ମହାରାଷ୍ଟ୍ରରେ ଉଦୟପୁର ଭଳି ମାମଲା: କେମିଷ୍ଟଙ୍କୁ ଗଳାକାଟି ହତ୍ୟା, ୬ ଗିରଫ
ଅମରାବତୀ,୨।୭: ମହାରାଷ୍ଟ୍ରର ଅମରାବତୀରେ ୫୪ ବର୍ଷୀୟ ଜଣେ କେମିଷ୍ଟଙ୍କୁ ଗଳାକାଟି ହତ୍ୟା। ମୃତକ ହେଉଛନ୍ତି ଉମେଶ କୋହ୍ଲୋ। ତାଙ୍କୁ ଛୁରି ମାରି ହତ୍ୟା କରାଯାଇଛି। ପୋଲିସ ଏହି ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରି ୬ ଅଭିଯୁକ୍ତଙ୍କୁ ଗିରଫ କରିଛି। ରାଜସ୍ଥାନର ଉଦୟପୁରର ଟେଲର କହ୍ନେୟାଲାଲଙ୍କ ଭଳି ଉମେଶ ମଧ୍ୟ ନୂପୁର ଶର୍ମାଙ୍କ ସମର୍ଥନ କରିଥିଲେ। ଅମରାବତୀରେ ଏନ୍ଆଇଏ ଓ ଏଟିଏସ୍ର ଦୁଇଟି ଟିମ୍ ଉମେଶଙ୍କ ହତ୍ୟାକାଣ୍ଡ ମାମଲାର ତଦନ୍ତ କରିବାକୁ ପହଁଞ୍ଚିଛି। ଉମେଶଙ୍କ ହତ୍ୟାକାଣ୍ଡରେ ଏପର୍ଯ୍ୟନ୍ତ ୬ ଜଣ ଅଭିଯୁକ୍ତ ଗିରଫ ହୋଇସାରିଛନ୍ତି। ହତ୍ୟାକାଣ୍ଡର ମାଷ୍ଟର ମାଇଣ୍ଡ ଏବେ ମଧ୍ୟ ଫେରାର ଅଛି ଓ ଅଭିଯୁକ୍ତଙ୍କୁ ପୋଲିସ ଗିରଫ କରିବ।
ଏଟିଏସ୍ ସୁତ୍ରରୁ ଜଣାପଡିଛି ଯେ, ମୃତକ ଉମେଶଙ୍କ ଅମରାବତୀରେ ପଶୁ ଖାଦ୍ୟ ଦୋକାନ ରହିଛି। ତାଙ୍କର ଅଧିକାଂଶ ଗ୍ରାହକ ମୁସଲମାନ ସମ୍ପ୍ରଦାୟର, ଯେଉଁ ୬ ଜଣଙ୍କୁ ପୋଲିସ ଗିରଫ କରିଛି, ତାଙ୍କ ଭିତରୁ ଜଣେ ଉମେଶଙ୍କ ଗ୍ରାହକ। ସେ ଅନ୍ୟମାନଙ୍କୁ ଉମେଶଙ୍କ ଫେସବୁକ୍ ପୋଷ୍ଟ ବିଷୟରେ କହିଥିଲା। ପୋଲିସର ସୂଚନା ଅନୁସାରେ, ଉମେଶ ବିଜେପିରୁ ନିଲମ୍ବିତ ମୁଖପାତ୍ର ନୂପୁର ଶର୍ମାଙ୍କ ସମର୍ଥନରେ ସୋସିଆଲ ମିଡିଆରେ କିଛି କମେଣ୍ଟ ଦେଇଥିଲେ। ଅଧିକାରୀଙ୍କୁ ସନ୍ଦେହ ରହିଛି, ଏହି ପୋଷ୍ଟକୁ ନେଇ ଉମେଶଙ୍କୁ ହତ୍ୟା କରାଯାଇଛି।
ଉଲ୍ଲେଖନୀୟ ଯେ, ଗତ ୨୧ ଜୁନ୍ରେ ଉମେଶଙ୍କୁ ହତ୍ୟା କରାଯାଇଥିଲା। ଏହି ମାମଲାରେ ୬ ଜଣଙ୍କୁ ଗିରଫ କରାଯାଇଛି। ଗୃହ ମନ୍ତ୍ରଣାଳୟ ଏହି ମାମଲାର ତଦନ୍ତ ଏନଆଇଏକୁ ଦେଇଥିଲା।ସେମାନଙ୍କ ନାଁ ମୁଦାସିର ଅହମ୍ମଦ, ଶାହାରୁଖ ପଠାନ, ଅବଦୁଲ, ଶୋହେବ ଖାନ୍, ଅତିପ୍ ରଶିଦ୍ ଓ ୟୁଶୁଫ୍ ଖାନ୍। ଏହି ଘଟଣା ରାଜସ୍ଥାନର ଉଦୟପୁରରେ ହୋଇଥିବା କହ୍ନେୟାଲାଲ ନାମକ ଜଣେ ଦରଜୀଙ୍କୁ ହତ୍ୟା କରିବାର ଏକ ସପ୍ତାହ ପୂର୍ବରୁ ହୋଇଥିଲା।
