ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜୁଲାଇ ୨ ରୁ ୫ଟି ଦେଶ ଗସ୍ତ କରିବେ । ପ୍ରଧାନମନ୍ତ୍ରୀ ମୋଦୀଙ୍କ ଗସ୍ତ ଘାନାରୁ ଆରମ୍ଭ ହେବ । ୩୦ ବର୍ଷ ପରେ ଜଣେ ଭାରତୀୟ ପ୍ରଧାନମନ୍ତ୍ରୀ ଘାନା ଗସ୍ତ କରୁଛନ୍ତି । ଏହି ସମୟରେ ପ୍ରଧାନମନ୍ତ୍ରୀ ମୋଦୀ ଘାନାର ରାଷ୍ଟ୍ରପତି ଏବଂ ପ୍ରଧାନମନ୍ତ୍ରୀଙ୍କୁ ଭେଟିବେ । ସେ ଘାନାର ସଂସଦକୁ ସମ୍ବୋଧିତ କରିବେ । ଏହା ବ୍ୟତୀତ ପ୍ରଧାନମନ୍ତ୍ରୀ ଘାନାରେ ଥିବା ଭାରତୀୟ ସମ୍ପ୍ରଦାୟକୁ ମଧ୍ୟ ସମ୍ବୋଧିତ କରିବାର କାର୍ଯ୍ୟକ୍ରମ ରହିଛି । ଘାନା ବ୍ୟତୀତ ପ୍ରଧାନମନ୍ତ୍ରୀ ମୋଦୀ ତ୍ରିନିଦାଦ-ଟୋବାଗୋ, ଆର୍ଜେଣ୍ଟିନା, ବ୍ରାଜିଲ ଏବଂ ନାମିବିଆ ମଧ୍ୟ ଗସ୍ତ କରିବେ ।

 ପ୍ରଧାନମନ୍ତ୍ରୀ ମୋଦୀ ବ୍ରାଜିଲରେ ଆୟୋଜିତ ହେବାକୁ ଥିବା ୧୭ତମ ବ୍ରିକ୍ସ ସମ୍ମିଳନୀରେ ଯୋଗଦେବେ । ବ୍ରାଜିଲରେ ବ୍ରିକ୍ସ ସମ୍ମିଳନୀରେ ଯୋଗଦେବା ଏବଂ ଏହି ଦେଶଗୁଡ଼ିକ ସହିତ ଭାରତର ଦ୍ୱିପାକ୍ଷିକ ସମ୍ପର୍କକୁ ମଜବୁତ କରିବା ପ୍ରଧାନମନ୍ତ୍ରୀଙ୍କ ଏହି ୮ ଦିନିଆ ବିଦେଶ ଗସ୍ତର ମୁଖ୍ୟ ଉଦ୍ଦେଶ୍ୟ  ।

 ଘାନା (ଜୁଲାଇ ୨-୩): ପ୍ରଧାନମନ୍ତ୍ରୀ ମୋଦୀ ଘାନାରୁ ତାଙ୍କର ବିଦେଶ ଗସ୍ତ ଆରମ୍ଭ କରିବେ। ଏହା ପ୍ରଧାନମନ୍ତ୍ରୀ ମୋଦୀଙ୍କ ପ୍ରଥମ ଘାନା ଗସ୍ତ ଏବଂ ୩୦ ବର୍ଷ ମଧ୍ୟରେ କୌଣସି ଜଣେ ଭାରତୀୟ ପ୍ରଧାନମନ୍ତ୍ରୀଙ୍କ ପ୍ରଥମ ଗସ୍ତ ହେବ। ସେ ଘାନାର ରାଷ୍ଟ୍ରପତିଙ୍କୁ ଭେଟି ଅର୍ଥନୈତିକ, ଶକ୍ତି, ପ୍ରତିରକ୍ଷା ଏବଂ ବିକାଶ ସହଯୋଗ ବିଷୟରେ ଆଲୋଚନା କରିବେ । ECOWAS ଏବଂ ଆଫ୍ରିକୀୟ ସଂଘ ସହିତ ଭାରତର ସହଭାଗୀତାକୁ ମଜଭୁତ କରିବେ ।

 ତ୍ରିନିଦାଦ ଏବଂ ଟୋବାଗୋ (୩-୪ ଜୁଲାଇ): ପ୍ରଧାନମନ୍ତ୍ରୀ ଭାବରେ ଏହା ମୋଦୀଙ୍କ ପ୍ରଥମ ଗସ୍ତ ହେବ । ସେ ରାଷ୍ଟ୍ରପତି କ୍ରିଷ୍ଟିନ କାର୍ଲା କାଙ୍ଗାଲୁ ଏବଂ ପ୍ରଧାନମନ୍ତ୍ରୀ କମଳା ପ୍ରସାଦ-ବିସେସାରଙ୍କୁ ଭେଟିବେ ଏବଂ ସଂସଦର ଏକ ମିଳିତ ଅଧିବେଶନକୁ ସମ୍ବୋଧନ କରିପାରନ୍ତି । ସାଂସ୍କୃତିକ ଏବଂ ଦ୍ୱିପାକ୍ଷିକ ସମ୍ପର୍କକୁ ଆହୁରି ଘନିଷ୍ଠ କରିବାକୁ ଚେଷ୍ଟା କରିବେ ମୋଦୀ ।

 ଆର୍ଜେଣ୍ଟିନା (ଜୁଲାଇ ୪-୫): ପ୍ରଧାନମନ୍ତ୍ରୀ ମୋଦୀ ଆର୍ଜେଣ୍ଟିନା ରାଷ୍ଟ୍ରପତି ଜାଭିୟର ମାଇଲିଙ୍କ ସହ ଦ୍ୱିପାକ୍ଷିକ ଆଲୋଚନା କରିବେ। ଏହି ଆଲୋଚନାରେ ପ୍ରତିରକ୍ଷା, କୃଷି, ଖଣି, ତୈଳ ଏବଂ ଗ୍ୟାସ, ନବୀକରଣ ଯୋଗ୍ୟ ଶକ୍ତି ଏବଂ ବାଣିଜ୍ୟ ଭଳି ପ୍ରସଙ୍ଗ ଉପରେ ଗୁରୁତ୍ବରୋପ କରାଯିବ ।

 ବ୍ରାଜିଲ (୫-୮ ଜୁଲାଇ): ପ୍ରଧାନମନ୍ତ୍ରୀ ମୋଦୀ ୧୭ତମ ବ୍ରିକ୍ସ ସମ୍ମିଳନୀରେ ଯୋଗଦେବେ। ସେ ରାଷ୍ଟ୍ରପତି ଲୁଇଜ୍ ଇନାସିଓ ଲୁଲା ଡା ସିଲଭାଙ୍କ ସହ ବାଣିଜ୍ୟ, ପ୍ରତିରକ୍ଷା, ଶକ୍ତି, ମହାକାଶ ଏବଂ ସ୍ୱାସ୍ଥ୍ୟ ଭଳି କ୍ଷେତ୍ରରେ ରଣନୈତିକ ସହଭାଗୀତା ବିଷୟରେ ମଧ୍ୟ ଆଲୋଚନା କରିବେ। ଏହା ତାଙ୍କର ଚତୁର୍ଥ ବ୍ରାଜିଲ ଗସ୍ତ ହେବ ।

 ନାମିବ୍ୟା (ଜୁଲାଇ୯): ପ୍ରଧାନମନ୍ତ୍ରୀ ମୋଦୀ ଜୁଲାଇ  ୯ରେ ନାମିବ୍ୟା ଗସ୍ତରେ ଯିବେ। ଏହି ସମୟରେ ସେ ଦେଶର ରାଷ୍ଟ୍ରପତି ନେତୁମ୍ବୋ ନନ୍ଦୀ-ନଦାଇଟ୍ୱଙ୍କୁ ଭେଟିବେ ଏବଂ ନାମିବ୍ୟାର ପ୍ରଥମ ରାଷ୍ଟ୍ରପତି ଡକ୍ଟର ସାମ ନୁଜୋମାଙ୍କୁ ଶ୍ରଦ୍ଧାଞ୍ଜଳି ଦେବେ । ସେ ସଂସଦକୁ ମଧ୍ୟ ସମ୍ବୋଧିତ କରିପାରନ୍ତି। ଏହା ତାଙ୍କର ପ୍ରଥମ ନାମିବ୍ୟା ଗସ୍ତ ହେବ । ନାମିବ୍ୟାରେ ଅନେକ ଖଣିଜ ପଦାର୍ଥର ବିଶାଳ ଭଣ୍ଡାର ଅଛି। ତେବେ ଭାରତ ଚିତାବାଘ ନାମିବ୍ୟାରୁ ଆରିଥିଲା ।