ନୂଆଦିଲ୍ଲୀ,୧୬।୮: ଗତ ଦୁଇ ବର୍ଷ ମଧ୍ୟରେ କାନାଡାରେ ସ୍ଥାୟୀ ଏବଂ ଅସ୍ଥାୟୀ ବାସିନ୍ଦା ବର୍ଗ ପାଇଁ ହୋଇଥିବା ଆବେଦନ ଏବେ ବହୁ ସଂଖ୍ୟାରେ ଖାରଜ ହୋଇଛି । କାନାଡିୟ ଗଣମାଧ୍ୟମ ଟୋରଣ୍ଟୋ ଷ୍ଟାର ଫେଡେରାଲ ରିପୋର୍ଟ ଅନୁସାରେ ଏହାର ମୁଖ୍ୟ କାରଣ ହେଉଛି ଯୋଗ୍ୟତା ନିୟମରେ ପରିବର୍ତ୍ତନ। ଏହା ସହ କଠୋର ନୀତିଗତ ପଦକ୍ଷେପ ଏବଂ ମାମଲାଗୁଡ଼ିକୁ ଶୀଘ୍ର ସମାଧାନ କରିବା ପାଇଁ ଅଧିକାରୀଙ୍କ ଉପରେ ଚାପ।
ସମାଲୋଚକଙ୍କ ମତରେ ଏହି ଚାପ ଅଧିକାରୀମାନଙ୍କୁ ତରବରିଆ ନିଷ୍ପତ୍ତି ନେବାକୁ ବାଧ୍ୟ କରୁଛି। ନିକଟରେ କିଛି ବର୍ଷରେ କାନାଡିୟ ଇମିଗ୍ରେସନ ବିଭାଗ ମାମଲାଗୁଡ଼ିକୁ ହ୍ରାସ କରିବାକୁ ଚେଷ୍ଟା କରିଛି। ଦେଶରେ ଅସ୍ଥାୟୀ ବାସିନ୍ଦାଙ୍କ ସଂଖ୍ୟା ହ୍ରାସ କରି ପ୍ରବାସୀଙ୍କୁ ଆର୍ଥିକ ପ୍ରାଥମିକତା ପାଇଁ ସଂଘୀୟ ସରକାର ପଦକ୍ଷେପ ଗ୍ରହଣ କରିଛନ୍ତି। ସେପ୍ଟେମ୍ବର ୨୦୨୪ ରେ, ୨୦୨୫ ପାଇଁ ଷ୍ଟଡି ପରମିଟ୍ ମଞ୍ଜୁରୀରେ ୧୦ ପ୍ରତିଶତ ହ୍ରାସ କରି ୪୮୫,୦୦୦ ରୁ ୪୩୭,୦୦୦ କୁ ହ୍ରାସ ପାଇଛି।
ଏହାଛଡା ୧ ନଭେମ୍ବର ୨୦୨୪ ରୁ ପୋଷ୍ଟ ଗ୍ରାଜୁଏସନ୍ ଓ୍ବାର୍କ ପରମିଟ୍ ଆବେଦନ ପାଇଁ ନୂଆ ଭାଷା ଆବଶ୍ୟକତା ଲାଗୁ ହୋଇଯାଇଛି। ଏହା ଅନୁସାରେ ବିଶ୍ବ ବିଦ୍ୟାଳୟର ସ୍ନାତକ ପାଇଁ କାନାଡୀୟ ଭାଷା ବେଞ୍ଚମାର୍କ (ସିଏଲ୍ବି) ସ୍ତର ୭ ଓ କଲେଜର ସ୍ନାତକ ପାଇଁ ସିଏଲ୍ବି ସ୍ତର ୫ ବାଧ୍ୟତାମୂଳକ କରି ଦିଆଯାଇଛି। ଚଳିତ ବର୍ଷ ୨୧ ଜାନୁଆରୀରେ ପାରିବାରିକ ଓପନ ଓ୍ବାର୍କ ପରମିଟ୍ରେ ପରିବର୍ତ୍ତନ କରାଯାଇଛି, ଯାହାଫଳରେ ବିଦେଶୀ କର୍ମଚାରୀ ଓ ଅନ୍ତର୍ଜାତୀୟ ଛାତ୍ରଙ୍କ ଜୀବନସାଥୀ ଓ ପିଲାଙ୍କ ପାଇଁ ଯୋଗ୍ୟତାକୁ କଡା କରି ଦିଆଯାଇଛି। ଛାତ୍ରଛାତ୍ରୀଙ୍କ ସ୍ୱାମୀ/ସ୍ତ୍ରୀ ଏବେ କେବଳ ସେତେବେଳେ ଯୋଗ୍ୟ ହେବେ ଯଦି ମୁଖ୍ୟ ଆବେଦନକାରୀ ଅତି କମରେ ୧୬ ମାସର ମାଷ୍ଟର୍ସ ପ୍ରୋଗ୍ରାମ୍, ଡକ୍ଟରେଟ୍ ପ୍ରୋଗ୍ରାମ୍ କିମ୍ବା ସ୍ୱତନ୍ତ୍ର ବୃତ୍ତିଗତ ପ୍ରୋଗ୍ରାମରେ ଥିବେ। ୨୦୨୫ ର ପ୍ରଥମ ପାଞ୍ଚ ମାସର ତଥ୍ୟ ସ୍ଥାୟୀ ବାସିନ୍ଦା କାଟାଗୋରୀରେ ପ୍ରତ୍ୟାଖ୍ୟାନ ହାରରେ ବୃଦ୍ଧି ଦର୍ଶାଉଛି।
