ପାକିସ୍ତାନରେ ମାଗଣା ରାସନ ବଣ୍ଟନ ସମୟରେ ଅଘଟଣ, ଦଳାଚକଟାରେ ମହିଳା ଏବଂ ଶିଶୁଙ୍କ ସମେତ ୧୧ ଜଣଙ୍କ ମୃତ୍ୟୁ…
ନୂଆଦିଲ୍ଲୀ: ପାକିସ୍ତାନରେ ଦାରିଦ୍ର୍ୟ ସହ ସଂଘର୍ଷ କରୁଥିବା ସାଧାରଣ ଭୋକରେ ମରିବାକୁ ଯାଉଛନ୍ତି । ଓଳିଏ ଖାଇବା ପାଇଁ ଲୋକମାନେ ଏଣେ ତେଣେ ବୁଲୁଛନ୍ତି । ଆଜି (ଶୁକ୍ରବାର) ପାକିସ୍ତାନର କରାଚି ସହରରେ ଏକ ମାଗଣା ରାସନ ବଣ୍ଟନ କାର୍ଯ୍ୟକ୍ରମରେ ମହିଳା ଓ ଶିଶୁଙ୍କ ସମେତ ଅତି କମରେ ୧୧ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଆହତ ମଧ୍ୟ ହୋଇଛନ୍ତି । ପାକିସ୍ତାନର ଏକ୍ସପ୍ରେସ ନ୍ୟୁଜ୍ ରିପୋର୍ଟ କରିଛି ଯେ ରାସନ ବଣ୍ଟନ କେନ୍ଦ୍ରରେ ଅନେକ ଭିଡ ଜମିଥିଲା । ଏଥିପାଇଁ ସେଠାରେ ଦଳାଚକଟା ମଧ୍ୟ ହୋଇଥିଲା । ଏହା ଦ୍ବାରା ଏଭଳି ଏକ ବଡ ଦୁର୍ଘଟଣା ଘଟିଛି ।
ରିପୋର୍ଟ ଅନୁଯାୟୀ, ଏହି ଘଟଣା କରାଚିର SITE (ସିନ୍ଧ ଇଣ୍ଡଷ୍ଟ୍ରିଆଲ୍ ଟ୍ରେଡିଂ ଇଷ୍ଟେଟ୍) ଅଞ୍ଚଳରେ ଘଟିଛି । ପାକିସ୍ତାନୀ ସରକାର ଏକ ମାଗଣା ରାସନ ବଣ୍ଟନ ଅଭିଯାନ ଆରମ୍ଭ କରିବା ପରେ କରାଚିରେ ଥିବା ଏକ ସରକାରୀ ବିତରଣ କେନ୍ଦ୍ରକୁ ବହୁ ଲୋକ ଆସିବା ପରେ ମୃତ୍ୟୁ ଓ ଆହତ ହୋଇଥିବା ସୂଚନା ମିଳିଛି । ଗତ ସପ୍ତାହରେ ପାକିସ୍ତାନର ପଂଜାବ ପ୍ରଦେଶରେ ଏକ ସରକାରୀ ମାଗଣା ରାସନ ବଣ୍ଟନ ଅଭିଯାନ ସମୟରେ ଚାରିଜଣ ବୃଦ୍ଧ ଲୋକ ସମାନ ଧରଣର ଅଘଟଣରେ ପ୍ରାଣ ହରାଇଥିଲେ ।
ଆଜିର ଘଟଣା ବ୍ୟତୀତ ପାକିସ୍ତାନର ଅନ୍ୟ ପ୍ରଦେଶରେ ଗତ ସପ୍ତାହରେ ୧୧ ଜଣଙ୍କର ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଛନ୍ତି । ନ୍ୟୁଜ୍ ଏଜେନ୍ସି ରଏଟର୍ସ କହିଛି ଯେ ଟ୍ରକ୍ ଏବଂ ବିତରଣ କେନ୍ଦ୍ରରୁ ହଜାର ହଜାର ଅଖା ରାସନ ମଧ୍ୟ ଲୁଟ୍ ହୋଇଛି ।
