ଢେଙ୍କାନାଳ/ହିନ୍ଦୋଳ,୩୧/୦୭: ହାତୀ ଆକ୍ରମଣରେ ଦେଢଶୂର ଓ ଭାଇବୋହୂଙ୍କ ସମେତ ୩ ଜଣଙ୍କ ମୃତ୍ୟୁ ଘଟିଛି । ଢେଙ୍କାନାଳ ଜିଲ୍ଲା ହିନ୍ଦୋଳ ବନାଞ୍ଚଳ ଖଜୁରିଆକଟା ବାଘଧରିଆ ଗ୍ରାମରେ ଗୁରୁବାର ସକାଳୁ ଏହି ଅଘଟଣ ଘଟିଛି। ମୃତକ ହେଲେ ବାଘଧରିଆ ଝୁଲଣ ଦେହୁରୀ (୫୦ ବର୍ଷ) ଓ ତାଙ୍କ ଦେଢଶୂର କରୁଣାକର ଦେହୁରୀ (୬୧ ବର୍ଷ) ଏବଂ ଶଶୀ ଦେହୁରୀ (୬୬ ବର୍ଷ)। ପ୍ରତିବାଦରେ ଉତ୍ତ୍ୟକ୍ତ ଗ୍ରାମବାସୀ ସତମାଇଲିଠାରେ ରାସ୍ତା ଅବରୋଧ କରିଛନ୍ତି। ରାସ୍ତାରୋକ ଫଳରେ ପୁରୁଣା କଟକ-ସମ୍ବଲପୁର ରାସ୍ତାର ଢେଙ୍କାନାଳ-ଅନଗୁଳ ଯିବା ରାସ୍ତାରେ ଯାନବାହନ ଚଳାଚଳରେ ବ୍ୟାଘାତ ସୃଷ୍ଟି ହୋଇଛି।
ସୂଚନା ମୁତାବକ, ବାଘଧରିଆ ଗ୍ରାମର ଝୁଲଣ ଦେହୁରୀ ଗୁରୁବାର ସକାଳୁ ଶୌଚ ହେବାପାଇଁ ଘର ପଛପଟକୁ ଯାଇଥିଲେ। ଏହି ସମୟରେ ସେଠାରେ ପୂର୍ବରୁ ଥିବା ଏକ ଦାନ୍ତହାତୀ ତାଙ୍କୁ ଆକ୍ରମଣ କରିଥିଲା। ତାଙ୍କ ଚିତ୍କାର ଶୁଣି ଦେଢଶୂର କରୁଣାକର ଦୌଡ଼ି ଆସିବାରୁ ହାତୀ ତାଙ୍କୁ ଗୋଡେଇ ମାରି ଦେଇଥିଲା। ଘଟଣା ସ୍ଥଳରେ ଉଭୟ ଦେଢଶୂର ଓ ଭାଇବୋହୂଙ୍କ ମୃତ୍ୟୁ ଘଟିଥିଲା। ସେଠାରୁ ହାତୀ ଯାଇ କିଛି ଦୂରରେ ଶଶୀ ସାହୁଙ୍କୁ ମଧ୍ୟ ଟେକି କଚାଡି ଦେଇଥିଲା। ଗୁରୁତର ଶଶୀ ସାହୁଙ୍କୁ ପ୍ରଥମେ ହିନ୍ଦୋଳ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ପ୍ରାଥମିକ ଚିକିତ୍ସା ପରେ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିବା ବେଳେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଛନ୍ତି ।
ଅନ୍ୟପଟେ ଆକ୍ରମଣ କରିବା ପରେ ପ୍ରାୟ ଏକ ଘଣ୍ଟା ପର୍ଯ୍ୟନ୍ତ ହାତୀପଲ ଗାଁ ଛାଡ଼ି ଯାଇନଥିଲେ । ବନ ବିଭାଗ କର୍ମଚାରୀଙ୍କୁ ଫୋନ୍ କରାଯାଇଥିଲେ ସୁଦ୍ଧା କେହି ପହଞ୍ଚି ନଥିବା ଗ୍ରାମବାସୀ ଅଭିଯୋଗ କରିଛନ୍ତି । ହାତୀ ପଲ ଚାଲିଯିବା ପରେ ମୃତଦେହକୁ ଗ୍ରାମବାସୀ ସତମାଇଲି ଛକରେ ରଖି ରାସ୍ତା ଅବରୋଧ କରିଛନ୍ତି । ତେବେ ଗତ କିଛିଦିନ ଧରି ଏହି ଅଞ୍ଚଳରେ ହାତୀ ଉପଦ୍ରବ ଅନେକ ପରିମାଣରେ ବଢ଼ି ଯାଇଛି। ବନ ବିଭାଗ କୌଣସି ପଦକ୍ଷେପ ଗ୍ରହଣ କରୁନଥିବା ଗ୍ରାମବାସୀ ଅଭିଯୋଗ କରିଛନ୍ତି। ପୁଲିସ ଓ ବନ ଅଧିକାରୀ ପହଞ୍ଚି ବୁଝାସୁଝା ଚଳାଇଛନ୍ତି।
