କେନ୍ଦୁଝର/ବାଂଶପାଳ,୨ା୨(ଆପ୍ର): ଶୁଦ୍ଧକ୍ରିୟା ଭୋଜି ଖାଇ କେନ୍ଦୁଝର ଜିଲ୍ଲା ବାଂଶପାଳ ବ୍ଲକ୍‌ ଅନ୍ତର୍ଗତ ଟୋଲଡିହି ଗ୍ରାମରେ ୨୫୦ ଜଣ ଝାଡାବାନ୍ତିରେ ଆକ୍ରାନ୍ତ ହେବା ଘଟଣା ଚାଞ୍ଚଲ୍ୟ ଖେଳାଇ ଦେଇଛି । ଏହି ଗ୍ରାମର ପିତାମ୍ବର ଖଟେଇଙ୍କ ମା’ ବେଲଙ୍କ ଶୁଦ୍ଧକ୍ର୍ରିୟାରେ ବନ୍ଧୁବାନ୍ଧବ ଓ ସାଇପଡିଶା ଯୋଗ ଦେଇଥିଲେ । ଏକାଦଶାହ ଭୋଜିରେ ଭାତ, ପନିର, ଡାଲି, ତରକାରୀ, ଖଟା ହୋଇଥିବାବେଳେ ବାଂଶପାଳରୁ ଟ୍ୟାଙ୍କର ଯୋଗେ ପାନୀୟ ଜଳା ବ୍ୟବସ୍ଥା ହୋଇଥିଲା । ତେବେ ବାସି ଖାଦ୍ୟ ଏବଂ ଖାଦ୍ୟରେ ବିଷକ୍ରିୟା ଯୋଗୁଁ ଭୋଜି ଖାଇଥିବା ଲୋକାମାନେ ଆକ୍ରାନ୍ତ ହୋଇଥିବା ଅନୁମାନ କରାଯାଉଛି ।
କୌଣସି କାରଣରୁ ଖାଦ ବିଷାକ୍ତ ଯୋଗୁ ଭୋଜିରେ ଯୋଗ ଦେଇଥିବା ୨୫୦ ଜଣ ଝାଡାବାନ୍ତିରେ ଶନିବାର ରାତିଠାରୁ ଆକ୍ରାନ୍ତ ହୋଇଥିଲେ । ଜଣଙ୍କ ପରେ ଜଣେ ଝାଡାବାନ୍ତିରେ ଶିକାର ହୋଇଥିବାରୁ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଥିଲା । ଲୋକେ ପ୍ରାଣବିକଳରେ ଡାକ୍ତରଖାନା ଯିବା ପାଇଁ ବ୍ୟଗ୍ର ହୋଇପଡିଥିଲେ । ଆମ୍ବୁଲାନ୍ସକୁ ଯୋଗାଯୋଗ କରାଯାଇଥିଲେ ମଧ୍ୟ ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମ ଯୋଗୁ ରବିବାର ଗୋଟିଏ ମଧ୍ୟ ଜରୁରୀକାଳୀନ ଗାଡି ମିଳିନଥିଲା । ଫଳରେ ସ୍ଥାନୀୟ ଲୋକଙ୍କ ସହଯୋଗରେ ସେମାନଙ୍କୁ ବାଂଶପାଳ ଡାକ୍ତରଖାନାକୁ ରବିବାର ଅଣାଯାଇଥିଲା । ସେଥିମଧ୍ୟରୁ ଡମ୍ବରୁ କାର୍ଯୀ, କଣ୍ଟେନି କାର୍ଯୀ, ତେଲି ଦେହୁରୀ, ଚଇତି ବେହେରାଙ୍କ ଅବସ୍ଥା ଗୁରୁତର ଥିବା ଜଣାପଡିଛି । ୧୫ରୁ ଅଧିକ ଶିଶୁ ମଧ୍ୟ ଡାକ୍ତରଖାନାରେ ଭର୍ତ୍ତି ହୋଇଛନ୍ତି । ଡାକ୍ତରଙ୍କ ପ୍ରାଥମିକ ଚିକିତ୍ସା ପରେ ପରିସ୍ଥିତି ନିୟନ୍ତ୍ରଣ ଥିବା ଜଣାପଡିଛି । ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳବାସୀ ଭୟଭୀତ ହୋଇପଡିଛନ୍ତି । ଖବରପାଇ କେନ୍ଦୁଝରରୁ ଏକ ମେଡିକାଲ ଟିମ୍‌ ବାଂଶପାଳ ପଠାଯିବ ବୋଲି ସିଡିଏମଓ କହିଛନ୍ତି ।