ଜଟଣୀ ଫ୍ଲାଏଓଭର ନିର୍ମାଣରେ ବାଧକ ସାଜିଥିଲା ଦୁଇଟି ଘର: ବୁଲିଲା ବୁଲଡୋଜର୍, ମାଟିରେ ମିଶିଲା କୋଠା
ଜଟଣୀ,୨୪/୦୩: ଜଟଣୀ ଫ୍ଲାଏଓଭର ନିର୍ମାଣରେ ବାଧକ ସାଜିଥିବା ସ୍ଥାନୀୟ ବଡ଼ବଜାର ଅଞ୍ଚଳର କେତେକ ଘର ମଧ୍ୟରୁ ଦୁଇଟିକୁ ପ୍ରଶାସନ ପକ୍ଷରୁ ଉଚ୍ଛେଦ କରାଯାଇଛି । ପୂର୍ବରୁ ୩ଟି ମାର୍କେଟ୍ର ୨୦୦ରୁ ଅଧିକ ଦୋକାନକୁ ଭଙ୍ଗା ଯାଇଥିଲା ।
ବଡ଼ବଜାର ଅଞ୍ଚଳରେ ଥିବା ୨୨ଟି ସ୍ଥିତିବାନ୍ ଘର ବ୍ରିଜ ନିର୍ମାଣରେ ଅନ୍ୟତମ ବାଧକ ସାଜିଥିଲା । ଜମି ଅଧିଗ୍ରହଣ ନିୟମରେ କ୍ଷତିପୂରଣ ପ୍ରଦାନକୁ ନେଇ ଘରମାଲିକ ଓ ପ୍ରଶାସନ ପକ୍ଷରୁ ବହୁବାର ଆଲୋଚନା ହୋଇଥିଲା । ଅଧିକାଂଶ ଘର ମାଲିକ କ୍ଷତିପୂରଣ ନେଇ ସେମାନଙ୍କ ଘର ଖାଲି କରିଦେଇଥିଲେ । ହେଲେ ସେମାନଙ୍କ ମଧ୍ୟରୁ ୨ ଜଣ ଅସନ୍ତୋଷ ପ୍ରକାଶ କରି ନ୍ୟାୟାଳୟରେ ଆଶ୍ରୟ ନେଇଥିଲେ । କୋର୍ଟ ଏହା ଉପରେ ରହିତାଦେଶ ଜାରି କରିଥିଲେ । ବ୍ରିଜ୍ କାର୍ଯ୍ୟ ବିଳମ୍ବ ଯୋଗୁଁ ଜନସାଧାରଣ ହଇରାଣ ହେଉଥିବା ଦର୍ଶାଇ ରହିତାଦେଶ ଉଠାଇବା ପାଇଁ ପ୍ରଶାସନ ଉଦ୍ୟମ କରୁଥିବା ବେଳେ ସ୍ଥାନୀୟ ଅଞ୍ଚଳର କଳିଙ୍ଗ ସାହୁ ଓ ଲୁସେନ୍ ରାୟ ରିଟ୍ ପିଟିସନ୍ ମାଧ୍ୟମରେ ନିବେଦନ କରିଥିଲେ । ଯାହାଦ୍ୱାରା ଦୁଇମାସ ପୂର୍ବେ ଜାରି ହୋଇଥିବା ରହିତାଦେଶକୁ କୋର୍ଟ ଉଠାଇ ଦେଇଥିଲେ । ହେଲେ ସମ୍ପୃକ୍ତ ବ୍ୟକ୍ତିମାନେ ଘର ଖାଲି କରିନଥିଲେ ।
ତହସିଲଦାର, ପୂର୍ତ୍ତ ବିଭାଗ ଯନ୍ତ୍ରୀ, ପୁଲିସ ଉପସ୍ଥିତିରେ ଦୁଇଟି ଘରକୁ ଗୁରୁବାର ଭଙ୍ଗା ଯାଇଥିଲା । ଏହି ସମୟରେ ସ୍ଥାନୀୟ ବିଧାୟକ ସୁରେଶ କୁମାର ରାଉତରାୟ ଓ ତାଙ୍କ ସମର୍ଥକମାନେ ଥିଲେ । ଉଚ୍ଛେଦ ବେଳେ ଜଣେ ଘର ମାଲିକ ବିରୋଧ କରିବାରୁ ବିଧାୟକ ଶ୍ରୀ ରାଉତରାୟଙ୍କ ସମେତ ତାଙ୍କ ସମର୍ଥକମାନେ ବୁଝାସୁଝା କରିଥିଲେ । ଏହି ଅଞ୍ଚଳରେ ଆହୁରି ଦୁଇଟି ଘର ରହିଛି । ଯାହା ପରବର୍ତ୍ତୀ ସମୟରେ ଭଙ୍ଗାଯିବ ବୋଲି ପୂର୍ତ୍ତ ବିଭାଗର ଜଣେ ଯନ୍ତ୍ରୀ କହିଛନ୍ତି ।
