ନୂଆଦିଲ୍ଲୀ: ଜାତୀୟ ପ୍ରତିରକ୍ଷା ଏକାଡେମୀ ଅର୍ଥାତ୍ NDA ଇତିହାସରେ ପ୍ରଥମ ଥର ମହିଳା କ୍ୟାଡେଟ୍ ପାସଆଉଟ୍ ହେବାକୁ ଯାଉଛନ୍ତି । ଏନଡିଏର ୧୪୮ତମ ପାଠ୍ୟକ୍ରମରେ ମହିଳା କ୍ୟାଡେଟମାନଙ୍କର ପ୍ରଥମ ବ୍ୟାଚ୍ ତ୍ରିସେବା ଏକାଡେମୀରେ ପାସଆଉଟ୍ ହେବାକୁ ଯାଉଛି । ତାଙ୍କର ପାସିଂ ଆଉଟ୍ ପରେଡ୍ ମେ’ ୩୦ରେ ଅନୁଷ୍ଠିତ ହେବ। ପ୍ରଥମ ଥର ପାଇଁ ଏପରି ଦୃଶ୍ୟ ଦେଖିବାକୁ ମିଳିବ, ଯେତେବେଳେ ୧୭ ଜଣ ମହିଳା କ୍ୟାଡେଟ୍ ଏବଂ ୩୦୦ ରୁ ଅଧିକ ପୁରୁଷ କ୍ୟାଡେଟ୍ NDAରୁ ପାସ୍ କରିବେ । ଏହି ସମସ୍ତ ମହିଳା କ୍ୟାଡେଟମାନେ ଭାରତୀୟ ସେନା, ବାୟୁସେନା ଏବଂ ନୌସେନାରେ ଯୋଗଦେବେ।
NDAର ଐତିହାସିକ ୧୪୮ତମ ପାଠ୍ୟକ୍ରମର ସମାବର୍ତ୍ତନ ଏବଂ ପାସିଂ ଆଉଟ୍ ପରେଡ ପୂର୍ବରୁ NDAର ପ୍ରଥମ ବ୍ୟାଚ୍ ମହିଳା କ୍ୟାଡେଟ ଶୁକ୍ରବାର ଦେଶର ପ୍ରମୁଖ ତ୍ରିସେବା ଏକାଡେମୀରେ ସେମାନଙ୍କର ତିନି ବର୍ଷର ଯାତ୍ରା ବିଷୟରେ କହିଥିଲେ। କ୍ୟାଡେଟମାନଙ୍କ ମଧ୍ୟରୁ ଜଣେ ଇଶିତା ଶର୍ମା କହିଥିଲେ ଯେ, ଆମକୁ ସବୁବେଳେ ସମାନ ସୁଯୋଗ ଦିଆଯାଇଥିଲା । ଆଉ ସେତେବେଳେ ସମସ୍ତ ମହିଳା କ୍ୟାଡେଟଙ୍କ ମଧ୍ୟରେ ଏକତାର ଭାବନା ଦୃଶ୍ୟମାନ ହେଉଥିଲା ।
ଗଣମାଧ୍ୟମ ରିପୋର୍ଟ ଅନୁସାରେ, ଡିଭିଜନ କ୍ୟାଡେଟ୍ କ୍ୟାପଟେନ୍ ଇଶିତା ଶର୍ମା NDAରେ ଯୋଗଦେବା ପୂର୍ବରୁ ଦିଲ୍ଲୀ ବିଶ୍ୱବିଦ୍ୟାଳୟରୁ ଅର୍ଥନୀତିରେ ସ୍ନାତକ ଡିଗ୍ରି ହାସଲ କରିଥିଲେ । ସେ କହିଥିଲେ, ‘ମୁଁ ବିଶ୍ୱାସ କରେ NDAରେ ମହିଳାମାନଙ୍କୁ ସାମିଲ କରିବା ଏବଂ ପ୍ରଥମ ବ୍ୟାଚ୍ ପାସ୍ କରିବା ମହିଳା ସଶକ୍ତିକରଣ ଦିଗରେ ବହୁ ଗୁରୁତ୍ବ ବହନ କରେ ।
ଅଗଷ୍ଟ ୨୦୨୧ରେ, ସୁପ୍ରିମକୋର୍ଟ ଏକ ଐତିହାସିକ ରାୟ ଦେଇଥିଲେ । ମହିଳାମାନଙ୍କୁ ମଧ୍ୟ NDA ପରୀକ୍ଷାରେ ସାମିଲ କରାଇବାକୁ ୟୁପିଏସସିକୁ ନିର୍ଦ୍ଦେଶ ଦେଇଥିଲେ ସୁପ୍ରିମକୋର୍ଟ । ଏନଡିଏ ଏବଂ ନୌସେନା ଏକାଡେମୀରେ ମହିଳାଙ୍କୁ ପ୍ରବେଶ ଅନୁମତି ମିଳୁ ବୋଲି ଏକ ଆବେଦନର ଶୁଣାଣି କରି ସୁପ୍ରିମକୋର୍ଟ କେନ୍ଦ୍ରୀୟ ଲୋକ ସେବା ଆୟୋଗକୁ ଏହି ନିର୍ଦ୍ଦେଶ ଦେଇଥିଲେ । ଆଉ ସର୍ବୋଚ୍ଚ ଅଦାଲତଙ୍କ ରାୟର ପ୍ରତିଫଳନ ଦେଖିବାକୁ ମିଳିଛି । ପ୍ରଥମ ଥର ଏନଡିରୁ ୧୭ ଜଣିଆ ମହିଳା କ୍ୟାଡେଟ୍ ପାସ ଆଉଟ୍ ହୋଇ ୩ ସେନାରେ ଯୋଗ ଦେବାକୁ ଯାଉଛନ୍ତି ।
ସୂଚନାଯୋଗ୍ୟ, ନଭେମ୍ବର ୨୦୨୧ରେ NDA ପରୀକ୍ଷା ଅନୁଷ୍ଠିତ ହୋଇଥିଲା। ମୋଟ ୫,୭୦,୦୦୦ ଆବେଦନ ମଧ୍ୟରୁ ୧,୭୮,୦୦୦ ମହିଳା ଥିଲେ। ଏଥିମଧ୍ୟରୁ ୧,୦୦୨ ଜଣ ମହିଳା ଲିଖିତ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ। ଶେଷରେ ୧୭ ଜଣ ମହିଳା ପ୍ରାର୍ଥୀଙ୍କୁ ସଫଳ ଘୋଷଣା କରାଯାଇଥିଲା।
