ଆଠଗଡ଼, ୧୪/୧୨: ଉପରସ୍ଥ ଅଧିକାରୀଙ୍କ ମାନସିକ ନିର୍ଯାତନାର ଶିକାର ହୋଇ ଆତ୍ମହତ୍ୟା ଉଦ୍ୟମ କଲେ ୧୦୮ ଆମ୍ୱୁଲାନ୍ସ ଡ୍ରାଇଭର । ସୋସିଆଲ୍ ମିଡିଆରେ ଭାଇରାଲ ହେଲା ଆତ୍ମହତ୍ୟା ବେଳର ଭିଡିଓ । ଯୁବକ ଜଣକ ବିଜୟ କୁମାର ପ୍ରଧାନ ବୋଲି ଜଣାପଡ଼ିଛି । କଟକ ଜିଲ୍ଲା ଆଠଗଡ଼ ଥାନା ଅନ୍ତର୍ଗତ ଖୁଣ୍ଟକଟା ପଞ୍ଚାୟତ ମହୀଧରପୁର ଗାଁରେ ଏହି ଘଟଣା ଘଟିଛି ।
ସୂଚନା ମୁତାବକ, ବିଜୟ କୁମାର ପ୍ରଧାନ ୧୦୮ ଆମ୍ବୁଲାନ୍ସର ଡ୍ରାଇଭର ଭାବରେ କାମ କରୁଥିଲେ । ଘରେ ରୋଗୀଣା ସ୍ତ୍ରୀ ଏବଂ ଦୁଇଟି ଛୋଟ ପିଲା । ଅର୍ଥର ଅଭାବ ହେତୁ କରିଥିଲେ ଲକ୍ଷାଧିକ ଟଙ୍କାର କରଜ । ଉପରସ୍ଥ ଅଧିକାରୀ ମାନେ ଲଗାତର ଭାବେ ମାନସିକ ନିର୍ଯାତନା ଦେଇ ଆସୁଥିଲେ । ଏପରିକ ତାଙ୍କ ଚାକିରି ମଧ୍ୟ ଚାଲି ଯାଇଥିଲା । ଶେଷରେ ଅତିଷ୍ଠ ହୋଇ ଆତ୍ମହତ୍ୟା ଉଦ୍ୟମ କରିଥିଲେ ବିଜୟ । ଯାହାର ଭିଡିଓ ସୋସିଆଲ୍ ମିଡିଆରେ ଭାଇରାଲ ହେବାରେ ଲାଗିଛି । ବିଜୟଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି କଟକ ବଡ଼ ମେଡିକାଲରେ ଭର୍ତ୍ତି କରାଯାଇଛି । ସେପଟେ ଏହି ଘଟଣା ସଂପର୍କରେ ଉପରିସ୍ଥ କର୍ମଚାରୀଙ୍କ ବିରୋଧରେ ଆଠଗଡ଼ ଥାନାରେ ଅଭିଯୋଗ କରିଛନ୍ତି ବିଜୟଙ୍କ ପତ୍ନୀ ଅନୀତା ରାଣୀ ପ୍ରଧାନ ।
