ନୂଆଦିଲ୍ଲୀ,୨।୬: ହରିୟାଣାର ଗୁରୁଗ୍ରାମର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି, ଯେଉଁଥିରେ ଜଣେ ମହିଳା ଗୋମାଂସ ରାନ୍ଧୁଛନ୍ତି। କେବଳ ସେତିକି ନୁହେଁ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କୁ ଖାଇବାକୁ ମଧ୍ୟ ନିମନ୍ତ୍ରଣ କରୁଛନ୍ତି। ଭାଇରାଲ ଭିଡିଓ ପରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରି ମହିଳାଙ୍କୁ ଗିରଫ କରିଛି। ଭିଡିଓରେ, ଜଣେ ମହିଳା ରୋଷେଇ ଘରେ ରୋଷେଇ କରୁଥିବାର ଦେଖାଯାଉଛି, ସେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ନାଁ ବଙ୍ଗଳାରେ ଡାକିଛନ୍ତି। ମହିଳା ଜଣକ ଇଦ୍ ଅଲ-ଆଧା ବା ବକ୍ରିଦ୍ରେ ଗୋମାଂସ ଏବଂ ପଶ୍ଚିମବଙ୍ଗ ରାଜନୀତି ସହିତ ଜଡିତ ପ୍ରସଙ୍ଗ ଉପରେ ନିଜର ଅସନ୍ତୋଷ ପ୍ରକାଶ କରୁଛନ୍ତି ।
ଭିଡିଓରେ, ମହିଳା ଜଣକ କହୁଛନ୍ତି ଯେ ସେ ଏକ କଡେଇରେ ଗୋମାଂସ ରାନ୍ଧୁଛନ୍ତି। ମୁଖ୍ୟମନ୍ତ୍ରୀ ଶୁଭେନ୍ଦୁଙ୍କୁ ସମ୍ବୋଧିତ କରି ସେ କହିଛନ୍ତି, ‘ତୁମେ ଏଥର ଇଦ୍ ଅଲ୍-ଆଧାରେ ମୋତେ ବଳିଦାନ ଦେବାକୁ ଅନୁମତି ଦେଇନାହଁ, ତଥାପି ଆପଣ ଅନ୍ୟ ଲୋକଙ୍କ ଘରକୁ ଯାଇ ଦୁଇ ଗିନା ଲେଖାଏଁ ଗୋମାଂସ ଖାଇଛନ୍ତି।’ ମହିଳା ଜଣକ ଆହୁରି କହିଥିଲେ ଯେ, "ଆପଣ ମାଂସ ଖାଇବାକୁ ଭଲ ପାଆନ୍ତି, ତେଣୁ ମୁଁ ଆପଣଙ୍କ ପାଇଁ ଏହି ଗୋ ମାଂସ ଏବଂ ରୁଟି ରାନ୍ଧିଛି। ଯଦି ଆପଣ ଭାତ ଖାଇବାକୁ ଚାହୁଁଛନ୍ତି, ତେବେ ମୋତେ କହିଦେବେ।’ ଘଟଣାଟି ସେକ୍ଟର-୨୯ ଥାନା ଅଞ୍ଚଳର ଚକରପୁର ଅଞ୍ଚଳର ବୋଲି କୁହାଯାଉଛି। ପୋଲିସର କହିବା ଅନୁଯାୟୀ, ଭାଇରାଲ ଭିଡିଓ ସମ୍ପର୍କରେ ଅଭିଯୋଗ ପାଇବା ପରେ ତଦନ୍ତ କରାଯାଇଥିଲା ଏବଂ ସମ୍ପୃକ୍ତ ମହିଳାଙ୍କୁ ଅଧିକ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଅଟକ ରଖାଯାଇଛି।
ଭିଡିଓର ଶେଷ ଭାଗରେ, ମହିଳା ଜଣକ କ୍ରୋଧର ସହ ମୁଖ୍ୟମନ୍ତ୍ରୀଙ୍କୁ କହୁଛନ୍ତି, ଅତ୍ୟଧିକ ଲୋଭ ଭଲ ନୁହେଁ ଏବଂ ଲୋଭର ପରିଣାମ ଭୟଙ୍କର। ଶୁଭେନ୍ଦୁ ମୁସଲମଙ୍କ ଉପରେ ଅତ୍ୟାଚାର କରୁଛନ୍ତି ଏବଂ ଏଥିପାଇଁ ତାଙ୍କୁ ଆଲ୍ଲାହଙ୍କ ନିକଟରେ ଜବାବ ଦେବାକୁ ପଡିବ। ମହିଳା ଜଣକ କହିଥିଲେ, ‘ତୁମେ ହିନ୍ଦୁମାନଙ୍କୁ ଉସୁକାଉଛ, କିନ୍ତୁ ମନେରଖ, ଆଲ୍ଲାହ ତୁମ ଉପରେ ଅଛନ୍ତି ଏବଂ ସେ ତୁମକୁ ଉଚିତ ଶିକ୍ଷା ଦେବେ।’ ଭିଡିଓଟି ସାମ୍ନାକୁ ଆସିବା ପରେ, ସୋସିଆଲ ମିଡିଆରେ ଲୋକମାନେ ଏହାକୁ ନେଇ ବିଭିନ୍ନ ପ୍ରକାରେ ପ୍ରତିକ୍ରିୟା ଦେଉଛନ୍ତି। ସୋସିଆଲ ମିଡିଆରେ ଯାହାଙ୍କ ନାଁ ଭାଇରାଲ ହେଉଛି, ସେ ହେଉଛନ୍ତି ଗୁରୁଗ୍ରାମର ଚକରପୁର ଜିଲ୍ଲାର ଚନ୍ଦ୍ରାଲୋକ ଅଞ୍ଚଳରେ ଏକ ଭଡା ଘରେ ରହୁଥିବା ଫଜୁର ରେହମାନଙ୍କ ପତ୍ନୀ ଜୋସ୍ନା ବିବି।
