ଅମରାବତୀ: ଆନ୍ଧ୍ରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁଙ୍କ ପୁଅ ଏବଂ ବିଧାୟକ ପ୍ରାର୍ଥୀ ନାରା ଲୋକେଶଙ୍କ ସଂପତ୍ତିକୁ ନେଇ ଚର୍ଚ୍ଚା ଲାଗି ରହିଛି । ନିର୍ବାଚନ ଲାଗି ସେ ଦେଇଥିବା ସତ୍ୟପାଠରେ ତାଙ୍କର ସଂପତ୍ତି ସଂପର୍କରେ ଜଣାପଡ଼ିଛି । ନାରା ଲୋକେଶ ଏବଂ ତାଙ୍କ ପତ୍ନୀ ବ୍ରାହ୍ମଣୀଙ୍କ ସଂପତ୍ତି ଗତ ୫ ବର୍ଷ ମଧ୍ୟରେ ୧୬୯ କୋଟି ଟଙ୍କା ବୃଦ୍ଧି ପାଇଛି । ୨୦୧୯ରେ ନାରା ଲୋକେଶଙ୍କ ସଂପତ୍ତିର ମୂଲ୍ୟ ୩୭୩ କୋଟି ଟଙ୍କା ଥିବା ବେଳେ ଏବେ ତାଙ୍କ ପାଖରେ ୫୪୨ କୋଟି ଟଙ୍କାର ସଂପତ୍ତି ରହିଛି ।
ମଙ୍ଗାଳାଗିରି ଆସନରୁ ତେଲୁଗ ଦେଶମ ପାର୍ଟି ବା ଟିଡିପିର ବିଧାୟକ ପ୍ରାର୍ଥୀ ନାରା ଲୋକେଶ ଦେଇଥିବା ସତ୍ୟପାଠରେ ଏନେଇ ଜଣାଇଛନ୍ତି । ପତ୍ନୀ ଓ ପୁଅଙ୍କ ସମେତ ତାଙ୍କର ମୋଟ ସ୍ଥାବର ଓ ଅସ୍ଥାବର ସଂପତ୍ତିର ମୂଲ୍ୟ ୫୪୨ କୋଟି ଟଙ୍କା ୪୧ ବର୍ଷୀୟ ନାରା ଲୋକେଶ ଏବଂ ତାଙ୍କ ପତ୍ନୀଙ୍କ ପାଖରେ ୩୯୪ କୋଟି ଟଙ୍କାର ଅସ୍ଥାବର ସଂପତ୍ତି ରହିଛି । ଏଥିରେ ହେରିଟେଜ୍ ଫୁଡସ୍, ନିର୍ବାଣ ହୋଲ୍ଡିଂସ୍ ଏବଂ ମେଗାବିଡ ଫାଇନାନ୍ସରେ ସେମାନଙ୍କର ସେୟାର ରହିଛି ।ଲୋକେଶଙ୍କ ସ୍ଥାବର ସଂପତ୍ତି ହାଇଦ୍ରାବାଦର ଜୁବଲି ହିଲ୍ସ, ମାଣିକୋଣ୍ଡା, ମାଦିନାଗୁଡା ଏବଂ ମାଧପୁରରେ ରହିଛି ।ସେହିଭଳି ୨୦୨୨-୨୩ରେ ଘରଭଡ଼ା ବାବଦକୁ ମୋଟ ୧୮ କୋଟି ଟଙ୍କା ପାଇଛନ୍ତି ଲୋକେଶ ଏବଂ ତାଙ୍କ ପରିବାର ।
ନାରା ଲୋକେଶଙ୍କ କେବଳ ଯେ ସଂପତ୍ତି ବୃଦ୍ଧି ପାଇଛି ତାହା ନୁହେଁ ବରଂ ତାଙ୍କ ବିରୋଧରେ ଅପରାଧିକ ମାମଲା ବି କିଛି କମ୍ ନାହିଁ । ଅମରାବତୀ ଇନର ରୋଡ୍ ଦୁର୍ନୀତି ସହ ତାଙ୍କ ନାଁରେ ୨୪ଟି ଅପରାଧିକ ମାମଲା ରହିଛି । ତେବେ ଷ୍ଟାନଫୋର୍ଡ ୟୁନିଭର୍ସିଟିରୁ ଏମବିଏ କରିଥିବା ଲୋକେଶ ଏବେ ରାଜନୀତିରେ ବେଶ ସକ୍ରିୟ ଅଛନ୍ତି । ସେପଟେ ଆନ୍ଧ୍ରପ୍ରଦେଶର ୧୭୫ ବିଧାନସଭା ଏବଂ ୨୫ଟି ଲୋକସଭା ଆସନରେ ମେ ୧୩ରେ ନିର୍ବାଚନ ହେବାକୁ ଯାଉଛି ।
ଅନ୍ୟପଟେ ୨୦୧୪ରୁ ଲୋକେଶ ରାଜନୀତିରେ ଏଣ୍ଟ୍ରି କରିଥିଲେ । ଟିଡିପିର ସାଧାରଣ ସଂପାଦକ ହେବା ସହ ଦଳୀୟ ନିଷ୍ପତ୍ତିରେ ତାଙ୍କର ବଡ଼ ଭୂମିକା ରହିଛି । ଦଳର ପଲିସି ପ୍ରସ୍ତୁତିରେ ସକ୍ରିୟ ଅଂଶଗ୍ରହଣ କରିଆସିଛନ୍ତି ଲୋକେଶ ।୨୦୧୭ରେ ସେ ବିଧାନ ପରିଷଦକୁ ନିର୍ବାଚତି ହେବା ସହ ମନ୍ତ୍ରୀ ହୋଇଥିଲେ । ପଞ୍ଚାୟତି ରାଜ ଏବଂ ଆଇଟି ମନ୍ତ୍ରୀ ହୋଇଥିଲେ ନାରା ଲୋକେଶ ।
ମନ୍ତ୍ରୀ ଥିବା ସମୟରେ ନିଜର କାର୍ଯ୍ୟଶୈଳୀ ପାଇଁ ସେ ଏକାଧିକ ଆଓ୍ବାର୍ଡ ମଧ୍ୟ ପାଇଛନ୍ତି । ପରେ ୨୦୧୯ ନିର୍ବାଚନରେ ମଙ୍ଗଳାଗିରି ବିଧାନସଭା ମଣ୍ଡଳୀରୁ ଭାଗ୍ୟ ପରୀକ୍ଷା କରିଥିଲେ ସେ । ହେଲେ ତାଙ୍କୁ ଓ୍ବାଇଏସଆର କଂଗ୍ରେସର ଆଲା ରାମକୃଷ୍ଣ ରେଡ୍ଡୀଙ୍କ ପାଖରୁ କମ୍ ଭୋଟ ବ୍ୟବଧାନରେ ପରାସ୍ତ ହେବାକୁ ପଡ଼ିଥିଲା । ଏହା ପରେ ପୁଣି ଚଳିତ ନିର୍ବାଚନରେ ମଙ୍ଗଳାଗିରି ଆସନରୁ ପ୍ରାର୍ଥୀ ହୋଇଛନ୍ତି ନାରା ଲୋକେଶ । ତେବେ ୨୦୦୭ରେ ନିଜର ସଂପର୍କୀୟ ଭଉଣୀ ତଥା ଅଭିନେତା ଏବଂ ରାଜନେତା ନନ୍ଦାମୁରି ବାଲାକ୍ରିଷ୍ଣାଙ୍କ ଝିଅ ବ୍ରାହ୍ମଣୀଙ୍କୁ ବିବାହ କରିଥିଲେ । ଲୋକେଶ ଏବଂ ବ୍ରାହ୍ମଣୀଙ୍କ ଏକ ପୁତ୍ର ସନ୍ତାନ ଦେବାଂଶ ଅଛନ୍ତି ।