ନୂଆଦିଲ୍ଲୀ: ଋଷିଆ-ୟୁକ୍ରେନ ଯୁଦ୍ଧରେ ୧୨ ଜଣ ଭାରତୀୟଙ୍କ ମୃତ୍ୟୁ ହୋଇଥିବାବେଳେ ମୋଟ ୧୬ ଜଣ ଭାରତୀୟ ନିଖୋଜ ଅଛନ୍ତି। ଏନେଇ ଶୁକ୍ରବାର ବୈଦେଶିକ ବ୍ୟାପାର ମନ୍ତ୍ରଣାଳୟ ଏହି ତଥ୍ୟ ଜାରି କରିଛି। ତେବେ ମୃତ ସମସ୍ତ ଭାରତୀୟ ଋଷିଆ ପକ୍ଷରୁ ଯୁଦ୍ଧ ଲଢୁଥିଲେ ବୋଲି ମନ୍ତ୍ରଣାଳୟ ଘୋଷଣା କରିଛି।
ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସ୍ୱାଲ ଏକ ସାମ୍ୱାଦିକ ସମ୍ମିଳନୀ କରୁ କହିଛନ୍ତି, “ବର୍ତ୍ତମାନ ପର୍ଯ୍ୟନ୍ତ ସର୍ବମୋଟ ୧୨୬ ଜଣ ଭାରତୀୟ ଋଷିୟ ସେନାରେ ଯୋଗଦେଇ ଋଷ ପକ୍ଷରୁ ଯୁଦ୍ଧ ଲଢୁଥିଲେ। ତା’ ମଧ୍ୟରୁ ୯୬ ଜଣ ଋଷ ସେନାରୁ ମୁକ୍ତ ହୋଇ ଭାରତ ଫେରିଛନ୍ତି। ସେହିପରି ୧୮ ଜଣ ଭାରତୀୟ ବର୍ତ୍ତମାନ ପର୍ଯ୍ୟନ୍ତ ଋଷୀୟ ସେନାରେ କାମକରୁଥିବା ବେଳେ ଅନ୍ୟ ୧୬ ଜଣକୁ ଏପର୍ଯ୍ୟନ୍ତ ସୁଦ୍ଧା ଚିହ୍ନଟ କରାଯାଇ ପାରିନାହିଁ।”
“ଋଷିଆ ପକ୍ଷରୁ ସେମାନଙ୍କୁ ନିଖୋଜ ବୋଲି ଘୋଷଣା କରାଯାଇ ସାରିଛି। ତେବେ ବର୍ତ୍ତମାନ ସୁଦ୍ଧା ଋଷିୟ ସେନାରେ କାମ କରୁଥିବା ସମସ୍ତ ସୈନିକଙ୍କ ମୁକ୍ତି ପାଇଁ ଆମେ ଚେଷ୍ଟା ଜାରି ରଖିଛୁ। କିନ୍ତୁ ସେମାନଙ୍କ ମଧ୍ୟରୁ ୧୨ ଜଣ ଭାରତୀୟଙ୍କ ମୃତ୍ୟୁ ହୋଇସାରିଛି” ବୋଲି ଜୟସ୍ୱାଲ କହିଛନ୍ତି।
ୟୁକ୍ରେନ ଓ ରୁଷର ଯୁଦ୍ଧରେ ରୁଷ ସେନା ଦ୍ୱାରା ନିଯୁକ୍ତି ପାଇଥିବା ଜଣେ ଭାରତୀୟ ନାଗରିକଙ୍କ ମୃତ୍ୟୁ ଏବଂ ଅନ୍ୟ ଜଣେ ଆହତ ହେବାନେଇ ଖବର ମିଳିବା ପରେ ବୈଦେଶିକ ବ୍ୟାପାର ମନ୍ତ୍ରଣାଳୟ ଏନେଇ ନିଜର ପ୍ରତିକ୍ରିୟା ରଖିଛି।
ଋଷିଆ-ୟୁକ୍ରେନ ଯୁଦ୍ଧରେ ଭାଗନେଇଥିବା କେରଳ ଅଞ୍ଚଳର ବିନିଲ ବାବୁ ନାମକ ଜଣେ ଯୁବକଙ୍କ ନିକଟରେ ମୃତ୍ୟୁ ଘଟିଛି। ଏହା ସମ୍ପର୍କରେ ସୂଚନା ମିଳିବା ପରେ ତାଙ୍କ ମୃତଦେହ ଭାରତ ଫେରାଇ ଆଣିବାକୁ ଭାରତୀୟ ଦୂତାବାସ ଋଷିୟ ଅଧିକାରୀ ମାନଙ୍କ ସହ ଯୋଗାଯୋଗରେ ରହିଛି। ଅନ୍ୟପଟେ ଜୈନ ଟିକେ ନାମକ ଆଉଜଣେ ଭାରତୀୟ ନାଗରିକ ଯୁଦ୍ଧରେ ଆହତ ହୋଇ ମସ୍କୋରେ ଚିକିତ୍ସିତ ହେଉଛନ୍ତି। ତେବେ ତାଙ୍କ ଚିକିତ୍ସା ପୁରା ହେବା ପରେ ସେ ଭାରତକୁ ପ୍ରତ୍ୟାବର୍ତ୍ତନ କରିବେ ବୋଲି ଆଶା କରାଯାଉଛି ବୋଲି ଜୟସ୍ୱାଲ କହିଛନ୍ତି।
ମସ୍କୋ ସ୍ଥିତ ଭାରତୀୟ ଦୁତାବାସ ଭାରତରେ ଥିବା ସେମାନଙ୍କ ପରିବାର ସହ ଯୋଗାଯୋଗରେ ରହିଛନ୍ତି। ଆମ ମାନଙ୍କ ଦ୍ୱାରା ଯାହା ସମ୍ଭବ ଆମେ ତାହା କରିବୁ ବୋଲି ବୈଦେଶିକ ବ୍ୟାପାର ମନ୍ତ୍ରଣାଳୟ ଗତ ମଙ୍ଗଳବାର ଘୋଷଣା କରିଥିଲା।