ଭୁବନେଶ୍ୱର,୦୫/୧୨: ପଟିଆ ରେଳଷ୍ଟେସନସ୍ଥିତ ବିଜୁନଗର ଅଞ୍ଚଳରେ ଗୁରୁବାର ରାତିରେ କିଛି ଦୁର୍ବୃତ୍ତ ଆତଙ୍କ ଖେଳାଇଛନ୍ତି । ସେମାନେ ଜଣେ ଫଳଦୋକାନୀକୁ ଗୋଡ଼ାଇ ହାଣିଛନ୍ତି । ଆକ୍ରମଣରେ ଫଳଦୋକାନୀ ଜଣକ ଗୁରୁତର ଆହତ ହୋଇଛନ୍ତି । ତାଙ୍କ ନାମ ରାଜକୁମାର ସ୍ୱାଇଁ । ତାଙ୍କ ମୁଣ୍ଡ, କାନ୍ଧ ଓ ଶରୀରର ଅନ୍ୟାନ୍ୟ ଜାଗାରେ ଏକାଧିକ ଖଣ୍ଡା ଚୋଟ ବାଜିଛି । ଇନ୍ଫୋସିଟି ଥାନା ପୁଲିସ ଘଟଣାସ୍ଥଳରେ ପହଞ୍ଚି ତନାଘନା ଚଳାଇଛି । ସ୍ଥାନୀୟ ବାସିନ୍ଦାଙ୍କ କହିବା ମୁତାବକ, ଆଜି ରାତି ପ୍ରାୟ ୧୦ଟା ବେଳେ କିଛି ଯୁବକ ୩-୪ଟି ବାଇକ୍ ଧରି ଉକ୍ତ ଅଞ୍ଚଳରେ ଚକ୍କର କାଟିଥିଲେ । ସମସ୍ତେ ହାତରେ ଖଣ୍ଡା ଧରିଥିଲେ । ଜଣେ ଫଳ ଦୋକାନୀ ଏହାକୁ ବିରୋଧ କରିବାରୁ ତାଙ୍କୁ ଗୋଡ଼ାଇ ଗୋଡ଼ାଇ ଆକ୍ରମଣ କରିଥିଲେ ।
