କୁଚିଣ୍ଡା/ଗୌଡ଼ପାଲି, ୧୯/୦୭: ପ୍ରେମ କଲା । ବିବାହ ପ୍ରତିଶ୍ରୁତି ଦେଇ ଶାରୀରିକ ଶୋଷଣ କଲା । ହେଲେ ଜୀବନସାଥୀ କରିବା ବେଳକୁ ଧରାଛୁଆଁ ଦେଲାନି । ବିବାହ ପାଇଁ ଜିଦ୍ ଧରିଥିବା ପ୍ରେମିକାକୁ ତଣ୍ଟି ଚିପି ମାରି ଫିଙ୍ଗିଦେଲା । ଗତ ଗୁରୁବାରଠାରୁ ନିଖୋଜ ଯୁବତୀଙ୍କ କ୍ଷତାକ୍ତ ମୃତଦେହ ବଡ଼ରମା ଘାଟିତଳୁ ଠାବ କରାଯିବା ପରେ ପଦାକୁ ଆସିଛି ପ୍ରେମ-ପ୍ରତାରଣାର ଏଭଳି ଲୋମଟାଙ୍କୁରା କାହାଣୀ ।
ମୃତ ଯୁବତୀ କୁଚିଣ୍ଡା ଥାନା କୁସୁମୀ ଫାଣ୍ଡି ମହୁଲଗୁଡ଼ା ଗାଁର ମନୋଜ ସାଙ୍କ ଝିଅ ସରିତା (୨୪) । ପୁଲିସ୍ ଅଭିଯୁକ୍ତ ପ୍ରେମିକ କୁଚିଣ୍ଡା ଥାନା ତେଲିକୁଣ୍ଡାପୋଷି ଗାଁର ଅନିଲ ପୃଷେଠ ଓ ସହଯୋଗୀ ତଥା ବୋଲେରୋ ଡ୍ରାଇଭର ଅଶୋକ କିସାନକୁ ଗିରଫ କରିଛି । ଅଭିଯୁକ୍ତର ସୂଚନା ଆଧାରରେ ସମ୍ବଲପୁର ଦେବଗଡ଼ ଜାତୀୟ ରାଜପଥ-୫୩ର ବଡ଼ରମା ଘାଟିତଳୁ ଯୁବତୀଙ୍କ ମୃତଦେହ ଉଦ୍ଧାର କରାଯାଇଛି । ହତ୍ୟାରେ ବ୍ୟବହୃତ ଓଢ଼ଣି ଓ ବୋଲେରୋ ଜବତ ହୋଇଛି ।
କୁଚିଣ୍ଡା ଏସ୍ଡିପିଓ ପ୍ରଦୀପ କୁମାର ଦାସଙ୍କ ସୂଚନା ଅନୁସାରେ, ସରିତା କୁଚିଣ୍ଡା ଟାଉନ ହଲ୍ ନିକଟ ଏକ ବ୍ୟୁଟି ପାର୍ଲର୍ରେ କାମ କରୁଥିଲେ । ସେହି ସମୟରେ ଅନିଲ ସହ ତାଙ୍କର ପ୍ରେମ ସମ୍ପର୍କ ଗଢ଼଼ି ଉଠିଥିଲା । ଗତ ୧୭ ତାରିଖରେ ସରିତା ରହସ୍ୟଜନକ ଭାବେ ନିଖୋଜ ହୋଇଯାଇଥିଲେ । ଝିଅକୁ ଅନିଲ ଅପହରଣ କରି ନେଇଥିବା ପରିବାର ତରଫରୁ ଅଭିଯୋଗ ହୋଇଥିଲା । ପୁଲିସ୍ ପ୍ରାଥମିକ ଭାବେ ଏକ ଅପହରଣ ମାମଲା ରୁଜୁ କରିଥିଲା । ଅନିଲକୁ ଅଟକ ରଖି ପଚରାଉଚରା କରିଥିଲା । ଜେରା ବେଳେ ସତ ଓଗାଳିଥିଲା ଅନିଲ । ଏହାପରେ ହତ୍ୟାକାଣ୍ଡର ପର୍ଦ୍ଦାଫାସ ହୋଇଥିଲା ।
ଅଭିଯୁକ୍ତ ପୁଲିସ୍କୁ ଦେଇଥିବା ବୟାନରୁ ଜଣାପଡ଼ିଛି, ଉଭୟଙ୍କ ମଧ୍ୟରେ ପ୍ରାୟ ୨ ବର୍ଷ ହେଲା ପ୍ରେମ ସମ୍ପର୍କ ଥିଲା । ଏ ନେଇ ସେମାନଙ୍କ ପରିବାର ଲୋକେ ଜାଣିଥିଲେ । ସରିତା ବିବାହ ପାଇଁ କହି ଆସୁଥିବାବେଳେ ଅନିଲ ଏହାକୁ ଟାଳି ଆସୁଥିଲା । ହେଲେ ସରିତା ଜିଦ୍ରେ ଅଟଳ ରହିବାରୁ ତାଙ୍କୁ ରାସ୍ତାରୁ ହଟାଇବାକୁ ମାନସିକସ୍ତରରେ ପ୍ରସ୍ତୁତ ହୋଇସାରିଥିଲା । ଗତ ଗୁରୁବାର ସନ୍ଧ୍ୟାରେ ବୁଲିଯିବାକୁ କହି କୁଚିଣ୍ଡାରୁ ଜମନକିରା ପଟକୁ ଆଣିଥିଲା । ବନ୍ଧୁ ଅଶୋକର ବୋଲେରୋରେ ସେମାନେ ବାହାରିଥିଲେ । ଉଭୟେ ପଛ ସିଟ୍ରେ ବସିଥିଲେ । ସରିତାଙ୍କ ସହ କଥା ହେବା ଆଳରେ ଅନିଲ ଓଢ଼ଣିରେ ତାଙ୍କ ତଣ୍ଟି ଚିପି ଶ୍ୱାସରୁଦ୍ଧ କରି ହତ୍ୟା କରିଥିଲା । ପରେ ମୃତଦେହକୁ ବଡ଼ରମା ଘାଟିକୁ ନେଇ ଫିଙ୍ଗିଦେଇଥିଲା ।
ଅଧିକ ପଢ଼ନ୍ତୁ :- ମତ୍ସ୍ୟଜୀବୀଙ୍କୁ ମାଲେମାଲ୍ କରିଦେଲା ଇଲିସି, ୮ ହଜାରରେ ବିକ୍ରି ହେଲା ଗୋଟିଏ ମାଛ...
ଅନିଲର ବୟାନ ଆଧାରରେ ଶନିବାର ମୃତଦେହ ଠାବ କରାଯାଇଥିଲା । ଘଟଣାସ୍ଥଳକୁ ସରିତାଙ୍କ ପିତାଙ୍କୁ ଡକାଯାଇଥିଲା । ପୋଷାକ ଓ ମୁହଁ ଦେଖି ବାପା ମୃତଦେହ ଚିହ୍ନଟ କରିଥିଲେ । ଅନିଲ ଓ ଅଶୋକକୁ ନେଇ ବଡ଼ରମା ଘାଟି ନିକଟରେ ସିନ୍ ରିକ୍ରିଏସନ କରାଯାଇଛି । ସମ୍ବଲପୁରରୁ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ନମୁନା ସଂଗ୍ରହ କରିଛି । ମୃତଦେହ ବ୍ୟବଚ୍ଛେଦ ପାଇଁ ପଠାଯାଇଛି । ବ୍ୟବଚ୍ଛେଦ ରିପୋର୍ଟ ଆସିବା ପରେ ଘଟଣା ସମ୍ପର୍କରେ ଅଧିକ ସୂଚନା ମିଳିପାରିବ ବୋଲି ପୁଲିସ୍ କହିଛି ।
