ଚଳିତ ଶିକ୍ଷାବର୍ଷରୁ ୧୦୬ ସ୍କୁଲ୍ରେ ଏକାଦଶ ପାଠପଢ଼, ୧୩୪୬୮ ସିଟ୍ ପାଇଁ ହେବ ନାମଲେଖା
ଭୁବନେଶ୍ୱର, ୨୩/୦୫: ଚଳିତ ଶିକ୍ଷାବର୍ଷରେ ରାଜ୍ୟରେ ୧୦୬ଟି ଉନ୍ନୀତ ଉଚ୍ଚ ମାଧ୍ୟମିକ ବିଦ୍ୟାଳୟରେ ଏକାଦଶ ଶ୍ରେଣୀ ଖୋଲିବାକୁ ପଦକ୍ଷେପ ନିଆଯାଇଥି । ଏଥିରୁ ୧୦୦ଟି ସ୍କୁଲ୍ରେ କଳା ଓ ୬ଟି ସ୍କୁଲ୍ରେ ବିଜ୍ଞାନ ବିଷୟରେ ଶିକ୍ଷାଦାନ କରାଯିବ । ଏହି ବିଦ୍ୟାଳୟରେ ୨ଟି ଲେଖାଏ ସେକ୍ସନ୍ ଖୋଲିବା ପାଇଁ ସ୍ଥିର ହୋଇଛି । ପ୍ରତ୍ୟେକ ସେକ୍ସନ୍ରେ ୬୪ଜଣ ଲେଖାଏ ମୋଟ୍ ୧୨୮ ଛାତ୍ରଛାତ୍ରୀ ନାମଲେଖାଇ ପାରିବେ । ଏହା ଦ୍ୱାରା ରାଜ୍ୟରେ ୧୦୬ଟି ସରକାରୀ ସ୍କୁଲ୍ରେ ମୋଟ୍ ୧୩୪୬୮ ସିଟ୍ ନାମଲେଖା ପାଇଁ ବୃଦ୍ଧି ପାଇବ । ଏପରିକି ପ୍ରଧାନଶିକ୍ଷକଙ୍କୁ ଭାରପ୍ରାପ୍ତ ଅଧ୍ୟକ୍ଷ ଭାବେ କାର୍ଯ୍ୟ କରିବା ପାଇଁ ସେମାନଙ୍କୁ ତାଲିମ୍ ଦିଆଯିବ । ଏଥିସହ ଶିକ୍ଷାଦାନ ପାଇଁ ଅତିଥି ଶିକ୍ଷକ ନିୟୋଜନ ପ୍ରକ୍ରିୟା ସ୍କୁଲ୍ସ୍ତରରେ କରାଯିବ ।
ସୂଚନାଯୋଗ୍ୟ, ମାଟ୍ରିକ୍ ପରୀକ୍ଷା ରେଜଲ୍ଟ ପାସ୍ ହାର ରେକର୍ଡ ସଂଖ୍ୟକ ହୋଇଛି । ଚଳିତ ବର୍ଷ ରେଗୁଲାର ଏବଂ ଏକ୍ସ ରେଗୁଲାରକୁ ମିଶାଇ ୫ଲକ୍ଷ ୧୨ହଜାର ୪୬୦ଜଣ ପିଲା ପାସ୍ କରିଛନ୍ତି । ମାତ୍ର ରାଜ୍ୟରେ ଯୁକ୍ତ ୨ ପାଇଁ ମୋଟ୍ ୫ଲକ୍ଷ ୯ହଜାର ୩୫୮ ସିଟ୍ ରହିଛି । ସେହିପରି ପ୍ରତିବର୍ଷ ସିବିଏସ୍ଇ ଏବଂ ଆଇସିଏସ୍ଇ ବୋର୍ଡରୁ ପ୍ରାୟ ୧୫ହଜାରରୁ ଅଧିକ ଛାତ୍ରଛାତ୍ରୀ ସିଏଚ୍ଏସ୍ଇ ବୋର୍ଡକୁ ଆସିଥାନ୍ତି । ଏପରି ସ୍ଥିତିରେ କିପରି ନାମଲେଖା ହେବ ସେନେଇ ଗଣମାଧ୍ୟମରେ ଖବର ପ୍ରକାଶ ପାଇଥିଲା । ଏହାପରେ ଗଣଶିକ୍ଷା ବିଭାଗ ପକ୍ଷରୁ ଏପରି ନିଷ୍ପତ୍ତି ହୋଇଛି ।
