ପୁରୀ ପୋଲିସକୁ ବଡ଼ ସଫଳତା, ଡକାୟତି ମାମଲାରେ ୧୦ ଓ ଦାଦାବଟି ଆଦାୟ ମାମଲାରେ ୨ ଗିରଫ
ପୁରୀ, ୨୦/୦୩ : ପୁରୀ ପୋଲିସକୁ ବଡ଼ ସଫଳତା। ବାସେଳୀ ସାହି ଥାନା, ଟାଉନ୍ ଥାନା ଓ ସମୁଦ୍ରକୂଳ ଥାନା ପୋଲିସ ଦ୍ଵାରା ୧୨ଜଣଙ୍କୁ ଗିରଫ କରାଯାଇଛି। ଡକାୟତି ମାମଲାରେ ୧୦ ଓ ଦାଦାବଟି ଆଦାୟ ମାମଲାରେ ୨ ଜଣ ଗିରଫ ହୋଇଛନ୍ତି। ସାମ୍ବାଦିକ ମମ୍ମିଳନୀରେ ଏନେଇ ପୋଲିସ ପକ୍ଷରୁ ସୂଚନା ଦିଆଯାଇଛି।
ସୂଚନା ଅନୁସାରେ, ରବିବାର ରାତିରେ ବିଭିନ୍ନ ଜାଗାରେ ଚଢ଼ାଉ କରି ପୁଲିସ ୧୨ ଜଣ ଅପରାଧୀଙ୍କୁ ଗିରଫ କରିବା ସହ ଅସ୍ତ୍ରଶସ୍ତ୍ର ଜବତ କରିଛି। ବାସେଳୀ ସାହି ପୁଲିସ ୫ ଜଣଙ୍କୁ ଗିରଫ କରିଛି। ସେମାନେ ହେଲେ ଅଭି ବେହେରା (୨୪ ବର୍ଷ), ମନୋଜ ପଣ୍ଡା (୨୩ ବର୍ଷ), ବାଣ୍ଟିନା ବେହେରା (୨୩ ବର୍ଷ), ରାଜେଶ କୁମାର ସାହୁ (୩୬ ବର୍ଷ), କେଶବ ପରିଡା (୨୪ ବର୍ଷ)। ସେମାନଙ୍କ ଠାରୁ ୨ଟି ଗାଡି, ୩ଟି ଖଣ୍ଡା, ୨ଟି ଲୁହା ରଡ, ୩ଟି ବାଡ଼ି, ୧ଟି ଜୀବିତ ବୋମା, ୫ଟି ବିଅର, ୬ଟି ପ୍ଲାଷ୍ଟିକ ଗ୍ଲାସ, ୨ଟି ପାଣି ବୋତଲ ଜବତ କରାଯାଇଛି।
ସେହିପରି ଟାଉନ ଥାନା ପୁଲିସ ୫ ଜଣଙ୍କୁ ଗିରଫ କରିଛି। ସେମାନେ ହେଲେ କେଶବ ପୃଷ୍ଟି (୩୪ ବର୍ଷ), ଶିବୁ ନାୟକ (୨୮ ବର୍ଷ), ରାକେଶ କୁମାର ରାଉତ (୨୨ ବର୍ଷ), ରଞ୍ଜନ ଷଣ୍ଢ (୨୮ ବର୍ଷ), ରବି ସୁବୁଦ୍ଧି (୨୭ ବର୍ଷ)। ସେମାନଙ୍କ ନିକଟରୁ ୧ଟି ଖଣ୍ଡା, ୧ଟି ଲୁହା ରଡ, ୩ଟି ବିୟର, ୧ଟି ପ୍ଲାଷ୍ଟିକ ଗ୍ଲାସ ଜବତ କରାଯାଇଛି।
ଏତଦ୍ ବ୍ୟତୀତ ଦାଦାବଟି ଆଦାୟ ସମୟରେ ସମୁଦ୍ରକୂଳ ଥାନା ପୋଲିସ ୨ ଜଣଙ୍କୁ ଗିରଫ କରିଛି। ସେମାନେ ହେଲେ ବାଲିମୋଚି ସାହିର କେ. ଶିବ (୨୦ ବର୍ଷ), ଧୋବାଖାଳ ପେଣ୍ଠକଟାର ରମେଶ ବେହେରା(୩୧ ବର୍ଷ)। ସେମାନଙ୍କ ଠାରୁ ୧ଟି ଚାପଡ଼ ଓ ୩୦୦ ଟଙ୍କା ଜବତ କରାଯାଇଛି।
