ପାଳଲହଡା,୧୪।୮ : ପାଳଲହଡା ବ୍ଳକ ଖମାର ଥାନା ଅନ୍ତର୍ଗତ ଶଙ୍ଖମୁର ପଞ୍ଚାୟତର ସମିତିସଭ୍ୟ ତଥା ଶଙ୍ଖମୁର ପଞ୍ଚୟାତ ସଭାପତି ନୀଳମାଧଵ ପ୍ରଧାନଙ୍କୁ ଗତ ୧୦ ତାରିଖ ସନ୍ଧ୍ୟାରେ ସଂଘବଦ୍ଧ ଆକ୍ରମଣ ହୋଇଥିଲା। ଘଟଣାକୁ ଚାରି ଦିନ ବିତିଯାଇଥିଲେ ମଧ୍ୟ ଅଭିଯୁକ୍ତମାନଙ୍କୁ ପୁଲିସ ଗିରଫ କରି ନାହିଁ। ଅଭିଯୁକ୍ତମାନଙ୍କୁ ଗିରଫ ଦାବିରେ ପୂର୍ବତନ ବିଜେଡି ବିଧାୟକ ମୁକେଶ ପାଳଙ୍କ ନେତୃତ୍ୱରେ ଶତାଧିକ ବିଜେଡି କର୍ମୀମାନଙ୍କୁ ନେଇ ଖମାର ଥାନା ଘେରାଉ କରିବା ସହିତ ଧାରଣାରେ ବସିଥିଲେ।
ଶଙ୍ଖମୁର ଗ୍ରାମ ହାଇସ୍କୁଲ ଛକ ନିକଟରେ ରବିବାର ବିଜେପି କର୍ମୀ ରାଜନୈତିକ ଶତ୍ରୁତାରୁ ଶଙ୍ଖମୁର ପଞ୍ଚାୟତ ସମିତି ସଭ୍ୟ ତଥା ପଞ୍ଚାୟତ ବିଜେଡି ସଭାପତି ନୀଳମାଧଵ ପ୍ରଧାନ ତାଙ୍କ କାର ଭିତରେ ତାଙ୍କ ସାଙ୍ଗ ସହିତ ବସି କଥାବାର୍ତ୍ତା ହେଉଥିଲେ। ଏହି ସମୟରେ ନୀଳମାଧବଙ୍କୁ ଅତର୍କିତ ଆକ୍ରମଣ ହୋଇଥିଲା। ସମିତିସଭ୍ୟ ଶ୍ରୀ ପ୍ରଧାନ ଗୁରୁତର ଅବସ୍ଥାରେ ଖମାର ମେଡିକାଲରେ ଭର୍ତ୍ତି ହୋଇ ଥିଲେ। ପରବର୍ତ୍ତି ସମୟରେ ସେ ଖମାର ଥାନାରେ ଆକ୍ରମଣକାରୀଙ୍କ ନାମରେ ଲିଖିତ ଅଭିଯୋଗ କରିଥିଲେ। ଚାରିଦିନ ବିତିଯାଇଥିଲେ ସୁଦ୍ଧା ଏପର୍ଯ୍ୟନ୍ତ ଆକ୍ରମଣକାରୀଙ୍କୁ ଗିରଫ ହୋଇନଥିବାରୁ ଗୁରୁବାର ପୁର୍ବତନ ବିଧାୟକଙ୍କ ନେତୃତ୍ୱରେ ଶତାଧିକ ବିଜେଡି କର୍ମୀଙ୍କୁ ନେଇ ଖମାର ଥାନା ଘେରାଉ କରିବା ସହିତ ଦୋଷୀମାନଙ୍କୁ ଗିରଫ ନ କରିବା ପର୍ଯ୍ୟନ୍ତ ଧାରଣା ଜାରି ରହିବ ବୋଲି ପୂର୍ବତନ ବିଧାୟକ ପାଳ ପ୍ରକାଶ କରିଥିଲେ। ଅନ୍ୟପକ୍ଷରେ ଉଭୟଙ୍କ ବିରୁଦ୍ଧରେ ଏତଲା ଦେଇଥିବାରୁ ଖମାର ପୁଲିସ ପକ୍ଷରୁ ତଦନ୍ତ ଚାଲିଛି ବୋଲି ଥାନା ଅଧିକାରୀ ଅରୁଣ କୁମାର ପଣ୍ଡା କହିଛନ୍ତି।
