କୋଝିକୋଡା,୧୬।୫: କେରଳ କୋଝିକାଡ ମେଡିକାଲ କଲେଜରୁ ଆସିଛି ଏକ ଆଶ୍ଚର୍ଯ୍ୟ କରିଦେବା ଭଳି ଘଟଣା। ଜଣେ ୪ ବର୍ଷୀୟ ଝିଅ କିଭଳି ଗୁରୁତର ଚିକିତ୍ସା ଅବହେଳାର ଶିକାର ହୋଇଛି,ତାହା ସମସ୍ତଙ୍କୁ ଚକିତ କରିଛି। ପରିବାର ଲୋକଙ୍କ କହିବା ଅନୁସାରେ,ଝିଅଟିର ହାତରେ ୬ଟି ଆଙ୍ଗୁଳିଥିଲା। ଅଧିକ ଗୋଟିଏ ଆଙ୍ଗୁଠି ଥିବାର ପରିବାର ଲୋକେ ହସ୍ପିଟାଲକୁ ଆଣିଥିଲେ ଅପରେସନ୍ ପାଇଁ, କିନ୍ତୁ ଡାକ୍ତର ଆଙ୍ଗୁଠି ବଦଳରେ ଝିଅଟିର ଜିଭର ଅପରେସନ୍ କରିଦେଲେ।
ଝିଅଟିର ସମ୍ପର୍କୀୟ କହିଛନ୍ତି, ଆମକୁ କୁହାଯାଇଥିଲା ୬ଟି ଆଙ୍ଗୁଠି ଭିତରୁ ଗୋଟିଏକୁ ସର୍ଜରୀ କରି ହଟାଇ ଦିଆଯାଇ ପାରିବ, ତେଣୁ ଆମେ ରାଜି ହୋଇଗଲୁ। ଅଳ୍ପ ସମୟ ପରେ ଯେତେବେଳେ ଝିଅକୁ ଅଣାଗଲା ଆମେ ଦେଖିକି ଆଶ୍ଚର୍ଯ୍ୟ ହୋଇଗଲୁ, କାରଣ ପାଟିରେ ପ୍ଲାଷ୍ଟର ଲାଗିଥିଲା। ଆମେ ଜାଣି ପାରିଲୁନି କ’ଣ ହୋଇଛି ? ଯେତେବେଳେ ଆମେ ତା’ର ହାତକୁ ଦେଖିଥିଲୁ ୬ଟି ଆଙ୍ଗୁଠି ଥିଲା।
ଏ ବିଷୟରେ ଯେତେବେଳେ ନର୍ସଙ୍କୁ ପଚରାଗଲା ସେ ଏହା ଶୁଣି ହସିଥିଲେ। ଆମକୁ କହିଥିଲେ ଝିଅଟିର ଜିଭରେ ସମସ୍ୟା ଥିଲା, ଆଉ ଆମେ ଏହାକୁ ଠିକ୍ କରିଦେଇଛୁ। ପରେ ଡାକ୍ତର ନିଜର ଭୁଲ ବୁଝିପାରି କ୍ଷମା ମାଗିଥିଲେ। ଏହାପରେ କହିଥିଲେ, ଆଙ୍ଗୁଠିର ସର୍ଜରୀ ହେବ ଓ ଏହାପରେ ଝିଅକୁ ନେଇକି ଯାଇଥିଲେ।
ଏଭଳି ସମ୍ବେଦନଶୀଳ ମାମଲା ସାମନାକୁ ଆସିବା ପରେ ଅଧିକାରୀମାନେ ଘଟଣାର ତଦନ୍ତ ନିର୍ଦେଶ ଦେଇଛନ୍ତି। ତେବେ ଏହି ହସ୍ପିଟାଲରେ ଏହା ପ୍ରଥମ ଘଟଣା ନୁହେଁ। ପୂର୍ବରୁ ୩୦ ବର୍ଷୀୟ ଜଣେ ମହିଳା ମଧ୍ୟ ଡାକ୍ତରଙ୍କ ଅବହେଳାର ଶିକାର ହୋଇଛନ୍ତି। ତାଙ୍କର ସିଜରିଆନ୍ ବେଳେ ଡାକ୍ତରମାନେ ପେଟ ଭିତରେ କଇଁଞ୍ଚି ଭୁଲରେ ଛାଡି ଦେଇଥିଲେ। ମହିଳାଙ୍କ ପେଟରେ ଯନ୍ତ୍ରଣା ହେବାପରେ ଡାକ୍ତରଙ୍କ ଅବହେଳା ଜଣାପଡିଥିଲା। ଦୋଷୀ ଷ୍ଟାଫ୍ଙ୍କୁ ଚିହ୍ନଟ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା।