କଟକ,୩୧/୭ : ରାଜ୍ୟ ସଡ଼କ ପରିବହନ ବିଭାଗ ପକ୍ଷରୁ ଗ୍ରହଣ କରାଯିବ କଡ଼ା ଆଭିମୁଖ୍ୟ । ଚାଲାଣ ଖିଲାପକାରୀଙ୍କ ବିରୋଧରେ ନିଆଯିବ ବଡ଼ ଆକ୍ସନ । ୫ଟି ରୁ ଅଧିକ ଚାଲାଣ କଟିଥିବା ହାଲୁକା ଯାନ ଓ ଭାରି ଯାନ ଗାଡ଼ି ମାଲିକ ଯଦି ଫାଇନ ପଇଠ ନ କରନ୍ତି ତେବେ ସଂପୃକ୍ତ ଗାଡ଼ିର ରେଜିଷ୍ଟ୍ରେସନକୁ ରଦ୍ଦ କରାଯିବ। ତେବେ ଖିଲାପ କରିଥିବା ଏବେ ସୁଦ୍ଧା ୨୦୦ଗାଡି ମାଲିକଙ୍କୁ ନୋଟିସ କରାଯାଇଛି । ୧୦ହଜାରରୁ ଅଧିକ ଗାଡ଼ି ମାଲିକଙ୍କୁ ଏଭଳି ପର୍ଯ୍ୟାୟକ୍ରମେ କରାଯିବ ନୋଟିସ । ଯେଉଁମାନେ ଏଥିରେ ଖିଲାପ କରିଛନ୍ତି ପରିବହନ ବିଭାଗ ପକ୍ଷରୁ ତାଙ୍କର ତାଲିକା ପ୍ରସ୍ତୁତ କରାଯାଇଛି । ଆଗାମୀ ଦୁଇ ମାସ ଭିତରେ ଏହି ନୋଟିସ ସବୁ ପଠାଯିବ ।
ଏହି ନୋଟିସ ପାଇବାର ୧୫ଦିନ ମଧ୍ୟରେ ଚାଲାଣ କରିଥିବା ଅର୍ଥ ପଇଠ କରିବା ପାଇଁ ପଡ଼ିବ । ଯଦି ଗାଡ଼ି ମାଲିକ ଏହାକୁ ଖିଲାପ କରନ୍ତି ତେବେ ଗାଡ଼ି ରେଜିଷ୍ଟ୍ରେସନ୍ ରଦ୍ଦ ହେବ । ଯେଉଁ ଗାଡ଼ି ଗୁଡ଼ିକର ଫିଟନେସ, ପରମିଟ, ଇନ୍ସୁରାନ୍ସ, ପଲ୍ୟୁସନ ନ ଥିବ ସେହି ଗାଡ଼ି ଗୁଡ଼ିକ ଇ ଡିଟେକ୍ସନ୍ ମାଧ୍ୟମରେ ବିଭିନ୍ନ ଟୋଲ ଗେଟରେ ଧରାପଡ଼ିବା ସହ କଟିବ ସେମାନଙ୍କ ଚାଲାଣ। ଆଉ ଏହି ଚାଲାଣ ପାଞ୍ଚରୁ ଅଧିକ ହେଲେ ଏବଂ ଗାଡ଼ି ମାଲିକ ଏହାକୁ ପଇଠ ନ କଲେ ରେଜିଷ୍ଟେଶନ ରଦ୍ଦ କରାଯିବ ବୋଲି ପରିବହନ ବିଭାଗ ଏନଫୋର୍ସମେଣ୍ଟର ଅତିରିକ୍ତ କମିଶନର ଲାଲ ମୋହନ ସେଠି ସୂଚନା ଦେଇଛନ୍ତି।
