ନୂଆଦିଲ୍ଲୀ: ସ୍କଟଲ୍ୟାଣ୍ଡର ଏକ ପ୍ରସିଦ୍ଧ ପର୍ଯ୍ୟଟନ ସ୍ଥଳୀରେ ଦୁଇଜଣ ଭାରତୀୟ ଛାତ୍ର ଦୁର୍ଘଟଣାର ଶିକାର ହୋଇଛନ୍ତି । ପାଣିରୁ ଦୁଇ ଭାରତୀୟ ଛାତ୍ରଙ୍କ ମୃତଦେହ ମିଳିଛି । ଏମାନଙ୍କ ବୟସ ଯଥାକ୍ରମେ ୨୨ ଏବଂ ୨୬ ବର୍ଷ ହୋଇଥିବା ବେଳେ ଏମାନେ ମୂଳତଃ ଆନ୍ଦ୍ରପ୍ରଦେଶର ବାସିନ୍ଦା ।ସୂଚନାନୁସାରେ, ପାଣିରେ ବୁଡିଯିବା କାରଣରୁ ଉଭୟଙ୍କର ମୃତ୍ୟୁ ହୋଇଛି । ଅନ୍ୟ ଚାରିଜଣ ସାଙ୍ଗଙ୍କ ସହିତ ଏହି ଦୁଇଜଣ ପର୍ଯ୍ୟଟନ ସ୍ଥାନ ବୁଲିବାକୁ ଆସିଥିଲେ । ଆଉ ଏହି ସମୟ ମଧ୍ୟରେ ସେମାନେ ପାଣିରେ ବୁଡ଼ି ଯାଇଥିଲେ । ବୁଧବାର ରାତିରେ ଲିନ୍ ଅଫ୍ ଟୁମେ ନିକଟ ଜଳରୁ ଉଭୟ ଛାତ୍ରଙ୍କ ମୃତଦେହ ଉଦ୍ଧାର କରାଯାଇଛି । ସୂଚନାଥାଉକି ଯେ, ଲିନ୍ ଅଫ୍ ଟୁମେ ହେଉଛି ସେହି ସ୍ଥାନ ଯେଉଁଠାରେ ଦୁଇଟି ନଦୀ ମିଳିତ ହୁଏ । ଉଦ୍ଧାର କର୍ମଚାରୀମାନେ ଉଭୟଙ୍କ ମୃତଦେହକୁ ପାଣି ଭିତରୁ ବାହାର କରିଛନ୍ତି । ମୃତଛାତ୍ର ମାନେ ସ୍କଟଲ୍ୟାଣ୍ଡର ଡୁଣ୍ଡି ବିଶ୍ୱବିଦ୍ୟାଳୟର ମାଷ୍ଟର୍ସ କରୁଥିଲେ ।

ଲଣ୍ଡନରେ ଥିବା ଭାରତୀୟ ଉଚ୍ଚ ଆୟୋଗର ଜଣେ ଅଧିକାରୀ କହିଛନ୍ତି ଯେ ଦୁଇ ଛାତ୍ରଙ୍କ ମୃତଦେହ ଝରଣା ଭିତରୁ ଉଦ୍ଧାର କରାଯାଇଛି। ଭାରତୀୟ କନସୁଲେଟ୍ ଜେନେରାଲ ଉଭୟ ଛାତ୍ରଙ୍କ ପରିବାର ସହ ଯୋଗାଯୋଗ କରିଛନ୍ତି । କନସୁଲେଟର ଜଣେ ପ୍ରତିନିଧୀ ବ୍ରିଟେନରେ ରହୁଥିବା ଜଣେ ଛାତ୍ରଙ୍କୁ ଭେଟିଛନ୍ତି । ଡୁଣ୍ଡି ବିଶ୍ୱବିଦ୍ୟାଳୟ ପୀଡିତଙ୍କ ପରିବାରକୁ ସବୁ ପ୍ରକାର ସାହାଯ୍ୟ କରିବାକୁ ପ୍ରତିଶୃତି ଦେଇଛି। ଅଧିକାରୀ କହିଛନ୍ତି ଯେ ଉଭୟ ଛାତ୍ରଙ୍କ ପୋଷ୍ଟମର୍ଟମ ଶୁକ୍ରବାର ଦିନ କରାଯିବ ଏବଂ ଏହା ପରେ ମୃତଦେହକୁ ଭାରତ ପଠାଇବା ପ୍ରକ୍ରିୟା ଆରମ୍ଭ ହେବ।