ଟାଙ୍ଗୀ,୧୩।୧୦ : ସାମାନ୍ୟ କଥାକୁ ନେଇ ବଡ ଭାଇ ଉପରକୁ ଗୁଳିମାଡ଼ କଲା ସାନ ଭାଇ। ତେବେ ଲକ୍ଷ୍ୟ ଭଷ୍ଟ୍ର ହେବାରୁ ଅଳ୍ପକେ ବଡ ଭାଇ ବର୍ତ୍ତିଯାଇଛନ୍ତି। ତେବେ ଗୁଳିଟି କାନ୍ଥରେ ବାଜି ଏକ ଶିଶୁ ଦେହରେ ବାଜିବାରୁ ସେ ସାମନ୍ୟ ଆହତ ହୋଇଛି। ଖୋର୍ଦ୍ଧା ଜିଲ୍ଲାର ଟାଙ୍ଗୀ ଥାନା ଅଧିନସ୍ଥ ଦୀକ୍ଷିତପଡା ଗାଁରେ ଯାଜାବର ଭାବେ ରହୁଥିବା ଏକ ପରିବାର ମଧ୍ୟରେ ଏହି ଘଟଣା ଘଟିଛି।
ଖୋର୍ଦ୍ଧା ଜିଲ୍ଲାର ଟାଙ୍ଗୀ ଥାନା ଅଧିନସ୍ଥ ଦୀକ୍ଷିତପଡା ଗାଁରେ କିଛି ଯାଜାବର ରୁହନ୍ତି । ସେମାନଙ୍କ ମଧ୍ୟରୁ ରବି ନାୟକ ( ୧୮ ) ଓ ଶିବ ନାୟକ ( ୨୦ ) ଦୁହେଁ ହେଉଛନ୍ତି ରକ୍ତର ଭାଇ-ଭାଇ । ସାମାନ୍ୟ କଥାକୁ ନେଇ ଦୁଇ ଭାଇଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। ବାସ୍ ଏତିକିରେ ଉଠିଲା ବନ୍ଧୁକ , ଆଉ ରବି ନାୟକ ସିଧା ଟାର୍ଗେଟ କରି ତା'ର ବଡ଼ଭାଇ ଶିବ ନାୟକଙ୍କ ଉପରକୁ ଗୁଳିମାଡ଼ କରିଥିଲା। ଲକ୍ଷ୍ୟ ଭ୍ରଷ୍ଟ ହେବାରୁ ଅଳ୍ପକେ ଶିବ ନାୟକ ବର୍ତ୍ତି ଯାଇଥିଲା। ଗୁଳିଟି କାନ୍ଥରେ ବାଜି ଛିଟିକି ପଡିଥିଲା। ସେହି କାନ୍ଥ ନିକଟରେ ଥିବା ଗୋଟିଏ ଛୋଟ ପିଲା ଦେହରେ ଗୁଳିଟି ବାଜିଲା ସତ । ମାତ୍ର ସେଭଳି କିଛି ବଡ଼ ଅଘଟଣ ଘଟିନାହିଁ । ଛୋଟ ପିଲାଟି ସାମାନ୍ୟ ଆହତ ହୋଇଛନ୍ତି ଏବଂ ପ୍ରାଥମିକ ଚିକିତ୍ସା ପରେ ସୁସ୍ଥ ଥିବାର ପୋଲିସ ସୂଚନା ଦେଇଛନ୍ତି । ଘଟଣା ପ୍ରଘଟ ପରେ ଟାଙ୍ଗୀ ପୋଲିସ ପ୍ରାଥମିକ ତଦନ୍ତ କରି ଦୁଇ ଭାଇଙ୍କୁ ଗିରଫ କରିବା ସହିତ ବ୍ୟବହୃତ ଦେଶୀ ବନ୍ଧୁକ ଜବତ କରିଛି ବୋଲି ଟାଙ୍ଗୀ ଥାନା ନିରୀକ୍ଷକ ସୁଶାନ୍ତ କୁମାର ବେହେରା ସୂଚନା ଦେଇଛନ୍ତି ।
