ନୂଆଦିଲ୍ଲୀ: ବାଂଲାଦେଶର ଅନ୍ତରୀଣ ସରକାରଙ୍କ ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସ୍ ବହୁତ ହତାଶ ହୋଇଯାଇଛନ୍ତି। ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନାଙ୍କ ପ୍ରତ୍ୟର୍ପଣକୁ ନେଇ ୟୁନୁସ୍ ନିଜର ଅସହାୟତା ପ୍ରକାଶ କରିଛନ୍ତି। ସେ କହିଛନ୍ତି ଯେ, ଢାକା ଅପଦସ୍ତ ପ୍ରଧାନମନ୍ତ୍ରୀ ଶେଖ ହାସିନାଙ୍କ ପ୍ରତ୍ୟର୍ପଣ ପାଇଁ ଭାରତକୁ "ଔପଚାରିକ ଚିଠି" ପଠାଇଥିଲା କିନ୍ତୁ ଏନେଇ ନୂଆଦିଲ୍ଲୀରୁ"କୌଣସି ସରକାରୀ ଉତ୍ତର" ମିଳିନାହିଁ । ସରକାରୀ ସମାଚାର ଏଜେନ୍ସି ବିଏସଏସ ରିପୋର୍ଟ ଅନୁଯାୟୀ, ବ୍ରିଟେନ ଚ୍ୟାନେଲ ସ୍କାଏ ନ୍ୟୁଜ୍ ସହିତ ଏକ ସାକ୍ଷାତକାରରେ ୟୁନୁସ୍ କହିଛନ୍ତି ଯେ ହସିନାଙ୍କ ବିରୁଦ୍ଧରେ "ମାନବତା ବିରୋଧୀ ଅପରାଧ" ପାଇଁ ମାମଲା ରୁଜୁ କରାଯିବ।

ସୂଚନାଥାଉକି,ଗତବର୍ଷ ବାଂଲାଦେଶରେ ଛାତ୍ର ମାନଙ୍କ ନେତୃତ୍ୱରେ ବିଶାଳ ପ୍ରତିବାଦ ପରେ ୭୭ ବର୍ଷିୟ ହସିନା ଭାରତ ଆସିଥିଲେ ଏବଂ ଅଗଷ୍ଟ ୫ ତାରିଖରୁ ଭାରତରେ ରହିଛନ୍ତି। ବାଂଲାଦେଶର ଆନ୍ତର୍ଜାତୀୟ ଅପରାଧ ଟ୍ରିବ୍ୟୁନାଲ୍ (ICT) "ମାନବତା ବିରୋଧୀ ଅପରାଧ ଏବଂ ନରସଂହାର" ପାଇଁ ହସିନା ଏବଂ ଅନେକ ପୂର୍ବତନ କ୍ୟାବିନେଟ୍ ମନ୍ତ୍ରୀ, ପରାମର୍ଶଦାତା ଏବଂ ସାମରିକ ଏବଂ ବେସାମରିକ ଅଧିକାରୀଙ୍କ ବିରୁଦ୍ଧରେ ଗିରଫ ପରୱାନା ଜାରି କରିଛି। ଏନେଇ ୟୁନୁସ୍ କହିଛନ୍ତି କି,"ଏକ ମାମଲା ରୁଜୁ କରାଯିବ।" କେବଳ ତାଙ୍କ (ହସିନା) ବିରୁଦ୍ଧରେ ନୁହେଁ ବରଂ ତାଙ୍କ ସହିତ ଜଡିତ ସମସ୍ତ ଲୋକଙ୍କ ବିରୁଦ୍ଧରେ ମଧ୍ୟ ହେବ।"

ବାଂଲାଦେଶ ତାଙ୍କ ବିରୁଦ୍ଧରେ ଦୁଇଟି ଗିରଫ ପରୱାନା ଜାରି କରିଛି। ୟୁନୁସ କହିଛନ୍ତି ଯେ ସେ "ଔପଚାରିକ ଚିଠି" ପଠାଇଥିଲେ କିନ୍ତୁ ନୂଆଦିଲ୍ଲୀରୁ "କୌଣସି ସରକାରୀ ଉତ୍ତର" ପାଇନଥିଲେ। ଗତ ବର୍ଷ,ଭାରତ ନୂଆଦିଲ୍ଲୀସ୍ଥିତ ବାଂଲାଦେଶ ହାଇକମିଶନରୁ ଏକ "ନୋଟ୍ ଭର୍ବାଲ୍" କିମ୍ବା କୂଟନୈତିକ ବାର୍ତ୍ତା ପାଇବାକୁ ନିଶ୍ଚିତ କରିଥିଲା କିନ୍ତୁ ଏହା ଉପରେ କୌଣସି ମନ୍ତବ୍ୟ ଦେବାରୁ ନିବୃତ୍ତ ରହିଲା। 'ନୋଟ୍ ଭର୍ବାଲ୍' ହେଉଛି କୂଟନୈତିକ ଯୋଗାଯୋଗର ଏକ ପଦ୍ଧତି। ଏହା କୌଣସି ଦେଶର ପରିସ୍ଥିତି ବର୍ଣ୍ଣନା କରିବା ପାଇଁ କିମ୍ବା କିଛି କାମ ଅନୁରୋଧ କରିବା ପାଇଁ ବ୍ୟବହୃତ ହୁଏ।