ଭୁବନେଶ୍ୱର,୦୩/୦୫: ଅପରାଧ ମୁକାବିଲାଠାରୁ ଆରମ୍ଭ କରି ଆଇନଶୃଙ୍ଖଳା ପରିସ୍ଥିତି ନିୟନ୍ତ୍ରଣ, ସବୁଥିରେ ଫେଲ୍ ମାରିଛି କମିସନରେଟ୍ ପୁଲିସ । ଅସଜଡ଼ା ଭିତ୍ତିଭୂମି ହିଁ କମିସନରେଟ୍ ପୁଲିସର ଏହି ବିଫଳତାର କାରଣ । ଗୋଟିଏ କି ଦୁଇଟି ନୁହେଁ, ଅନେକ କ୍ଷେତ୍ରରେ ପୁଲିସର ଭିତ୍ତିଭୂମି ଅସଜଡ଼ା ଅବସ୍ଥାରେ ପଡ଼ିରହିଛି । ସେଥିରୁ ଗୋଟିଏ ବଡ଼ ଅସଜଡ଼ା ବ୍ୟବସ୍ଥା ହେଉଛି ପିସିଆର୍ ଭ୍ୟାନ୍ । ଏହି ପିସିଆର ଭ୍ୟାନ୍ ବ୍ୟବସ୍ଥା ଦିନକୁ ଦିନ ଦୁର୍ବଳ ହେବାରେ ଲାଗିଛି । ଏବେ କମିଶନରେଟ୍ ପୁଲିସ୍ରେ ଥିବା ୩୭ଟି ପିସିଆରରେ ଲାଗିଥିବା ସିସିକ୍ୟାମେରା ଗାଏବ ହୋଇଯାଇଛି ।
ରାଜଧାନୀରେ ୩୭ଟି ପିସିଆର୍ ଭ୍ୟାନ୍ ବୁଲୁଛି । ଅପରାଧୀକୁ ଠାବ କରିବା, ଅସାମାଜିକଙ୍କୁ ଚିହ୍ନଟ କରିବା ଓ ଆଇନ ଉଲ୍ଲଂଘନକାରୀଙ୍କ ଉପରେ ନଜର ରଖିବା ଲାଗି ୬ବର୍ଷ ତଳେ ଭୁବନେଶ୍ୱରରେ ଥିବା ସମସ୍ତ ପିସିଆର ଭ୍ୟାନ୍ରେ ସିସି କ୍ୟାମେରା ଓ ଜିପିଆରଏସ୍ ଖଞ୍ଜା ଯାଇଥିଲା । ଘଟିଥିବା ଅପରାଧ କିମ୍ୱା ଗଣ୍ଡଗୋଳର ଚିତ୍ର ଉତ୍ତୋଳନ କରିବା ଯୋଜନା ଥିଲା । କିନ୍ତୁ ଏବେ ମାତ୍ର ୨ଟି ପିସିଆର୍ ଭ୍ୟାନ୍ରେ ସିସି କ୍ୟାମେରା ଅଛି । ତା’ପୁଣି ଅଚଳ ଅବସ୍ଥାରେ । ବାକି ୩୫ଟିରେ ସିସି କ୍ୟାମେରା ନାହିଁ । ସିସି କ୍ୟାମେରା ଥିଲାବେଳେ ପିସିଆର ଭ୍ୟାନ ସେମିତି କୌଣସି ଅପରାଧୀଙ୍କୁ କାବୁ କରିବାରେ ସଫଳ ବି ହୋଇନାହିଁ । ସିସି କ୍ୟାମେରା ନଥାଇ ଚଳିତ ବର୍ଷ ସେମିତି କୌଣସି ସଫଳତା ମଧ୍ୟ ପାଇନାହିଁ ପିସିଆର୍ ଭ୍ୟାନ୍ । ଏଯାବତ ଜଣେ ହେଲେ ଲୁଟେରା ପିସିଆର୍ ଭ୍ୟାନ୍ ହାତରେ ଧରାପଡ଼ି ନାହାନ୍ତି । କେବଳ କିଛି ଅସହାୟ ଓ ଦୁର୍ଘଟଣାରେ ଆହତ ବ୍ୟକ୍ତିଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଛି । ମାତ୍ର ଲୁଟ୍, ଛିନତାଇ, ଚୋରି ଭଳି ଘଟଣାରେ ଅପରାଧୀଙ୍କୁ ଧରିବା ଦିଗରେ ପିସିଆର୍ ଭ୍ୟାନ୍ ଫେଲ୍ ମାରିଥିବାରୁ ଏହି ସେବା କେତେ ଦୁର୍ବଳ, ତାହା ଜଳଜଳ ହୋଇ ଦେଖାଯାଉଛି ।
ଖାଲି ଯେ କ୍ୟାମେରା ନାହିଁ ସେ କଥା ନୁହେଁ । କୌଣସି ପିସିଆର୍ ଭ୍ୟାନ୍ରେ ଦକ୍ଷ ଅଧିକାରୀ ବି ନାହାନ୍ତି । କାମଚଳା ପାଇଁ ଅବସରପ୍ରାପ୍ତ ସେନା କିମ୍ୱା ଅର୍ଦ୍ଧସାମରିକ ବାହିନୀର କର୍ମଚାରୀଙ୍କୁ ନିଯୁକ୍ତି ଦିଆଯାଇଛି । ଗୋଟିଏ ସିଫ୍ଟରେ ଏହି ଏସପିଓ(ସ୍ପେଶାଲ ପୁଲିସ ଅଫିସର) ରହୁଥିବା ବେଳେ ଅନ୍ୟ ସିଫ୍ଟରେ ହାବିଲ୍ଦାରରେ କାମ ଚଳୁଛି । ତେଣୁ କେଉଁ ପରିସ୍ଥିତିରେ କ’ଣ ପଦକ୍ଷେପ ନେବାକୁ ହେବ, ସେମାନେ ନିଷ୍ପତ୍ତି ନେଇପାରୁନାହାନ୍ତି । ସେଥିପାଇଁ ବହୁ ସମୟରେ ସମସ୍ୟା ଉପୁଜୁଛି । ତେଣୁ ଏହି ଗୁରୁତ୍ୱପୂର୍ଣ୍ଣ ସେବାରେ କାହିଁକି ଏସପିଓଙ୍କୁ ନିଯୁକ୍ତି କରାଯାଇଛି, ତାକୁ ନେଇ ପ୍ରଶ୍ନ ଉଠିଛି ।
ଅନ୍ୟପକ୍ଷରେ କେତେବେଳେ ପିସିଆର ଭ୍ୟାନ୍କୁ କର୍ମଚାରୀମାନେ ଠେଲୁଛନ୍ତି ତ’ ପୁଣି କେତେବେଳେ ଟଣା ଗାଡି ଟାଣି ଟାଣି ନେଉଥିବା ଦେଖାଯାଉଛି । ତା’ଛଡା ତେଲ ପାଇଁ ବି ଅଧିକାଂଶ ସମୟ ପିସିଆର ଠିଆ ହୋଇ ରହୁଛି । ରାଜଧାନୀର ୨୮ଟି ଥାନା ପାଇଁ ୩୭ଟି ପିସିଆର ଭ୍ୟାନ୍ ଚାଲୁଛି । କ୍ୟାପିଟାଲ୍ ଓ ଖଣ୍ଡଗିରି ଥାନା ଅଧୀନରେ ସର୍ବାଧିକ ୩ଟି ଲେଖାଁ ପିସିଆର ଭ୍ୟାନ୍ ରହିଥିବା ବେଳେ ପ୍ରମୁଖ ଥାନାଗୁଡ଼ିକରେ ଦୁଇଟି ଲେଖାଏଁ ରହୁଛି । ଭରତପୁର, ମୈତ୍ରୀବିହାର, ଇନ୍ଫୋଭ୍ୟାଲ୍ଳୀ ଭଳି ଥାନାକୁ ମାତ୍ର ଗୋଟିଏ ପିସିଆର ମିଳିଛି ।
ପ୍ରତି ପିସିଆରକୁ ଦିନକୁ ୧୦ ଲିଟର ତେଲ ମିଳୁଛି । ବର୍ତ୍ତମାନ କମିଶନରେଟ୍ ପୁଲିସ୍ରେ ଥିବା ପିସିଆର ଭ୍ୟାନ୍ର ୧ ଲିଟର ତେଲରେ ୮/୧୦ କିଲୋମିଟର ଯାଉଛି । ୮ ଘଣ୍ଟା ଲେଖାଏଁ ୩ଟି ସିଫ୍ଟରେରେ ୨୪ ଘଣ୍ଟା ପାଟ୍ରୋଲିଂ କରୁଛି । ସିଫ୍ଟ ପିଛା ୩ ଲିଟର ୩୦୦ ମିଲିଗ୍ରାମ୍ ତେଲ ଖର୍ଚ୍ଚ କଲେ ଗୋଟିଏ ଦିନ ଯିବ । ଅର୍ଥାତ ଗୋଟିଏ ପିସିଆର ଭ୍ୟାନ୍ ଗୋଟିଏ ସିଫ୍ଟରେ ୨୫ରୁ ୩୦ କିଲୋମିଟର ପାଟ୍ରୋଲିଂର କ୍ଷମତା ରହିଛି । ଯଦି କୌଣସି କାମରେ ଅଧିକ ତେଲ ଖର୍ଚ୍ଚ ହେଲା ତାହେଲେ କଥା ସରିଲା । ଯେଉଁ ଥାନାକୁ ୩ଟି ଲେଖାଏଁ ପିସିଆର ମିଳିଛି ତାଙ୍କର ତେଲ ସରିଲେ ଚିନ୍ତା ନାହିଁ । ହେଲେ ଯାହର ଗୋଟିଏ କି ଦୁଇଟି ପିସିଆର ଭ୍ୟାନ୍ ଅଛି ସେମାନେ ମାପିଚୁପି ପାଟ୍ରୋଲିଂ କରୁଥିବା ଦେଖିବାକୁ ମିଳିଛି । ଏନେଇ ପିସିଆର କଣ୍ଟ୍ରୋଲ୍ ରୁମ୍ର ଇନ୍ଚାର୍ଜ କହିଛନ୍ତି କିଛି ପିସିଆରରେ କ୍ୟାମେରା ଲାଗିଛି । ଯଦି କାହାର ନାହିଁ ସେ ସବୁ ଲଗାଯିବ । ଗଳିକନ୍ଦିରେ ୨୪ ଘଣ୍ଟିଆ ପାଟ୍ରେଲିଂ ହେଉଛି । ସେଥିପାଇଁ ତେଲ ମସମ୍ୟ ଦେଖା ଦେଉଛି । ଯାହା ଖୁବ୍ ଶୀଘ୍ର ସମାଧାନ କରାଯିବ ।
