PRAMEYA

Prameya News Portal, Prameya Daily, Odisha Latest News, Odisha Current Headlines, Odisha News Online

ପ୍ରମୁଖ ଖବର
  • ନୋବେଲ ଶାନ୍ତି ପୁରସ୍କାର ଘୋଷଣା: ମାନବାଧିକାର ପ୍ରବକ୍ତା ଆଲେସ୍ ବାଲିଆସ୍କି ସହ ଦୁଇଟି ସଂଗଠନକୁ ମିଳିବ ପୁରସ୍କାର
  • ||
  • ଭୁବନେଶ୍ଵର : ଓଡ଼ିଶା ଲଳିତ କଳା ଏକାଡେମୀ ଉପସଭାପତି ତଥା ବିଶିଷ୍ଟ ଶିଳ୍ପୀ ଶ୍ରୀନିବାସ ପଢ଼ିଆରୀଙ୍କ ପରଲୋକ
  • ||
  • ମୁରିବାହାଲ : ଭିଜିଲାନ୍ସ ଜାଲରେ ମୁରିବାହାଲ ବ୍ଲକ APO ସୁଶାନ୍ତ କୁମାର ଦାସ, ୪୫ହଜାର ଟଙ୍କା ଲାଞ୍ଚ ନେଉଥିବା ବେଳେ ଧରାପଡ଼ିଲେ
  • ||
  • ବାଙ୍ଗିରିପୋଷି : ଶୌଚ ହେବାକୁ ଯାଇଥିବା ବେଳେ ଆକ୍ରମଣ କଲା ଦନ୍ତା, ଯୁବକ ମୃତ
  • ||
  • ଭୁବନେଶ୍ୱର : ପୁଣି ଘୂର୍ଣ୍ଣିବଳୟ ସମ୍ଭାବନା, ୨୫ ପୂର୍ବରୁ ଓଡ଼ିଶା ଛାଡ଼ିବନି ମୌସୁମୀ
  • ||
  • ଭଦ୍ରକ : ନଭେମ୍ୱର ୩ରେ ଧାମନଗର ଉପନିର୍ବାଚନ, ଆଜିଠୁ ନାମାଙ୍କନ ପତ୍ର ଦାଖଲ
  • ||
  • ତେଲକୋଇ : ଶୁଝି ପାରିଲେନି କିସ୍ତି, ଆତ୍ମହତ୍ୟା କଲେ ଅସହାୟ ଟ୍ରକ ମାଲିକ
  • ||
  • ମୋହନା : ଜଙ୍ଗଲରୁ ବିପୁଳ ପରିମାଣର କାଠ ଗଣ୍ଡି ଜବତ
  • ||
  • ଭୁବନେଶ୍ଵର : ରାଜ୍ୟରେ ଉପର ତଳ ହେଉଛି କରୋନା ଗ୍ରାଫ୍, ୨୪ ଘଣ୍ଟା ମଧ୍ୟରେ ୬୩ ପଜିଟିଭ୍ ଚିହ୍ନଟ
  • ||

୨୫% ଓଡ଼ିଆଙ୍କୁ ଫୋନ୍‌ ସ୍ୱପ୍ନ

ଭୁବନେଶ୍ୱର,୨୩ା୭(ବ୍ୟୁରୋ): ଗତ ବର୍ଷକ ମଧ୍ୟରେ ଓଡ଼ିଶାରେ ମୋବାଇଲ ଗ୍ରାହକ ସଂଖ୍ୟା ୧୧ ଲକ୍ଷ ୧୦ ହଜାର ବଢ଼ିଛି । ତଥାପି ୨୫ ଭାଗ ଓଡ଼ିଆ ଏବେ ବି ଟେଲିଫୋନ୍‌ ସେବାଠୁ ବହୁ ଦୂରରେ । ସେମାନଙ୍କ ପାଖରେ ନା ଅଛି ମୋବାଇଲ ଅଥବା ଲ୍ୟାଣ୍ଡଲାଇନ୍‌ । ଟେଲିକମ୍‌ ନିୟାମକ ‘ଟ୍ରାଇ’ ନିଜର ସଦ୍ୟତମ ରିପୋର୍ଟରେ ଏମିତି ତଥ୍ୟ ଦେଇଛି ।

ଭାରତୀୟ ଟେଲିକମ୍‌ ନିୟାମକ ପ୍ରାଧିକରଣ (ଟ୍ରାଇ) ପକ୍ଷରୁ ଲ୍ୟାଣ୍ଡଲାଇନ୍‌ ସଂଯୋଗ ସଂଖ୍ୟା ଓ ମୋବାଇଲ ସିମ୍‌ ସଂଖ୍ୟା ଆଧାରରେ ଏହି ତଥ୍ୟ ପ୍ରକାଶିତ ହୋଇଛି । କିନ୍ତୁ ଜଣେ ଜଣେ ଗ୍ରାହକଙ୍କ ନିକଟରେ ଏକାଧିକ ସିମ୍‌ ମଧ୍ୟ ରହିଛି । ଯଦି ବାସ୍ତବ ଗ୍ରାହକ ସଂଖ୍ୟା ହିସାବ କରାଯାଏ, ତେବେ ଓଡ଼ିଶାର ଟେଲି ସାନ୍ଦ୍ରତା ଆହୁରି କମିଯିବ ବୋଲି ଆକଳନ କରାଯାଉଛି ।

ଟ୍ରାଇ ରିପୋର୍ଟ ମୁତାବକ, ବର୍ଷକ ମଧ୍ୟରେ ଓଡ଼ିଶାର ଟେଲି ସାନ୍ଦ୍ରତା ପ୍ରାୟ ୨% ବଢ଼ିଛି । ୨୦୧୮ ମେ’ରେ ରାଜ୍ୟର ଟେଲି ସାନ୍ଦ୍ରତା ଥିଲା ୭୩.୩୩% । ଏହା ଅର୍ଥ ଗତବର୍ଷ ରାଜ୍ୟର ପ୍ରତି ଶହେ ଲୋକଙ୍କ ମଧ୍ୟରୁ ୭୩.୩୩ ଭାଗଙ୍କ ପାଖରେ ମୋବାଇଲ ବା ଲ୍ୟାଣ୍ଡଲାଇନ୍‌ ସେବା ରହିଥିଲା । ୨୦୧୯ ମେ’ରେ ଏହା ୭୫.୨୭%କୁ ବଢ଼ିଛି, ଅର୍ଥାତ ପ୍ରତି ଶହେ ଲୋକଙ୍କ ମଧ୍ୟରେ ୭୫.୨୭%ଙ୍କ ପାଖରେ ଟେଲିଫୋନ୍‌ ସେବା ପହଞ୍ଚିଛି । ବଳକା ୨୪.୭୩% ଲୋକଙ୍କ ପାଖରେ ଏବେ ବି ଟେଲିଫୋନ୍‌ ସେବା ଅପହଞ୍ଚ ।
ରିପୋର୍ଟ କହୁଛି, ୨୦୧୮ ମେ’ ୩୧ ସୁଦ୍ଧା ଓଡ଼ିଶାର ମୋଟ ୱେରଲେସ୍‌ ବା ମୋବାଇଲ ଉପଭୋକ୍ତାଙ୍କ ସଂଖ୍ୟା ୩ କୋଟି ୧୪ ଲକ୍ଷ ୧୯ହଜାର ୮୮୭ ଥିଲା । ତେବେ ଚଳିତ ବର୍ଷ ମେ’ ୩୧ ମଧ୍ୟରେ ଏହି ସଂଖ୍ୟା ୧୧ ଲକ୍ଷ ୧୦ ହଜାର ୮୩୬ ବଢ଼ିଯାଇଛି । ମୋବାଇଲ ଗ୍ରାହକଙ୍କ ସଂଖ୍ୟା ୩ କୋଟି ୨୫ ଲକ୍ଷ ୩୦ ହଜାର ୭୨୩ ଛୁଇଁଛି ।

ଅପରପକ୍ଷରେ ଏ ଅବଧିରେ ଓଡ଼ିଶାରେ ୱେରଲାଇନ୍‌ ବା ଲ୍ୟାଣ୍ଡଲାଇନ ଟେଲିଫୋନ ଗ୍ରାହକଙ୍କ ସଂଖ୍ୟା ୩୭,୧୭୧ ଖସିଛି । ଗତବର୍ଷ ମେ’ରେ ରାଜ୍ୟରେ ୨ ଲକ୍ଷ ୬୮ ହଜାର ୪୦୪ ଜଣ ଲ୍ୟାଣ୍ଡଲାଇନ୍‌ ଗ୍ରାହକ ଥିଲେ । ୨୦୧୯ ମେ’ ସୁଦ୍ଧା ଏହି ସଂଖ୍ୟା ୨ ଲକ୍ଷ ୩୧ ହଜାର ୨୩୩କୁ ଖସିଆସିଛି ।
ଟ୍ରାଇ ରିପୋର୍ଟ ବିଶ୍ଳେଷଣରୁ ଜଣାପଡ଼ିଛି, ୨୦୧୮ ମେ’ରୁ ୨୦୧୯ ମେ’ ରିଲାଏନ୍ସ ଜିଓ ଓ ବିଏସ୍‌ଏନ୍‌ଏଲ୍‌କୁ ଛାଡ଼ିଦେଲେ ଅନ୍ୟ ସମସ୍ତ ଟେଲିକମ୍‌ କମ୍ପାନିର ଗ୍ରାହକ ସଂଖ୍ୟା କମିଛି । ଏହି ବର୍ଷକ ମଧ୍ୟରେ ରିଲାଏନ୍ସ ଜିଓର ଗ୍ରାହକ ସଂଖ୍ୟା ସର୍ବାଧିକ ୭୦.୩୮% ବା ୪୦,୪୭,୮୦୬ ଜଣ ବଢ଼ିଛନ୍ତି । ୨୦୧୮ ମେ’ରେ ରିଲାଏନ୍ସ ଜିଓର ଉପଭୋକ୍ତା ସଂଖ୍ୟା ୫୭,୫୦,୫୮୮ ଥିଲା ବେଳେ ଚଳିତ ମେ’ରେ ଏହା ୯୭,୯୮,୩୯୪ ହୋଇଛି । ସେହିଭଳି ରାଷ୍ଟ୍ରାୟତ୍ତ ବିଏସ୍‌ଏନ୍‌ଏଲ୍‌ର ଗ୍ରାହକ ସଂଖ୍ୟା ୨୦୧୮ ମେ’ର ୫୪,୯୨,୦୦୫ ତୁଳନାରେ ୨୪.୬୫% ବା ୨,୫୫,୮୩୬ ଜଣ ବଢ଼ି ୫୭,୪୭,୮୪୩ ହୋଇଛି ।

ଅପରପକ୍ଷରେ ଗତ ବର୍ଷକ ମଧ୍ୟରେ ଭୋଡାଫୋନ୍‌ ଆଇଡିଆର ଗ୍ରାହକ ସଂଖ୍ୟା ୨୯.୮୭% ବା ୧୯,୮୩,୫୯୧ ଜଣ କମିଛନ୍ତି । ୨୦୧୮ ମେ’ରେ ଆଇଡିଆ ଓ ଭୋଡାଫୋନର ମିଳିତ ଗ୍ରାହକ ସଂଖ୍ୟା ୬୬,୩୯,୨୦୨ ଥିଲା । କିନ୍ତୁ ୨୦୧୯ ମେ’ରେ ଉଭୟ କମ୍ପାନିର ସମ୍ମିଶ୍ରଣ ପରେ ଗଠନ ହୋଇଥିବା ଭୋଡାଫୋନ ଆଇଡିଆର ଗ୍ରାହକ ସଂଖ୍ୟା ୪୬,୫୫,୬୧୧କୁ ଖସିଆସିଛି । ସେହିଭଳି ରାଜ୍ୟର ଏକ ନମ୍ବର ଟେଲିକମ୍‌ କମ୍ପାନି ଭାରତୀ ଏୟାରଟେଲର ଗ୍ରାହକ ସଂଖ୍ୟା ଏ ଅବଧିରେ ୬,୦୮,୧୪୩ କମି ୧,୨୦,୫୪,୬୮୪ରେ ପହଞ୍ଚିଛି । ୨୦୧୮ ମେ’ରେ ଏହା ୧,୨୬,୬୨,୮୨୭ ଥିଲା ।
ରାଜ୍ୟ ସରକାରଙ୍କ ସର୍ଭେ ମୁତାବକ, ୨୦୧୬-୧୭ରେ ୧୧,୦୦୦ ଗ୍ରାମରେ କୌଣସି ପ୍ରକାର ଟେଲିଫୋନ୍‌ ସଂଯୋଗ ନାହିଁ । ସେଥିମଧ୍ୟରୁ ୧୦,୦୦୦ ଗ୍ରାମ ମାଓବାଦୀ ପ୍ରଭାବିତ ଅଞ୍ଚଳରେ ଅବସ୍ଥିତ । ଏସବୁ ଅଞ୍ଚଳରେ ମୋବାଇଲ୍‌ ଟାୱାର ସ୍ଥାପନ କରି ଟେଲିଫୋନ୍‌ ସେବା ଯୋଗାଣ ପାଇଁ ରାଜ୍ୟ ସରକାର କାର୍ଯ୍ୟପନ୍ଥା ଗ୍ରହଣ କରୁଥିବା ଜଣାପଡ଼ିଛି ।