ଜାତୀୟ ରାଜପଥରେ ରବିବାର ଭୋର ସମୟରେ ଗାଈ ପଲ ଉପରେ ଟ୍ରକ୍ ମାଡ଼ି ଯାଇଛି । ଏଥିରେ ୧୨ ଗାଈଙ୍କ ମୃତ୍ୟୁ ହୋଇଥିବା ବେଳେ ୩ ଗାଈ ଗୁରୁତର ଆହତ ହୋଇଛନ୍ତି । ଦୁର୍ଘଟଣା ଘଟାଇ ଗାଡ଼ିଟି ସେଠାରୁ ଚମ୍ପଟ ମାରିଛି ।
ସୂଚନା ମୁତାବକ, ଖଜୁରିଆ ଜାତୀୟ ରାଜପଥ ଇଲେକ୍ଟ୍ରି ସବଷ୍ଟେସନ୍ ସମ୍ମୁଖରେ ଭୋର ସାଢେ ୩ ଟାରେ ଦୁର୍ଘଟଣା ଘଟିଛି । ଏକ ଅଜଣା ଟ୍ରକ୍ ଗାଈ ପଲକୁ ଧକ୍କା ଦେଇଥିଲା। ଏସମ୍ପର୍କରେ ଖବର ପାଇ ଜାତୀୟ ରାଜପଥ କର୍ତ୍ତୃପକ୍ଷ ଓ ବ୍ରହ୍ମପୁର ଟ୍ରାଫିକ ଥାନା ପୁଲିସ ସେଠାରେ ପହଞ୍ଚିଥିଲେ । କ୍ରେନ୍ ସାହାଯ୍ୟରେ ଗାଈଙ୍କୁ ରାସ୍ତାରୁ ହଟାଇଥିଲେ। ଫଳରେ ରାସ୍ତାରେ ଗାଡ଼ି ଲମ୍ବା ଧାଡ଼ିରେ ଛିଡ଼ା ହୋଇଥିଲା । ଘଣ୍ଟାଏ ପରେ ଗାଡ଼ି ଚଳାଚଳ ସ୍ୱାଭାବିକ ହୋଇଥିଲା । ବହୁ ବାର ଯୋଗାଯୋଗ କରିବା ପରେ ସକାଳ ୭ ଟାରେ ପ୍ରାଣୀ ଚିକିତ୍ସକ ଆସିଥିଲେ। ଏହି ମଧ୍ୟରେ ୧୨ ଟି ଗାଈଙ୍କ ମୃତ୍ୟୁ ହୋଇଥିଲା । ୩ ଟି ଗାଈଙ୍କର ଚିକିତ୍ସା ଚାଲିଛି । ମୃତ ଗାଈଗୁଡ଼ିକ ଖଜୁରିଆ ଗ୍ରାମର ଯଶୋଦା ନାୟକ ଓ ବାବୁ ନାହାକଙ୍କର ବୋଲି ପ୍ରାଣୀ ସମ୍ପଦ ଅଧିକାରୀ କହିଛନ୍ତି ।
