ନୂଆଦିଲ୍ଲୀ,୦୪/୦୩: ଆନ୍ଥୋନି ଆଲବାନିଜ୍ କ୍ରମାଗତ ଦ୍ୱିତୀୟ ଥର ପାଇଁ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଭାବେ ନିର୍ବାଚିତ ହୋଇଛନ୍ତି । ଦୀର୍ଘ ୨୧ ବର୍ଷରେ ପ୍ରଥମ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଭାବେ ଲଗାତାର ଦ୍ୱିତୀୟ ଥର କାର୍ଯ୍ୟକାଳରେ ରହିବାର ସୌଭାଗ୍ୟ ଅର୍ଜନ କରିଛନ୍ତି । ବିରୋଧୀ ଲିବରାଲ ପାର୍ଟି ଅଫ୍ ଅଷ୍ଟ୍ରେଲିଆର ନେତା ପିଟର ଡଟ୍ଟନ ପରାସ୍ତ ହୋଇଛନ୍ତି । ଅଷ୍ଟ୍ରେଲିଆର ଲେବର ପାର୍ଟି ନେତା ଆନ୍ଥୋନିଙ୍କର ଏହି ଦ୍ୱିତୀୟ ଐତିହାସିକ ବିଜୟ ପାଇଁ ତାଙ୍କୁ ଶୁଭେଚ୍ଛାର ସୁଅ ଛୁଟିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଶୁଭେଚ୍ଛା ଜଣାଇଛନ୍ତି । ତେବେ ଆପଣ ଜାଣିଛନ୍ତି କି ଆନ୍ଥୋନି ଆଲବାନିଜ୍ କିଏ ? ତାଙ୍କର ରାଜନୀତି ଯାତ୍ରା କେମିତି ଓ କେବେ ଆରମ୍ଭ ହେଲା । ଆସନ୍ତୁ ଜାଣିବା ଏହି ରିପୋର୍ଟରେ ।
ଆନ୍ଥୋନି ଆଲବାନିଜ୍ କିଏ ? ଶନିବାର ଅଷ୍ଟ୍ରେଲିଆର ସାଧାରଣ ନିର୍ବାଚନ ହୋଇଥିଲା । ଅଷ୍ଟ୍ରେଲିଆରେ ୧ କୋଟି ୮୧ ଲକ୍ଷ ପଞ୍ଜୀକୃତ ମତଦାତା ଅଛନ୍ତି । ନିର୍ବାଚନରେ ବିଜୟ ହାସଲ କରିଛନ୍ତି ଆନ୍ଥୋନି ଆଲବାନିଜ୍ । ନିର୍ବାଚନ ଜିତିବାପରେ ଆନ୍ଥୋନି କହିଛନ୍ତି, 'ବୈଶ୍ୱିକ ଅନିଶ୍ଚିତତା ମଧ୍ୟରେ ଭୋଟରମାନେ ନୂଆ ଆଶାବାଦ ଓ ବିଶ୍ୱାସକୁ ବାଛିଛନ୍ତି ।' ଗତ ୩୦ ବର୍ଷ ହେବ ସାଂସଦ ରହିଥିଲେ ଆନ୍ଥୋନି । ୨୦୨୨ରୁ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ହୋଇଥିଲେ । ମାତ୍ର ଏହି ବିଜୟ ତାଙ୍କ ବ୍ୟକ୍ତିଗତ ଓ ରାଜନୈତିକ ଜୀବନର ବଡ ଉପଲବ୍ଧି । ଆନ୍ଥୋନୀ ଜଣେ ସାଧାରଣ ପରିବାରର । ତାଙ୍କ ମାଆ ଏକାକୀ ତାଙ୍କର ଲାଳନ ପାଳନ କରିଛନ୍ତି । ଯେତିକି ପେନସନ୍ ମିଳୁଥିଲା ସେଥିରେ ହିଁ ଘର ଚଳୁଥିଲା । ଗରିବ ପରିବାରରୁ ଆସି ବି ଆନ୍ଥୋନୀ ଆଜି ଅଷ୍ଟ୍ରେଲିଆ ରାଜନୀତିରେ ବଡ଼ ଚେହେରା ହୋଇଛନ୍ତି । ସେ ଗରିବୀ ଓ ସଂଘର୍ଷକୁ ଭଲ ଭାବେ ବୁଝିଛନ୍ତି ।
ସେ ସବୁବେଳେ ସ୍ୱାସ୍ଥ୍ୟସେବା, ଏଲଜିବିଟିଙ୍କ ଅଧିକାରକୁ ସମର୍ଥନ ଓ ଅଷ୍ଟ୍ରେଲିଆକୁ ଏକ ଗଣରାଜ୍ୟରେ ପରିଣତ କରିବାକୁ ପ୍ରୟାସ କରିଆସିଛନ୍ତି । ୨୦୦୭ରେ ଲେବର ପାର୍ଟିର ବିଜୟରେ ମନ୍ତ୍ରୀ ହୋଇଥିଲେ । ୩୦ ବର୍ଷ ଧିରି ସାଂସଦ ହେବା ପରେ ୨୦୨୨ରେ ପ୍ରଥମ ଥର ପ୍ରଧାନମନ୍ତ୍ରୀ ହୋଇଥିଲେ । ପ୍ରାୟ ୧୦ ବର୍ଷର ମେଣ୍ଟ ସରକାରର ପତନ ହୋଇଥିଲା । ଆନ୍ଥୋନୀ କୋଭିଡ ପରବର୍ତ୍ତୀ ଅର୍ଥନୀତି ପୁନଃରୁଦ୍ଧାର, ଆନ୍ତର୍ଜାତୀୟ ସମ୍ପର୍କରେ ଉନ୍ନତି ଆଣିବା ଉପରେ ଗୁରୁତ୍ୱ ଦେଉଥିଲେ ।
୬୧ ବର୍ଷୀୟ ଆନ୍ଥୋନି ଆଲବାନିଜ୍ ୨୦ ଦଶକରୁ ଲେବର ପାର୍ଟିରେ ଯୋଗ ଦେଇଥିଲେ । ୧୯୯୬ରେ ସଂସଦକୁ ନିର୍ବାଚିତ ହୋଇଥିଲେ । ସେବେଠୁ ସେ ଅଷ୍ଟ୍ରେଲିଆର ସବୁଠୁ ଦୀର୍ଘ ସମୟ ଧରି ସେବା କରୁଥିବା ସାଂସଦମାନଙ୍କ ମଧ୍ୟରେ ଜଣେ । ତାଙ୍କୁ 'ୱାର୍କିଙ୍ଗ କ୍ଲାସ ହିରୋ' ବୋଲି ମଧ୍ୟ କୁହାଯାଏ । ଚଳିତବର୍ଷ ବିବାହ କରିବେ ଆନ୍ଥାନୀ । ଜୋଡି ହେଡ଼ନଙ୍କୁ ବିବାହ କରିବେ । ପ୍ରଧାନମନ୍ତ୍ରୀ ପଦରେ ରହି ବିବାହ କରିବାରେ ସେ ପ୍ରଥମ ଅଷ୍ଟ୍ରେଲିଆନ ପିଏମ ।
