ନୂଆଦିଲ୍ଲୀ: ସୋମବାର ଚାଇନା ରାଷ୍ଟ୍ରପତି ସି ଜିଙ୍ଗପିଙ୍ଗ ଓ ଋଷିୟ ରାଷ୍ଟ୍ରପତି ଭ୍ଲାଦିମିର ପୁଟିନ ଫୋନ ଯୋଗେ କଥା ହୋଇଛନ୍ତି। ଯୁକ୍ରେନ ଯୁଦ୍ଧକୁ ନେଇ ଉଭୟ ରାଷ୍ଟ୍ରମୁଖ୍ୟଙ୍କ ମଧ୍ୟରେ କଥା ହୋଇଥିବା ଜଣାପଡିଛି। ଏହି ମାମଲାରେ ଚାଇନା ନିଜର କୂଟନୈତିକ ସମର୍ଥନ ଜଣାଇବ ବୋଲି ଘୋଷଣା କରିଛି।
ଚାଇନା ରାଜ୍ୟ ଖବର ସରବରାହ ସଂସ୍ଥା ଜୁହାନ ଟିଭି ଏନେଇ ଖବର ପ୍ରସାରଣ କରିଛି। ଚାଇନା ଯୁଦ୍ଧ ବନ୍ଦ କରିବାକୁ ଉଭୟ ଦେଶକୁ ପରାମର୍ଶ ଦେଉଥିଲା। ବର୍ତ୍ତମାନ ଉଭୟ ଦେଶ ଏନେଇ ପଦକ୍ଷେପ ନେବା ପରେ ଚାଇନା ଏହି ମାମଲାରେ ଖୁସି ବ୍ୟକ୍ତ କରିଛି। ବେଜିଂ ସର୍ବଦା ଶାନ୍ତି ଓ ଯୁଦ୍ଧ ନକରିବା ପାଇଁ ବର୍ତ୍ତା ଦେଇଥାଏ ବୋଲି ରିପୋର୍ଟ ପ୍ରକାଶ ପାଇଛି।
ଅନ୍ୟପଟେ କ୍ରେମିଲିନ ମଧ୍ୟ ଏହି ଦୁଇ ରାଷ୍ଟ୍ରନେତାଙ୍କ ମଧ୍ୟରେ କଥାବର୍ତ୍ତା ହୋଇଥିବା ନେଇ ସୂଚନା ଦେଇଛି। ଉଭୟ ନେତା ଫୋନ ଯୋଗେ ଉଭୟଙ୍କ ସହ କଥା ହୋଇଛନ୍ତି। ତେବେ ଆମେରିକା ଓ ଋଷର ଅଧିକାରିମାନହ୍କ ମଧ୍ୟରେ ହୋଇଥିବା ଆଲୋଚନା ସମ୍ପର୍କରେ ଏହି କଥାବର୍ତ୍ତା ହୋଇଛନ୍ତି ବୋଲି କ୍ରେମଲିନ ଇଙ୍ଗିତ କରିଛି। କିନ୍ତୁ ପ୍ରକୃତରେ କେଉଁ ଘଟଣାକୁ ନେଇ ଉଭୟଦେଶ କଥା ହୋଇଛନ୍ତି ସେନେଇ କ୍ରେମଲିନ କୌଣସି ସୂଚନା ପ୍ରଦାନ କରିନାହିଁ।
ବର୍ତ୍ତମାନ ଚାଇନା ଏହି ବୈଶ୍ୱିକ ବିବାଦରେ ସମ୍ପୂର୍ଣ୍ଣ ଭାବେ ନିରପେକ୍ଷ ଭାବେ କାର୍ଯ୍ୟ କରୁଛି ଓ ଋଷ ସହ ସମସ୍ତ ପ୍ରକାରର ରଣନୈତିକ ସହଭାଗୀତାରେ ସାଥ ଦେଉଛି। ତେବେ ଯୁଦ୍ଧ ନକରି କଥାବର୍ତ୍ତା କରି ଉଭୟପକ୍ଷ ମାମଲାର ସମାଧାନ କରନ୍ତୁ ବୋଲି ଚାଇନା ଆରମ୍ଭରୁ କହି ଆସିଛି। ଗୋଟିଏ ମାସ ମଧ୍ୟରେ ସି ଜିଙ୍ଗପିଙ୍ଗ ଓ ପୁଟିନଙ୍କ ମଧ୍ୟରେ ଏହା ଦ୍ୱିତୀୟ ଥରର କଥାବର୍ତ୍ତା। ଗତ ଜାନୁୟାରୀ ମାସ ୨୧ ତାରିଖରେ ଉଭୟ ନେତା ଭିଡିଓ କଲିଂ ଯୋଗେ କଥାବର୍ତ୍ତା ହୋଇଥିଲେ। ଉଭୟ ଦେଶ ମଧ୍ୟରେ ଭୂ-ରାଜନୈତିକ ସମ୍ପର୍କରେ ଯଥେଷ୍ଟ ବୃଦ୍ଧି ଘଟୁଛି।
ଋଷ ଓ ଆମେରିକାର ଅଧିକାରୀମାନଙ୍କ ମଧ୍ୟରେ ରିୟାଦରେ ଏକ ବୈଠକ ହୋଇଥିଲା। ଯେଉଁଠି ଯୁକ୍ରେନ ଯୁଦ୍ଧ ବନ୍ଦ ଉପରେ ଉଭୟ ପକ୍ଷଙ୍କ ମଧ୍ୟରେ ଆଲୋଚନା ହୋଇଥିଲା। ଏଠାରେ କଣ ନିଷ୍କର୍ଷ ବାହାରିତା ତାହା ଉପରେ ସାରା ବିଶ୍ୱର ନଜର ଥିବା ବେଳେ ପୁଟିନ ୱଏହି ବୈଠକ ବିଷୟରେ ବ୍ରିକ୍ସରେ ଥିବା ନିଜ ସହଯୋଗୀଙ୍କୁ ଜଣାଇବେ ବୋଲି ଘୋଷଣା କରିଥିଲେ।
ତେବେ ଉଭୟ ଋଷ ଓ ଚାଇନା ଏହି ସଂଗଠନର ପ୍ରାରମ୍ଭିକ ସଦସ୍ୟ ହୋଇଥିବାରୁ ଉଭୟ ପକ୍ଷଙ୍କ ମଧ୍ୟରେ ଏହାକୁ ନେଇ ଆଲୋଚନା ହୋଇଥାଇପାରେ ବୋଲି ଅନୁମାନ କରାଯାଉଛି। ତେବେ ବର୍ତ୍ତମାନ ବ୍ରିକ୍ସ ସଂଗଠନରେ ମୋଟ ୧୦ଟି ଦେଶ ସାମିଲ ହୋଇସାରିଥିବା ବେଳେ ବର୍ତ୍ତମାନ ବିଶ୍ୱର ଅନେକ ବଡବଡ ଦେଶ ଏହି ସଂଗଠନରେ ସାମିଲ ହେବାକୁ ଇଚ୍ଛା ପ୍ରକାଶ କରିଛନ୍ତି।
