PRAMEYA

Prameya News Portal, Prameya Daily, Odisha Latest News, Odisha Current Headlines, Odisha News Online

ପ୍ରମୁଖ ଖବର
  • କେସିଙ୍ଗା : କେସିଙ୍ଗାରେ ବୃଦ୍ଧି ପାଇବାରେ ଲାଗିଛି ସଟ୍ଟା ଖେଳ ସହିତ ବେଆଇନ ମଦ ବିକ୍ରି, ୩ ଗିରଫ
  • ||
  • କଣ୍ଟାବାଞ୍ଜି : ରାଜ୍ୟ ବାହାରେ ଓଡ଼ିଆ ପରିବାରକୁ ନିର୍ମମ ହତ୍ୟା, ସ୍ଵାମୀ-ସ୍ତ୍ରୀ ସମେତ ଦୁଇ ଛୁଆ ମୃତ
  • ||
  • କଟକ : ବଢିବ ହାଇସିକ୍ୟୁରିଟି ନମ୍ଵର ପ୍ଲେଟ ଅବଧି, ମାସେ ସମୟସୀମା ବୃଦ୍ଧିକଲେ ସରକାର
  • ||

୫ ବର୍ଷରେ ଚାକିରି ହରାଇଛନ୍ତି ୨ କୋଟି ପୁରୁଷ

source:www.wenzelfenton.com

ନୂଆଦିଲ୍ଲୀ,୨୩ା୩(ଏଜେନ୍ସି):୨୦୧୧-୧୨ରୁ ୨୦୧୭-୧୮ ମଧ୍ୟରେ ପ୍ରାୟ ୨ କୋଟି ପୁରୁଷ ଚାକିରି ହରାଇଛନ୍ତି । ଜାତୀୟ ନମୂନା ସର୍ବେକ୍ଷଣ କାର୍ଯ୍ୟାଳୟ (ଏନ୍‌ଏସ୍‌ଏସ୍‌ଓ) ରିପୋର୍ଟରୁ ଏହା ଜଣାଯାଇଛି । ଏହି ରିପୋର୍ଟକୁ କେନ୍ଦ୍ର ସରକାର ଚପାଇ ରଖିଥିବା ପୂର୍ବରୁ ଅଭିଯୋଗ ହୋଇଥିଲା । ସର୍ବସାଧାରଣରେ ପ୍ରକାଶ ପାଇବାକୁ ଥିବା ଏନ୍‌ଏସ୍‌ଏସ୍‌ଓ ରିପୋର୍ଟ ୨୦୧୭-୧୮ ଅନୁସାରେ ୨୦୧୧-୧୨ରେ ଦେଶରେ ୩୦.୪ କୋଟି ପୁରୁଷ ଚାକିରି କରୁଥିଲେ । ୨୦୧୭-୧୮ରେ ଏହି ସଂଖ୍ୟା ୨୮.୬ କୋଟିକୁ ଖସି ଆସିଥିବା ରିପୋର୍ଟରେ ଦର୍ଶାଯାଇଛି । ୧୯୯୩-୯୪ରୁ ପ୍ରଥମ ଥର ପାଇଁ ପୁରୁଷ ଶ୍ରମବଳରେ ହ୍ରାସ ଘଟିଛି । ଉକ୍ତ ସମୟରେ ଦେଶର ମାନବସମ୍ବଳରେ ପୁରୁଷଙ୍କ ସଂଖ୍ୟା ୨୧.୯ କୋଟି ଥିଲା । ୨୦୧୧-୧୨ରେ ଏହି ସଂଖ୍ୟା ୩୦.୪ କୋଟିକୁ ବଢ଼ିଥିଲା । କିନ୍ତୁ ୨୦୧୭-୧୮ରେ ଏହା ୨୮.୬ କୋଟିକୁ ହ୍ରାସ ପାଇଥିବା ରିପୋର୍ଟରେ ଉଲ୍ଲେଖ କରାଯାଇଛି । ସହରାଞ୍ଚଳ ଏବଂ ଗ୍ରାମାଞ୍ଚଳରେ ପୁରୁଷ ବେକାରି ହାର ଯଥାକ୍ରମେ ୭.୧% ଏବଂ ୫.୮% ରହିଥିବା
ଏଥିରେ ପ୍ରକାଶ କରାଯାଇଛି । ସୂଚନାଯୋଗ୍ୟ, ଏହି ରିପୋର୍ଟକୁ ଜାତୀୟ ପରିସଂଖ୍ୟାନ ଆୟୋଗ (ଏନ୍‌ଏସ୍‌ସି) ପକ୍ଷରୁ ୨୦୧୮ ଡିସେମ୍ବରରେ ମଞ୍ଜୁରି ଦିଆଯାଇଥିଲା ।

କିନ୍ତୁ ସରକାର ଏହାକୁ ପ୍ରକାଶ ନ କରି ଚପାଇ ରଖିବାରୁ ଏନ୍‌ଏସ୍‌ସି ଅଧ୍ୟକ୍ଷ ପି. ସି. ମୋହନନ୍‌ଙ୍କ ସମେତ ପ୍ରମୁଖ ଅଧିକାରୀମାନେ ଜାନୁଆରୀରେ ଇସ୍ତଫା ଦେଇଛନ୍ତି । ଏନ୍‌ଏସ୍‌ଏସ୍‌ଓ ରିପୋର୍ଟରେ ଆହୁରି ମଧ୍ୟ ଉଲ୍ଲେଖ କରାଯାଇଛି ଯେ, ଗ୍ରାମାଞ୍ଚଳରେ ଅନୌପଚାରିକ କ୍ଷେତ୍ରରେ କାର୍ଯ୍ୟ କରୁଥିବା ଶ୍ରମିକଙ୍କ ସଂଖ୍ୟାରେ ମଧ୍ୟ ହ୍ରାସ ଘଟିଛି । ୨୦୧୧-୧୨ରେ ଏହି ସଂଖ୍ୟା ୧୦.୯ କୋଟି ଥିଲା । ୨୦୧୭-୧୮ରେ ଏହା ୭.୭ କୋଟିକୁ ହ୍ରାସ ପାଇଛି । ୫ ବର୍ଷରେ ଏଥିରେ ୩୦% ହ୍ରାସ ଘଟିଛି । ଗ୍ରାମୀଣ କୃଷି କ୍ଷେତ୍ରରେ କାର୍ଯ୍ୟ କରୁଥିବା ଅନୌପଚାରିକ ଶ୍ରମିକ ପରିବାର ସଂଖ୍ୟାରେ ମଧ୍ୟ ହ୍ରାସ ଘଟିଛି । ୫ ବର୍ଷ ମଧ୍ୟରେ ଏହା ୩.୬ କୋଟିରୁ ୨.୧ କୋଟିକୁ ହ୍ରାସ ପାଇଛି । ଯଦିଓ ସରକାର ରିପୋର୍ଟରେ କୌଣସି ପ୍ରକାର ରାଜନୈତିକ ପ୍ରଭାବ ରହି ନ ଥିବା କହୁଛନ୍ତି ତଥାପି ବିଶ୍ୱର ବିଭିନ୍ନ କୋଣରୁ ୧୦୮ ଜଣ ଅର୍ଥନୀତିଜ୍ଞ ଏହା ଉପରେ ଆପତ୍ତି ଦର୍ଶାଇଛନ୍ତି । ସରକାର ରିପୋର୍ଟରେ ଥିବା ତଥ୍ୟଗୁଡିକୁ ସଂଶୋଧନ କରିଦେଉଥିବାବେଳେ ଅନେକ ତଥ୍ୟକୁ ଲୁଚାଇ ଦେଉଥିବା ଏମାନେ ଅଭିଯୋଗ କରୁଛନ୍ତି । ସରକାରଙ୍କ ପ୍ରଦର୍ଶନ ଉପରେ ପ୍ରଶ୍ନବାଚୀ ସୃଷ୍ଟି କରୁଥିବା ତଥ୍ୟଗୁଡିକୁ ହଟାଇ ଦିଆଯାଉଥିବା ଏମାନେ କହିଛନ୍ତି ।

ସମ୍ବନ୍ଧିତ ଖବର