ନମୌଜା,୨୦/୦୮: ଋଣ କରାଇବା ନିମନ୍ତେ ୧୦ ହଜାର ଟଙ୍କା ଲାଞ୍ଚ ନେଉଥିଲେ ଆଳି ମହୁ କୃଷି ସମବାୟ ସମିତିର ସମ୍ପାଦକ । ରେଡ୍ ହ୍ୟାଣ୍ଡ୍ ମାଡ଼ି ବସିଲା ଭିଜିଲାନ୍ସ । ବନ୍ଧାହେଲେ ଲାଞ୍ଚୁଆ ସମ୍ପାଦକ ଧୀରେନ୍ଦ୍ର ମହାନ୍ତି । ଏହି ଚଢାଉ ପରେ ସମ୍ପାଦକ ଧୀରେନ୍ଦ୍ର ମହାନ୍ତିଙ୍କୁ ଗିରଫ କରି ତାଙ୍କର ୨ଟି ସ୍ଥାନରେ ଏକକାଳୀନ ଚଢାଉ କରୁଛି ଭିଜିଲାନ୍ସ ଟିମ୍ ।
ସୂଚନା ମୁତାବକ, କେନ୍ଦ୍ରାପଡ଼ା କଟକ ସେଣ୍ଟ୍ରାଲ କୋଅପରେଟଟିଭ ବ୍ୟାଙ୍କ ଅଧୀନ ମହୁ ପ୍ୟାକ୍ସରେ ଦୀର୍ଘ ଦିନ ହେବ ଦୁର୍ନୀତି ନେଇ ଅଭିଯୋଗ ହୋଇ ଆସୁଥିଲା । ଏନେଇ ଗତ ଜୁନ ମାସ ୧୪ ତାରିଖ ପ୍ରମେୟରେ 'ଚାଷୀଙ୍କ ଅଜାଣତରେ ବ୍ୟାଙ୍କ ଖାତାରୁ ଟଙ୍କା ଉଠାଣ' ଶୀର୍ଷକ ଖବର ପ୍ରକାଶ ପାଇଥିଲା । ବୁଧବାର ମହୁ ପ୍ୟାକ୍ସ ଅଧୀନ ମହୁ ଗ୍ରାମର ଭାଗିରଥି ନାଥଙ୍କ ପୁଅ ବୀରେନ୍ଦ୍ର ନାଥଙ୍କ ଠାରୁ ଦେଢ଼ ଲକ୍ଷ ଟଙ୍କା ଋଣ କରାଇବା ନିମନ୍ତେ ୧୦ ହଜାର ଟଙ୍କା ଲାଞ୍ଚ ନେବା ସମୟରେ ଭିଜିଲାନ୍ସ ହାତରେ ଧୀରେନ୍ଦ୍ର ମହାନ୍ତି ଧରାପଡ଼ିଯାଇଛନ୍ତି । ଆଳି ମହୁ କୃଷି ସମବାୟ ସମିତିର ସମ୍ପାଦକ ଧିରେନ୍ଦ୍ର ମହାନ୍ତି ଧରାପଡ଼ିବା ପରେ ତାଙ୍କୁ ଗରଫ କରାଯାଇଛି । ତାଙ୍କୁ ଜିଲ୍ଲା ଭିଜିଲାନ୍ସ କାର୍ଯ୍ୟାଳୟକୁ ନେଇଯାଇଥିଲେ । ଧୀରେନ୍ଦ୍ର ମହାନ୍ତି ଅଫିସ ସହିତ ବାସଗୃହ ଏବଂ ନମୌଜା ପୋଷ୍ଟ ଅଫିସ ସାମ୍ନା ଭଡା ଘରେ ରେଡ ଚାଲିଥିବା ସୂଚନା ମିଳିଛି ।
