ନୂଆଦିଲ୍ଲୀ,୧୬/୧୨: ଭାରତରୁ ଚୋରି ହୋଇଯାଇଥିବା ପ୍ରାୟ ୧୦ ନିୟୁତ ଡଲାର (ପ୍ରାୟ ୮୫ କୋଟି ଟଙ୍କା) ମୂଲ୍ୟର ୧୪୦୦ ପ୍ରାଚୀନ କଳାକୃତି ଆମେରିକା ଫେରାଇଛି । ବୁଧବାର ଆୟୋଜିତ ଏକ ସ୍ୱତନ୍ତ୍ର ସମାରୋହରେ ନ୍ୟୁୟର୍କସ୍ଥିତ ଭାରତୀୟ କନସଲ ଜେନେରାଲ ମନିଷ କୁଲହାରୀଙ୍କୁ ହୋମଲାଣ୍ଡ ସିକ୍ୟୁରିଟି ଇନ୍ଭେଷ୍ଟିଗେସନର ଗ୍ରୁପ୍ ସୁପରଭାଇଜର ଆଲୋକଜାଣ୍ଡ୍ରା ଡିଆର୍ମସ ଏସବୁ କଳାକୃତି ହସ୍ତାନ୍ତର କରିଥିଲେ ।
ପ୍ରାଚୀନ କଳାକୃତିର ଚୋରା ବ୍ୟବସାୟୀ ସୁଭାଷ କପୁର ଓ ନାନ୍ସି ୱେନର ଏବଂ ତାଙ୍କ ଦ୍ୱାରା ପରିଚାଳିତ ନେଟୱାର୍କ ଠାରୁ ବିଭିନ୍ନ ସମୟରେ କିଛି କଳାକୃତି ଜବତ କରାଯାଇଥିଲା । ତା’ଛଡା ଆଉ କିଛି କଳାକୃତିକୁ ସେମାନେ ବିକ୍ରି କରିଥିବା ବ୍ୟକ୍ତିମାନେ ଦାନ କରିଦେଇଥିଲେ । ଭାରତକୁ ଫେରିଥିବା ପ୍ରାଚୀନ କଳାକୃତି ମଧ୍ୟରେ ରହିଛି ଏକ ପଥର ନିର୍ମିତ ନର୍ତ୍ତକୀ । ଯାହାକି ଅଶୀ ଦଶକରେ ମଧ୍ୟପ୍ରଦେଶର ଏକ ମନ୍ଦିରରୁ ଚୋରି ହୋଇଯାଇଥିଲା । ଚୋରା ଚାଲଣକାରୀମାନେ ଏହାକୁ ଯେଭଳି ସହଜରେ ନେଇପାରିବେ ସେଥିପାଇଁ ଦୁଇଖଣ୍ଡ କରିଦେଇଥିଲେ । ଏହାକୁ ପ୍ରଥମେ ଲଣ୍ଡନକୁ ନିଆଯାଇଥିଲା । ସେଠାରୁ ୧୯୯୨ରେ ସୁଭାଷ କପୁରଙ୍କ ପରାମର୍ଶରେ ନ୍ୟୁୟର୍କ ଅଣାଯାଇଥିଲା । ଠିକ୍ ଭାବେ ଯୋଡାଯିବା ପରେ ତାକୁ ସୁଭାଷ କପୁର ଜଣେ ବ୍ୟକ୍ତିଙ୍କୁ ପ୍ରଦାନ କରିଥିଲେ । ୨୦୨୩ରେ ତାକୁ ହୋମଲାଣ୍ଡ ସିକ୍ୟୁରିଟି ପକ୍ଷରୁ ଜବତ କରାଯାଇଥିଲା । ସେହିଭଳି ଆଉ ଏକ ମୂର୍ତ୍ତି ହେଉଛି ତାନେସାର ଦେବୀ ମା’ଙ୍କର । ରାଜସ୍ଥାନର ଏକ ମନ୍ଦିରରୁ ଏହା ଷାଠିଏ ଦଶକରେ ଲୁଟ୍ ହୋଇଥିଲା ।
୧୯୬୮ରେ ଡୋରିସ୍ ୱେନର ମ୍ୟାନହାଟ୍ଟନ ଠାରେ ଥିବା ତାଙ୍କ ଗ୍ୟାଲେରିରେ ରଖିଥିଲେ । ପରେ ତାହା ଦୁଇଜଣଙ୍କ ହାତକୁ ଯାଇଥିଲା ଏବଂ ଶେଷରେ ୨୦୨୨ରେ ତାକୁ ଜବତ କରାଯାଇଥିଲା । ପ୍ରାୟ ୧୦ ବର୍ଷରୁ ଅଧିକ ସମୟ ହେଲା ହୋମଲାଣ୍ଡ ସିକ୍ୟୁରିଟି ଓ ଜିଲ୍ଲା ସରକାରୀ ଆଣ୍ଟିକ୍ୟୁଟିଜ୍ ଟ୍ରାଫିକିଂ ୟୁନିଟ୍ ପକ୍ଷରୁ ସୁଭାଷ କପୁରଙ୍କ ଗତିବିଧି ଉପରେ ତଦନ୍ତ କରାଯିବା ପରେ ଏସବୁ କଳାକୃତି ମିଳିଥିଲା । ୨୦୧୨ରେ ସୁଭାଷ କପୁରଙ୍କ ବିରୋଧରେ ଡିଷ୍ଟ୍ରିକ୍ଟ ଆଟର୍ଣ୍ଣିଙ୍କ କାର୍ଯ୍ୟାଳୟ ପକ୍ଷରୁ ଗିରଫ ପରୱାନା ଜାରି କରାଯାଇଥିଲା ।
