ନୂଆଦିଲ୍ଲୀ,୨୬/୦୭: କେନ୍ଦ୍ର ମନ୍ତ୍ରୀ ପ୍ରହ୍ଲାଦ ଯୋଶୀଙ୍କୁ ଶିକ୍ଷା ମନ୍ତ୍ରଣାଳୟର ଦାୟିତ୍ୱ ଦିଆଯାଇଛି । ପ୍ରଧାନମନ୍ତ୍ରୀଙ୍କ ପରାମର୍ଶକ୍ରମେ ଯୋଶୀଙ୍କୁ ଅତିରିକ୍ତ ଦାୟିତ୍ୱ ଦେବା ନେଇ ରାଷ୍ଟ୍ରପତି ମଞ୍ଜୁରି ଦେଇଛନ୍ତି । ଖାଉଟି ବ୍ୟାପାର, ଖାଦ୍ୟ ଏବଂ ସାଧାରଣ ବଣ୍ଟନ ମନ୍ତ୍ରଣାଳୟ ସହିତ ଯୋଶୀ ନୂଆ ଦାୟିତ୍ୱ ନିର୍ବାହ କରିବେ । ତେବେ ଆପଣ ଜାଣିଛନ୍ତି କି ପ୍ରହଲ୍ଲାଦ ଯୋଶୀ କିଏ ? ତାଙ୍କ ରାଜୈନିକ କ୍ୟାରିୟର କିପରି ? ସେ କେତେ ପଢିଛନ୍ତି ? ତାଙ୍କର ସମ୍ପତ୍ତି କେତେ ? ଜାଣନ୍ତୁ ଏହି ରିପୋର୍ଟରେ ।
ପ୍ରହ୍ଲାଦ ଯୋଶୀଙ୍କ ରାଜନୈତିକ ଯାତ୍ରା- ପ୍ରହ୍ଲାଦ ଯୋଶୀ ଭାରତୀୟ ଜନତା ପାର୍ଟିର ଜଣେ ବରିଷ୍ଠ ନେତା । ତାଙ୍କ ପାଖରେ ନୂଆ ଏବଂ ନବୀକରଣୀୟ ଶକ୍ତି ମନ୍ତ୍ରଣାଳୟ ମଧ୍ୟ ଅଛି । ରାଜନୀତିରେ ଦୁଇ ଦଶନ୍ଧିରୁ ଅଧିକ ସମୟ ବିତାଇଥିବା ପ୍ରହ୍ଲାଦ ଯୋଶୀଙ୍କୁ ସଂଗଠନ ଏବଂ ପ୍ରଶାସନରେ ଜଣେ ଅଭିଜ୍ଞ ନେତା ଭାବରେ ବିବେଚନା କରାଯାଏ । ସଂସଦରେ ତାଙ୍କର ସକ୍ରିୟ ଅଂଶଗ୍ରହଣ, ନିରନ୍ତ୍ର ନିର୍ବାଚନୀ ବିଜୟ ଏବଂ ଅନେକ ଗୁରୁତ୍ୱପୂର୍ଣ୍ଣ ମନ୍ତ୍ରଣାଳୟରେ ଅଭିଜ୍ଞତା ତାଙ୍କୁ ଅନନ୍ୟ କରିଛି । ୧୯୬୨ ମସିହା ନଭେମ୍ବର ୨୭ କର୍ଣ୍ଣାଟକର ବିଜୟପୁରାରେ ଜନ୍ମଗ୍ରହଣ କରିଥିଲେ ପ୍ରହ୍ଲାଦ । ହୁବୁଳିରେ ପାଠପଢା ସାରିଥିଲେ । ଯୁବାବସ୍ଥାରୁ ଆରଏସଏସ ସହିତ ସମ୍ପର୍କ ଥିଲା । ଯୋଶୀଙ୍କ ସକ୍ରିୟ ରାଜନୈତିକ ଯାତ୍ରା ବିଜେପିର ଜିଲ୍ଲା ସଂଗଠନ ସହିତ ଆରମ୍ଭ ହୋଇଥିଲା । ସେ ଧାରୱାଡ ଜିଲ୍ଲାରେ ଦଳୀୟ ସଂଗଠନକୁ ମଜବୁତ କରିବାକୁ କାର୍ଯ୍ୟ କରିଥିଲେ । ସଂଗଠନକ ଦାୟିତ୍ୱ ନିର୍ବାହ କରିଥିଲେ । ୨୦୦୪ ମସିହାରେ ସେ ପ୍ରଥମେ କର୍ଣ୍ଣାଟକର ଧାରୱାଡ ଲୋକସଭା ଆସନରୁ ପ୍ରତିଦ୍ୱନ୍ଦିତା କରିଥିଲେ ଏବଂ ଜିତିଥିଲେ । ୨୦୦୯, ୨୦୧୪, ୨୦୧୯ ଏବଂ ୨୦୨୪ରେ ଲଗାତାର ଲୋକସଭା ନିର୍ବାଚନ ଜିତିଥିଲେ । ସେ ଲଗାତାର ୫ ଥର ସାଂସଦ ହୋଇଥିଲେ । କର୍ଣ୍ଣାଟକର ସବୁଠାରୁ ପ୍ରଭାବଶାଳୀ ବିଜେପି ନେତାଙ୍କ ମଧ୍ୟରୁ ଜଣେ ପ୍ରହ୍ଲାଦ ଯୋଶୀ ।
୨୦୧୨ରେ କର୍ଣ୍ଣାଟକ ବିଜେପି ରାଜ୍ୟ ସଭାପତି ହୋଇଥିଲେ । ଏହା ପରେ ତାଙ୍କର ରାଜନୈତିକ ପ୍ରତିଷ୍ଠା ଆହୁରି ବୃଦ୍ଧି ହୋଇଥିଲା । ତାଙ୍କ ନେତୃତ୍ୱରେ ବିଜେପି ରାଜ୍ୟରେ ସଂଗଠନକୁ ମଜବୁତ କରିବା ଉପରେ ଧ୍ୟାନ ଦେଇଥିଲା । ୨୦୧୪ ପରେ ସେ ବିଭିନ୍ନ ସଂସଦୀୟ କମିଟି ଏବଂ ଲୋକସଭା ବାଚସ୍ପତିଙ୍କ ପ୍ୟାନେଲରେ ମଧ୍ୟ କାର୍ଯ୍ୟ କରିଛନ୍ତି । ୨୦୧୯ରେ ପ୍ରଧାନମନ୍ତ୍ରୀ ମୋଦିଙ୍କ ଦ୍ୱିତୀୟ କାର୍ଯ୍ୟକାଳରେ ସଂସଦୀୟ ବ୍ୟାପାର ମନ୍ତ୍ରୀ ହୋଇଥିଲେ । କୋଇଲା ଏବଂ ଖଣି ଭଳି ଗୁରୁତ୍ୱପୂର୍ଣ୍ଣ ବିଭାଗ ସମ୍ଭାଳିଥିଲେ । ୨୦୨୪ରେ ତାଙ୍କୁ ଖାଉଟି, ବ୍ୟାପାର ଖାଦ୍ୟ ଏବଂ ସାଧାରଣ ବଣ୍ଟନ ଏବଂ ନବୀକରଣୀୟ ଶକ୍ତି ମନ୍ତ୍ରଣାଳୟର ଦାୟିତ୍ୱ ଦିଆଯାଇଥିଲା ।
ଏହା ବି ପଢନ୍ତୁ...ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ପରେ ପ୍ରହ୍ଲାଦ ଯୋଶୀ ହେଲେ ନୂଆ ଶିକ୍ଷା ମନ୍ତ୍ରୀ; ଅତିରିକ୍ତ ଦାୟିତ୍ୱ ଦେଲେ ରାଷ୍ଟ୍ରପତି
କେତେ ପଢିଛନ୍ତି ପ୍ରହ୍ଲାଦ ? ତାଙ୍କର ସରକାରୀ ସଂସଦୀୟ ପ୍ରୋଫାଇଲ୍ ଅନୁଯାୟୀ, ପ୍ରହଲ୍ଲାଦ ଜୋଶୀ ହୁବଲିରେ ତାଙ୍କର ସ୍କୁଲ ଶିକ୍ଷା ସମାପ୍ତ କରିଥିଲେ। ତା’ପରେ ସେ କର୍ଣ୍ଣାଟକ ବିଶ୍ୱବିଦ୍ୟାଳୟ ସହିତ ଜଡିତ ଧାରୱାଡର କାଡସିଦ୍ଦେଶୱାର କଳା ମହାବିଦ୍ୟାଳୟରୁ ବିଏ (କଳା ସ୍ନାତକ) ଡିଗ୍ରୀ ହାସଲ କରିଥିଲେ। ସେ ୧୯୮୩ ମସିହାରେ ତାଙ୍କର ବିଏ ଡିଗ୍ରୀ ହାସଲ କରିଥିଲେ। ୧୯୪୯ ମସିହାରେ ପ୍ରତିଷ୍ଠିତ କର୍ଣ୍ଣାଟକ ବିଶ୍ୱ ବିଦ୍ୟାଳୟ ଉତ୍ତର କର୍ଣ୍ଣାଟକର ଏକ ପ୍ରମୁଖ ବିଶ୍ୱବିଦ୍ୟାଳୟ । ଛାତ୍ର ଜୀବନରେ ତାଙ୍କର ସାଧାରଣ ପ୍ରସଙ୍ଗ, ସମାଜ ସେବା ଏବଂ ସାମୁଦାୟିକ ବିକାଶ ପ୍ରତି ଗଭୀର ଆଗ୍ରହ ସୃଷ୍ଟି ହୋଇଥିଲା । ପ୍ରହଲ୍ଲାଦ ଜୋଶୀ ଇଞ୍ଜିନିୟରିଂ, ଆଇନ କିମ୍ବା ପରିଚାଳନା ପଢ଼ି ନଥିଲେ। ସେ ମାନବିକତାରେ ସ୍ନାତକ ଡିଗ୍ରୀ ହାସଲ କରିଛନ୍ତି। ତଥାପି, ସେ କେବଳ ତାଙ୍କର ଶିକ୍ଷାଗତ ବିଦ୍ୟା ପାଇଁ ନୁହେଁ ବ୍ୟାପକ ରାଜନୈତିକ ଅଭିଜ୍ଞତା ପାଇଁ ମଧ୍ୟ ସ୍ୱୀକୃତିପ୍ରାପ୍ତ ।
ପ୍ରହ୍ଲାଦ ଯୋଶୀଙ୍କ ସମ୍ପତ୍ତି- ୨୦୨୪ ଲୋକସଭା ନିର୍ବାଚନ ଶପଥପତ୍ର ଅନୁଯାୟୀ, ପ୍ରହ୍ଲାଦ ଯୋଶୀ ଏବଂ ତାଙ୍କ ପରିବାରର ମୋଟ୍ ସମ୍ପତ୍ତି ୨୧.୦୯ କୋଟି । ତାଙ୍କ ଦେୟ ୮.୦୧ କୋଟି । ତାଙ୍କର ମୋଟ୍ ସ୍ଥାବର ସମ୍ପତ୍ତି ୮.୯୭ କୋଟି ଏବଂ ଅସ୍ଥାବର ସମ୍ପତ୍ତି ୧୨.୧୧ କୋଟି । ସ୍ଥାବର ଦୃଷ୍ଟିରୁ ପ୍ରହ୍ଲାଦ ଯୋଶୀଙ୍କ ପାଖରେ ୨.୭୨ କୋଟି ଟଙ୍କାର ସମ୍ପତ୍ତି ଅଛି । ତାଙ୍କ ପତ୍ନୀଙ୍କ ପାଖରେ ୫.୯୩ କୋଟି ଟଙ୍କାର ସମ୍ପତ୍ତି ଅଛି । ଏଥିରେ ନଗଦ, ବ୍ୟାଙ୍କ ଜମା, ସ୍ଥାୟୀ ଜମା, କମ୍ପାନୀ ସେୟାର, ବୀମା ପଲିସି, ଅଳଙ୍ଗାର ଅନ୍ତର୍ଭୁକ୍ତ ।
