ଭୁବନେଶ୍ୱର,୦୯/୧୨: ଆଳୁ ପାଇଁ ପଶ୍ଚିମବଙ୍ଗରେ ଶୁଭୁଛି ଓଡ଼ିଶା ସପକ୍ଷରେ ନାରା । ଓଡ଼ିଶା ଓ ଅନ୍ୟ ରାଜ୍ୟକୁ ଆଳୁ ଦେବାକୁ ଅଡ଼ି ବସିଛନ୍ତି ବଙ୍ଗ ବ୍ୟବସାୟୀ । କିନ୍ତୁ ଏବେବି ଜିଦ୍ରେ ଅଟଳ ମମତା ସରକାର । ତେଣୁ ପୁଣିଥରେ ଆନ୍ଦୋଳନକୁ ଓହ୍ଲାଇବାକୁ ସଜବାଜ ହେଉଛନ୍ତି ଆଳୁ ବ୍ୟବସାୟୀ ଓ ଶୀତଳ ଭଣ୍ଡାର କର୍ମଚାରୀ ।
ଆଜି ଠାରୁ ପୁଣିଥରେ ଆନ୍ଦୋଳନ ହେବ ବୋଲି ଜଣାପଡ଼ିଛି । ସରକାରଙ୍କ ନିଷ୍ପତ୍ତିରେ ଅସନ୍ତୋଷ ପ୍ରକାଶ କରି ଗତ ଏକ ସପ୍ତାହ ତଳେ ପଶ୍ଚିମବଙ୍ଗ ଆଳୁ ବ୍ୟବସାୟୀ ଓ ଶୀତଳ ଭଣ୍ଡାର କର୍ମଚାରୀମାନେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଆନ୍ଦୋଳନ କରିଥିଲେ । ଶୀତଳଭଣ୍ଡାରରେ ତାଲା ପଡ଼ିଥିଲା । ଫଳରେ ସେଠାରେ ଆଳୁ ଯୋଗାଣ ବାଧାପ୍ରାପ୍ତ ହୋଇଥିଲା । ମାତ୍ର କେଇ ଘଣ୍ଟା ମଧ୍ୟରେ ସରକାର ସେମାନଙ୍କ ସହ ଆଲୋଚନା କରି ତୁରନ୍ତ ସମସ୍ୟାର ସମାଧାନ ହେବ ବୋଲି ପ୍ରତିଶ୍ରୁତି ଦେଇଥିଲେ । କାରଣ ଆଳୁଗୁଡ଼ିକ ପଡ଼ିରହି ପଚିଯାଉଥିବା ନେଇ ଅଭିଯୋଗ ହୋଇଥିଲା । ତେଣୁ ରାଜ୍ୟ ପାଇଁ ଆଳୁ ରଖାଯାଇ ଅବଶିଷ୍ଟ ଆଳୁକୁ ଅନ୍ୟ ରାଜ୍ୟକୁ ରତ୍ପାନୀ କରିବା ଉପରେ ମମତା ସରକାର ବିଚାର କରୁଛନ୍ତି ବୋଲି କୁହାଯାଇଥିଲା । ହେଲେ ଆଜି ପର୍ଯ୍ୟନ୍ତ ବ୍ୟବସାୟୀଙ୍କ ସପକ୍ଷରେ କୌଣସି ନିଷ୍କର୍ସ ବାହାରିପାରିନି । ତେଣୁ ପୁଣି ଶୀତଳଭଣ୍ଡାରରେ ତାଲା ଝୁଲାଇ ଆନ୍ଦୋଳନ କରିବାକୁ ସଜବାଜ ହେଉଛନ୍ତି ଆଳୁ ବ୍ୟବସାୟୀ ।
ଅପରପକ୍ଷେ, ଓଡ଼ିଶାରେ ଆଳୁ ସ୍ଥିତି ସୁଧୁରିବାର ନାଁ ଧରୁନି । ଦୈନିକ ଶତାଧିକ ଟ୍ରକ ଆଳୁ ଓଡ଼ିଶାକୁ ଆସୁଥିବା ସତ୍ତେ୍ୱ ଦର କମୁନି । ଦର ସେହି ୪୦ରେ ଅଟକି ରହିଛି । ଆଳୁ ଦର ହ୍ରାସ ପଦକ୍ଷେପ କେବଳ ବୟାନବାଜିରେ ସୀମିତ ରହିଛି । ବାରମ୍ବାର ଯୋଗାଣ ବିଭାଗର ଚଢ଼ଉ ସତ୍ତେ୍ୱ ଦର ଖସୁନଥିବାରୁ ଖାଉଟି ଅସନ୍ତୋଷ ପ୍ରକାଶ କରିଛନ୍ତି ।
ରବିବାର ୧୫୦ ଟ୍ରକ ଆଳୁ ରାଜ୍ୟକୁ ଆସିଛି । ରାଜ୍ୟ ବ୍ୟବସାୟୀ ମହାସଂଘର ସାଧାରଣ ସମ୍ପାଦକ ସୁଧାକର ପଣ୍ଡା କହିଛନ୍ତି, ରାଜ୍ୟରେ ଆଳୁ ସମସ୍ୟା ଆଉ ନାହିଁ । ସବୁ ମଣ୍ଡିରେ ଆଳୁ ମହଜୁଦ ରହୁଛି । ପାଇକାରୀ ଦର କମୁଛି । ହେଲେ ବଜାର ଦର ଆମେ କିଛି କରିପାରିବୁନି । ସେହି ଦର ନିୟନ୍ତ୍ରଣକୁ ଆଣିବା ସରକାରଙ୍କ କାମ ।
