ନୂଆଦିଲ୍ଲୀ: ଇରାନ ପକ୍ଷରୁ ଇସ୍ରାଏଲ ଉପରେ ଆକ୍ରମଣ ପରେ ମଧ୍ୟପ୍ରାଚ୍ୟର ସ୍ଥିତି ପ୍ରତି ମୁହୂର୍ତ୍ତରେ ବଦଳୁଛି। ପରିସ୍ଥିତି ଏପରି ହୋଇଗଲାଣି ଯେ, ଏହା ସିଧାସଳଖ ବିଶ୍ବର ଦେଶ ଉପରେ ପ୍ରଭାବ ପକାଉଛି । ଏହି ସମୟରେ, ଇସ୍ରାଏଲ୍ ଏବଂ ଇରାନ ମଧ୍ୟରେ ବଢୁଥିବା ତିକ୍ତତା ପରେ ପଶ୍ଚିମ ଏସିଆରେ ବିଗୁଡୁଥିବା ସମୀକରଣକୁ ଦୃଷ୍ଟିରେ ରଖି ଆମେରିକାର ଜାତୀୟ ସୁରକ୍ଷା ପରାମର୍ଶଦାତା ଜେକେ ସଲିଭାନ୍ ଏହି ସପ୍ତାହରେ ଭାରତ ଗସ୍ତକୁ ସ୍ଥଗିତ ରଖିଛନ୍ତି ।

ବାଇଡେନ ସରକାରଙ୍କ ଅଧିକାରୀ ତାଙ୍କ ଭାରତୀୟ ପ୍ରତିପକ୍ଷ ଅଜିତ ଡୋଭାଲଙ୍କ ସହ ICET ପ୍ରସଙ୍ଗରେ ଆଲୋଚନା କରିବାର ଥିଲା । ଚଳିତ ବର୍ଷ ଦ୍ୱିତୀୟ ଥର ପାଇଁ ସଲିଭାନ୍ ତାଙ୍କର ଭାରତ ଗସ୍ତକୁ ସ୍ଥଗିତ ରଖିଛନ୍ତି । ଆମେରିକାର ଦୂତାବାସ ମୁଖପାତ୍ର କହିଛନ୍ତି ଯେ ପଶ୍ଚିମ ଏସିଆରେ ଚାଲିଥିବା ଘଟଣାକ୍ରମ ହେତୁ ସଲିଭାନ୍ ଭାରତ ଗସ୍ତକୁ ଏହି ସପ୍ତାହରେ ସ୍ଥଗିତ ରଖିଛନ୍ତି।

ଆମେରିକା ଦୂତାବାସ ମୁଖପାତ୍ର କହିଛନ୍ତି ଯେ, ସଲିଭାନ୍ ଭାରତ ସହ ଆମର ବହୁମୁଖୀ ଭାଗିଦାରୀକୁ ଆଗକୁ ବଢାଇବାକୁ ପ୍ରତିଶ୍ରୁତିବଦ୍ଧ । ରାଷ୍ଟ୍ରପତି ଜୋ ବାଇଡେନ କ୍ବାଡ ନେତାଙ୍କ ଆଗାମୀ ବୈଠକରେ ସାମିଲ ହେବା ପାଇଁ ମଧ୍ୟ ଉତ୍ସାହିତ । ଚଳିତ ବର୍ଷ ଜାନୁଆରୀରେ ଭାରତରେ କ୍ୱାଡ ନେତାଙ୍କ ବୈଠକ ଅନୁଷ୍ଠିତ ହେବାର ଥିଲା । ହେଲେ ଜୋ ବାଇଡେନ କୌଣସି କାରଣରୁ ଭାରତ ଆସିପାରି ନଥିବାରୁ ଏହି ବୈଠକ ହୋଇପାରି ନଥିଲା ।